Yoswa 22:1-34
22 Natenepa, Yoswa acemeresa dzindza ya Rubheni, dzindza ya Gadhi pabodzi na hafu ya dzindza ya Manase,
2 mbaapanga: “Imwe mwacita pyonsene pidakupangani Mose ntumiki wa Yahova,+ pontho mwabvera pyonsene pidakupangani ine.+
3 Imwe nee mwasiya abale anu ndzidzi unoyu onsene mpaka lero;+ pontho mwabvera matongero a Yahova Mulungu wanu.+
4 Cincino Yahova Mulungu wanu apumisa abale anu ninga mudapikira iye kuna iwo.+ Natenepa bwererani pyanu ku misasa yanu mu dziko idakupasani Mose ntumiki wa Yahova toera mukhale kuntunda unango* wa Yordani.+
5 Basi ene towezerani mwadidi matongero na Mwambo udakupasani Mose ntumiki wa Yahova.+ Citani pyenepi thangwi yakufuna Yahova Mulungu wanu;+ mufambe munjira zace zonsene,+ mukoye matongero ace,+ mukhale akukhulupirika kuna iye,+ mbamuntumikira+ na ntima wanu onsene na umaso wanu onsene.”+
6 Buluka penepo, Yoswa aapasa nkhombo mbaasiya toera aende, natenepa iwo aenda ku misasa yawo.
7 Hafu ibodzi ya dzindza ya Manase, Mose akhadaipasa unthaka ku Bhasani,+ hafu inango ya dzindza ineyi, Yoswa aipasa dziko kumadokero a dzuwa a ntunda unango wa Yordani+ pabodzi na abale awo. Kusiyapo pyenepi, pidaapanga Yoswa toera aende ku misasa yawo, iye aapasa nkhombo,
8 mbaapanga: “Bwererani ku misasa yanu na mpfuma zizinji, na pifuyo pizinji, na parata, ouro, nkuwa, utale na nguwo zizinji kakamwe.+ Gawanani na abale anu pinthu pidatapata imwe+ kuna anyamalwa anu.”
9 Buluka penepo, dzindza ya Rubheni, dzindza ya Gadhi na hafu ya dzindza ya Manase asiya Aizraeli anango ku Silo, mu dziko ya Kanani, mbabwerera ku Jiliyadhi,+ dziko idapaswa iwo toera akhale mwenemu mwakubverana na pidalonga Yahova kuna Mose.+
10 Pidafika iwo mucisa ca Yordani, mu dziko ya Kanani, dzindza ya Rubheni, dzindza ya Gadhi na hafu ya dzindza ya Manase amanga guwa nʼkhundu mwa nkulo wa Yordani, guwa ineyi ikhali ikulu kakamwe.
11 Mukupita kwa ndzidzi Aizraeli anango abva pyenepi,+ mbalonga: “Onani! Dzindza ya Rubheni, dzindza ya Gadhi na hafu ya dzindza ya Manase amanga guwa mʼmadire a dziko ya Kanani, mucisa ca Yordani kukhundu ya Aizraeli.”
12 Aizraeli pidabva iwo pyenepi, onsene agumanyikana ku Silo+ toera kuenda kamenyana nawo.
13 Buluka penepo, Aizraeli atuma nyantsembe Fineya+ mwana wa Eleazare toera kuenda kuna dzindza ya Rubheni, dzindza ya Gadhi na hafu ya dzindza ya Manase ku dziko ya Jiliyadhi,
14 pontho iye aenda pabodzi na amuna khumi. Mamuna mʼbodzi na mʼbodzi akhaimirira dzindza ibodzi ya Aizraeli. Onsene akhali atsogoleri a mabanja kukhundu ya ababawo, pakati pa pikwi pya Aizraeli.+
15 Pidafika iwo kuna dzindza ya Rubheni, dzindza ya Gadhi na kuna hafu ya dzindza ya Manase mu dziko ya Jiliyadhi, aapanga:
16 “Mbumba yonsene ya Yahova yalonga tenepa: ‘Thangwi yanji mwacita pinthu mwakukhonda khulupirika+ mbamudawira Mulungu wa Izraeli? Thangwi yanji imwe mwasiya kubvera Yahova, mbamumanga guwa yanu toera musandukire Yahova?+
17 Kodi kudawa kudacita ife ku Peori nee kwakwana? Imwe mwaduwala muliri udagwera mbumba ya Yahova?+ Ife tiri kupitiriza kuona nyatwa thangwi ya madawo anewa.
18 Kodi lero imwe musafuna kusiya kubvera Yahova? Imwe mungakhonda kubvera Yahova lero, mangwana iye anadzaipirwa na mbumba yonsene ya Izraeli.+
19 Khala musaona kuti dziko idapaswa imwe ndi yakukhonda cena pamaso pa Mulungu, wambukani kuntunda unango, ku dziko ya Yahova+ kunagumanika+ tabhernakulo ya Yahova mbamukhala pabodzi na ife. Mbwenye lekani kukhonda kubvera Yahova, mbamumanga guwa yanu kusiyapo guwa ya Yahova Mulungu wathu,+ gopa iye anadzationa ninga anthu akukhonda kubvera.
20 Akani+ mwana wa Zera pidacita iye pinthu mwakukhonda khulupirika thangwi ya pinthu pyakuti pikhafunika kufudzwa, kodi Mulungu nee aipirwa na mbumba yonsene ya Izraeli?+ Pontho Akani nee afa ekhene thangwi ya madawo ace.’”+
21 Natenepa dzindza ya Rubheni, dzindza ya Gadhi na hafu ya dzindza ya Manase atawira atsogoleri a pikwi pya Aizraeli:+
22 “Yahova, Mulungu wankulu kupiringana alungu anango onsene! Yahova, Mulungu wankulu kupiringana alungu anango onsene!+ Iye asadziwa, pontho Aizraeli anadzadziwambo. Khala ife takhala akukhonda kubvera na akukhonda khulupirika kuna Yahova, iye mbaleke kutipulumusa lero.
23 Khala ife tamanga guwa toera tikhonde kubvera Yahova, pontho toera tipereke ntsembe zakupiswa, ntsembe za pyakudya na ntsembe toera kupereka takhuta,* Yahova anadzatitcunyusa.+
24 Ife tacita pyenepi basi ene thangwi tisadzudzumika kuti ananu ntsogolo anadzabvundza anathu kuti: ‘Ninji piri na imwe na Yahova Mulungu wa Izraeli?
25 Yahova acitisa kuti Yordani akhale madire pakati pa ife na imwe, dzindza ya Rubheni na dzindza ya Gadhi. Imwe nee muli na khundu mu ulambiri wa Yahova.’ Natenepa, ananu anadzapingiza anathu kulambira* Yahova.”
26 “Na thangwi ineyi, ife talonga: ‘Tendeni timange guwa yathu, tayu toera kupereka ntsembe zakupiswa peno ntsembe zinango,
27 mbwenye toera ikhale umboni kuna ife na imwe,+ pontho kuna anathu na kuna ananu* toera ipangize kuti ife tinatumikira Yahova na ntsembe zathu zakupiswa, ntsembe zathu toera kupereka takhuta+ na ntsembe zathu zinango. Natenepa, ananu ntsogolo nee anadzapanga anathu kuti: “Imwe nee muli na khundu mu ulambiri wa Yahova.’”
28 Na thangwi ineyi, ife talonga: ‘Ntsogolo iwo angatibvundza pyenepi, ife na anathu tinadzaatawira: “Onani guwa idacita ambuyathu yalandana na guwa ya Yahova, iyo nee yacitwa toera kupereka ntsembe zakupiswa peno ntsembe zinango, mbwenye ndi toera ikhale umboni kuna ife na imwe.”’
29 Ife cipo tinanyerezera kudawira Yahova peno kukhonda kubvera Yahova,+ mbatimanga guwa toera kupereka ntsembe zakupiswa, ntsembe za pyakudya na ntsembe zinango, kusiyapo guwa ya Yahova Mulungu wathu yakuti iri dhuzi na tabhernakulo yace!”+
30 Nyantsembe Fineya, atsogoleri a mbumba na atsogoleri a pikwi pya Aizraeli pidabva iwo mafala adalonga dzindza ya Rubheni, ya Gadhi na ya Manase, iwo akomerwa kakamwe.+
31 Natenepa, nyantsembe Fineya mwana wa Eleazare apanga dzindza ya Rubheni, ya Gadhi na ya Manase kuti: “Lero ife tisadziwa kuti Yahova ali na ife, thangwi imwe nee mwacita pinthu mwakukhonda khulupirika kuna Yahova. Natenepa imwe mwapulumusa Aizraeli mʼmanja mwa Yahova.”
32 Buluka penepo, nyantsembe Fineya mwana wa Eleazare na atsogoleri abuluka kuna dzindza ya Rubheni na ya Gadhi ku dziko ya Jiliyadhi, iwo abwerera ku dziko ya Kanani, mbapanga Aizraeli anango mphangwa zidadza na iwo.
33 Aizraeli akomerwa kakamwe na mphangwa zenezi. Buluka penepo, Aizraeli asimba Mulungu, iwo nee alongabve pya kumenyana na dzindza ya Rubheni na ya Gadhi toera kufudza dziko ikakhala iwo.
34 Natenepa, dzindza ya Rubheni na ya Gadhi apasa dzina guwa* ineyi, thangwi iwo alonga: “Guwa iyi ndi umboni kuna ife kuti Yahova ndi Mulungu wandimomwene.”
Pidzindikiro Pyapantsi
^ Pyenepi pisabveka, kumabulukiro a dzuwa.
^ Peno: “ntsembe za ntendere.”
^ Fala na Fala: “kugopa.”
^ Fala na Fala: “madzindza athu.”
^ Mwakubverana na mphangwa zidafokotozwa, panango guwa ineyi yapaswa dzina yakuti Umboni.
