Yoswa 14:1-15
14 Ineyi ndi dziko idapaswa Aizraeli ninga unthaka mu dziko ya Kanani, yakuti nyantsembe Eleazare na Yoswa mwana wa Nuni, pabodzi na atsogoleri a madzindza a Izraeli aipereka kuna iwo ninga unthaka.+
2 Madzindza mapfemba na hafu+ agawirwa unthaka wawo mwakubverana na cidzindikiro ca Mulungu,*+ ninga pikhadalonga Yahova kubulukira mwa Mose.
3 Mose akhadapereka kale unthaka kuna madzindza anango mawiri na hafu kuntunda unango* wa Yordani,+ mbwenye Alevi iye nee aapasa unthaka.+
4 Ana a Zuze akhali madzindza mawiri,+ dzindza ya Manase na dzindza ya Efraimu;+ pontho Alevi apaswa mizinda+ toera akhale, apaswa mbuto zakudyesa pifuyo pyawo na mbuto zakukoyera pinthu pyawo,+ mbwenye iwo nee apaswa khundu ya dziko ninga unthaka wawo.
5 Natenepa, Aizraeli agawa dziko mwakubverana na pidalonga Yahova kuna Mose.
6 Buluka penepo, amuna anango a dzindza ya Yuda aenda kuna Yoswa ku Jiligale.+ Kalebe+ mwana wa Yefune wakuti ndi Nkenizeu, alonga kuna Yoswa: “Imwe musadziwa mwadidi pidalonga Yahova+ kuna Mose ntumiki wa Mulungu wandimomwene+ thangwi ya ine na imwe ku Kadhesi-Bharneya.+
7 Ine ndikhali na pyaka 40 pyakubalwa pidandituma Mose ntumiki wa Yahova buluka ku Kadhesi-Bharneya toera kuenda kaona dziko,+ pontho pidabwerera ine ndampanga pyonsene pidaona ine.+
8 Maseze ale adaenda na ine agopesa mbumba, mbwenye ine ndabvera Yahova Mulungu wanga na ntima onsene.*+
9 Pa ntsiku ineyi Mose adumbira kuti: ‘Dziko idaponda iwe inadzakhala unthaka wako na wa anako kwenda na kwenda, thangwi iwe wabvera Yahova Mulungu wanga na ntima onsene.’+
10 Ninga mudapikira Iye,+ Yahova andikoya+ mu pyaka 45 kutomera ndzidzi udacita Yahova pikiro ineyi kuna Mose, pikhafamba Aizraeli nʼthando;+ lero ine ndiciri maso na pyaka 85 pyakubalwa.
11 Pontho lero ndiciri na mphambvu ninga zikhali na ine ntsiku idandituma Mose. Mphambvu ziri na ine cincino ndi sawasawa ninga zikhali na ine kale, toera kuenda kunkhondo na kucita mabasa anango.
12 Natenepa, ndipaseni cisa ca mapiri cidapikira Yahova pa ntsiku ineyi. Maseze imwe mwabva kuti kweneko kukhali Anakimu+ na mizinda mikulu ya mipanda yakuwanga,+ mwakukhonda penula* Yahova anadzakhala na ine,+ pontho ndinadzaathamangisa ninga mudapikira Yahova.”+
13 Natenepa, Yoswa apasa nkhombo Kalebe mwana wa Yefune, mbampasa nzinda wa Ebhroni ninga unthaka wace.+
14 Na thangwi ineyi, mpaka lero nzinda wa Ebhroni ndi unthaka wa Kalebe mwana wa Yefune wakuti ndi Nkenizeu, thangwi iye abvera Yahova Mulungu wa Izraeli na ntima onsene.+
15 Kale, nzinda wa Ebhroni ukhacemerwa Kiriyati-Arbha+ (Arbha akhali mamuna wakufunika kakamwe mwa Anakimu). Natenepa, dziko yonsene nee ikhalibve na nkhondo.+
Pidzindikiro Pyapantsi
^ Iwo akhacita pinthu pyakuti pikhapangiza pinafuna Mulungu.
^ Pyenepi pisabveka, kumabulukiro a dzuwa.
^ Fala na Fala: “mwakukwana.”
^ Peno: “ndisadikhira kuti.”
