Rute 3:1-18
3 Noemi, mebzwalace Rute, ampanga: “Mwananga, ine ndinakusakira mamuna kuti usembwe naye,+ toera ukhale na umaso wakutsidzikizika.*
2 Bhoazi ule adakutawirisa kukhala pabodzi na anyabasa ace akazi, ndi mʼbale wathu.+ Maulo ano iye anapepeta sevadha pa mbuwa yace.
3 Natenepa, samba, dzola mafuta akununkhira; pontho bvala nguwo zako zadidi kakamwe, ungamala ndoko ku mbuwa.* Leka kuonekera kuna iye mpaka amale kudya na kumwa.
4 Iye angaenda kagona, onesesa mwadidi panagona iye; buluka penepo, ndoko ukakundzule kumiyendo kwace nguwo idafinika iye mbugona kweneko. Iye anadzakupanga pinafunika iwe kucita.”
5 Rute atawira: “Ndinacita pyonsene pidandipanga imwe.”
6 Natenepa, iye aenda ku mbuwa, mbacita pyonsene pidampanga mebzwalace.
7 Bhoazi adya, amwa, mbatsandzaya. Pidamala iye, aenda kagona nʼkhundu mwa nkuku wa sevadha. Buluka penepo, Rute anfendedzera pangʼono-pangʼono, akundzula kumiyendo kwa Bhoazi nguwo idafinika iye, mbagonambo.
8 Pa tcititciti Bhoazi atoma kudzadzamira, pidalamuka iye ncitulo mbakhala pantsi, aona nkazi ali kugona kumiyendo kwace.
9 Iye ambvundza: “Ndiwe ani?” Nkazi atawira: “Ndine Rute. Ndifinikizenimbo nguwo yanu, thangwi ndimwe muomboli wathu.”+
10 Natenepa, iye alonga: “Yahova akupase nkhombo mwananga. Ufuni udapangiza iwe cincino ndi ukulu kakamwe kupiringana udapangiza iwe pakutoma,+ thangwi nee wasaka aphale akutcerenga peno akupfuma.
11 Mwananga, cincino leka gopa. Ine ndinacita pyonsene pidalonga iwe,+ thangwi anthu onsene mu nzinda* asadziwa kuti ndiwe nkazi wadidi kakamwe.
12 Maseze ndine muomboli wanu,+ mbwenye pana muomboli unango wakuti ndi mʼbale wanu wapadhuzi kakamwe kupiringana ine.+
13 Khala pano masiku ano, mangwana namacibese angakuombola, mphyadidi! Iye mbakuombole.+ Mbwenye angakhonda kukuombola, ndisadumbira kuna Yahova Mulungu wa mʼmaso kuti ine ndinakuombola. Gona pano mpaka mangwana namacibese.”
14 Natenepa, iye agona kumiyendo kwa Bhoazi mpaka mangwana mwace, mbalamuka kunja kuciri na cidima toera akhonde kuoniwa. Bhoazi alonga: “Nee mʼbodzi asafunika kudziwa kuti pa mbuwa pakhadafika nkazi.”
15 Buluka penepo, iye apanga Rute: “Futhula nguwo idabvala iwe, mbuiphatirira.” Natenepa, iye afuthula nguwo yace, Bhoazi mbaikhamo ntsengwa zitanthatu* za sevadha, mbanʼthukisa. Bhoazi pidamala iye aenda ku nzinda.
16 Pidabwerera Rute kunyumba, mebzwalace ambvundza: “Wafamba tani* mwananga?” Rute ampanga pyonsene pidancitira Bhoazi.
17 Rute athimiza: “Iye andipasa ntsengwa izi zitanthatu za sevadha, mbandipanga kuti: ‘Leka kuenda cimanja-manja kuna mebzwalako.’”
18 Natenepa, Noemi alonga: “Dikhira mwananga, mpaka udziwe kuti pinthu pinafamba tani, thangwi mamuna unoyu nee anapuma mbadzati kusasanyira pyonsene lero.”
Pidzindikiro Pyapantsi
^ Peno: “na mudzi.”
^ Peno: “mbuto inabubudirwa pinthu.”
^ Fala na Fala: “misuwo mikulu yonsene ya mbumba yanga.”
^ Cifupi na malitru 44.
^ Fala na Fala: “Ndiwe ani?”
