Yoswa 23:1-16
23 Yoswa akhadakalamba, pontho akhali na pyaka pizinji.+ Pakhadapita ntsiku zizinji kubulukira pa ndzidzi udapumisa Yahova Aizraeli+ kuna anyamalwa awo onsene adaazungulira.
2 Yoswa acemeresa Aizraeli onsene,+ akulu, atsogoleri, anyakutonga miseru na akadamu+ mbaapanga: “Ine ndakalamba, pontho ndiri na pyaka pizinji.
3 Imwe mwaona mwekha pyonsene pidacita Yahova Mulungu wanu kuna madzindza awa onsene thangwi ya imwe. Adakumenyerani nkhondo ndi Yahova Mulungu wanu.+
4 Onani, mwakubverana na pidzindikiro pya Mulungu,+ ine ndagawa dziko ya madzindza adasala, ninga unthaka wa madzindza anu,+ kutomera ku Yordani mpaka ku Bara Ikulu,* kukhundu yakumadokero a dzuwa, kuphatanizambo dziko ya madzindza onsene adafudza ine.+
5 Pontho ndi Yahova Mulungu wanu adaathamangisa pamaso panu.+ Iye aathamangisa thangwi ya imwe, mbamukwata dziko yawo ninga mudapikira Yahova Mulungu wanu kuna imwe.+
6 “Cincino khalani acipapo kakamwe toera kubvera na kuphatisira pyonsene pidalembwa mʼbukhu ya Mwambo+ wa Mose, mbamukhonda kupeuka kuenda kukhundu yamadyo peno yabzwere,+
7 pontho lekani kubvungazikana na madzindza anewa+ adasalikira pakati panu. Imwe nee musafunika kulonga madzina a alungu awo+ peno kudumbira mu dzina yawo, pontho lekani kuatumikira peno kuagodamira.+
8 Mbwenye imwe musafunika kukhala akukhulupirika kuna Yahova Mulungu wanu,+ ninga pidacita imwe mpaka lero.
9 Yahova anadzathamangisa madzindza makulu na amphambvu pamaso panu,+ thangwi nkhabe munthu adakwanisa kukukundani mpaka lero.+
10 Mwa imwe mamuna mʼbodzi basi anadzathamangisa anthu 1.000,+ thangwi ndi Yahova Mulungu wanu anakumenyerani nkhondo,+ ninga mudapikira iye kuna imwe.+
11 Natenepa, pitirizani kucita mphole-mphole+ toera mufune Yahova Mulungu wanu.+
12 “Mbwenye imwe mungapeuka mbamukhala akuphatana na madzindza anewa adasalikira+ pakati panu, kusemberana+ nawo mbamubvungazikana nawo,
13 dziwani kuti Yahova Mulungu wanu anadzasiya kuthamangisa madzindza anewa pamaso panu.+ Iwo anadzakhala ninga nsampha kuna imwe, anadzakhalambo ninga ntcamu kunsana kwanu,+ pontho ninga minga mʼmaso mwanu mpaka imwe kumala kuzambazika mu dziko iyi yadidi idakupasani Yahova Mulungu wanu.
14 “Onani! Ine ndiri dhuzi toera kufa, pontho imwe musadziwa mwadidi* kuti mapikiro onsene adidi adalonga Yahova Mulungu wanu kuna imwe akwanirisika. Pyonsene pidapikira iye kuna imwe pyakwanirisika. Nee pikiro ibodzi idakhonda kwanirisika.+
15 Mbwenye ninga mudakwanirisika mapikiro onsene adidi adacita Yahova Mulungu wanu kuna imwe,+ munjira ibodzi ene, Yahova anadzabweresa nyatwa* kuna imwe ninga mudapikira iye, pontho anadzakufudzani mu dziko iyi yadidi idakupasani Yahova Mulungu wanu.+
16 Mungakhonda kutoweza cibverano ca Yahova Mulungu wanu cidakupangani iye, mbamutumikira alungu anango na kuagodamira, penepo Yahova anadzaipirwa kakamwe na imwe,+ mbamuzambazikiratu mu dziko iyi yadidi idakupasani iye.”+
Pidzindikiro Pyapantsi
^ Ineyi ndi bara ya Medhiteraneo.
^ Fala na Fala: “na ntima wanu onsene na umaso wanu onsene.”
^ Peno: “madzedze onsene.”
