Misangani 7:1-27
7 Mwananga, bvera mafala anga,Pontho koya matongero anga muntima mwako.+
2 Koya matongero anga toera ukhale na umaso;+Koya pipfundziso pyanga* ninga munatsidzikiza iwe mboni ya diso yako.
3 Pimangire mʼpyala pyako;Pilembe muntima mwako.+
4 Panga udziwisi kuti: “Iwe ndiwe mʼbale wanga wankazi,”
Pontho cemera luso yakubvesesa kuti ndiwe “mʼbale wanga,”
5 Toera utsidzikizike kuna nkazi waulukwali,*+Kuna nkazi waulukwali* na mafalace akutundusa.*+
6 Na pajanela ya nyumba yanga,Kubulukira pajanela, ine ndayangʼana pantsi,
7 Mu ndzidzi ukhayangʼana ine anthu akukhonda dziwa pinthu,Pakati pa aphale ndaona mʼphale wakusowa ndzeru.+
8 Iye apita na nseu, dhuzi na mphambano yakuenda kuna nkazi unoyu,Mbaenda kukhundu ya kunyumba kwace,
9 Namaulo, mu ndzidzi ukhadoka dzuwa,+Ncidodo mu ndzidzi ukhatoma cidima.
10 Ndaona nkazi mbaenda kaonana na iye,Iye akhadabvala ninga puta,+ pontho akhali na ntima wakunyengeza.
11 Nkazi unoyu asalonga pinthu pyakuzuda na pyakupasa manyadzo.+
Iye nee asakhala* panyumba.
12 Midzidzi inango iye asagumanika mʼmiseu, midzidzi inango asagumanika mu mbuto zapakweca,Iye asakhala mʼmphambano zonsene.+
13 Iye aphata mʼphale unoyu, mbampswompswona;Mwakusowa manyadzo, iye ampanga:
14 “Ine ndikhafunika kupereka ntsembe toera kupereka takhuta.+
Lero ndacita pidapikira ine.
15 Na thangwi ineyi, ndabwera kudzaonana na iwe,Toera ndione nkhope yako, natenepa ndakugumana!
16 Ndathasika nguwo yadidi patalimba panga,Nguwo ya makore mazinji ya ku Ejitu.+
17 Talimba yanga ndaiwazira mafuta akununkhira akucitwa na mira, alowe na kanela.+
18 Bwera, tende tikapangizane ufuni mpaka tikwane nawo, ticite pyenepi mpaka mangwana namacibese;Tende tikatsandzaye na ufuni,
19 Thangwi mamunanga nee ali panyumba;Iye acita ulendo, aenda kutali.
20 Iye aenda na budu ya kobiri,Anabwerera pa ntsiku inafuna kukhala mwezi ndendende.”
21 Iye apeusa mʼphale unoyu thangwi yakucita pinthu pizinji pyakutundusa.+
Anʼnyengerera na mafalace adidi.
22 Mwakukhonda dembuka, iye asantowera, ninga ngʼombe inaenda kaphiwa,Ninga dzemwa anaenda katcunyuswa pa phindi ya muti,*+
23 Mpaka pswimo kuphola fafa yace;Ninga mbalame inamburukira pa nsampha, iye nkhabe dziwa kuti pyenepi pinancitisa kuluza umaso.+
24 Ananga, cincino ndibvesereni;Bveserani mwadidi mafala analonga ine.
25 Leka kutawirisa kuti ntima wako upeuke mbuenda munjira zace.
Leka kutayika mbuenda munjira zace,+
26 Thangwi nkazi unoyu acitisa kuti anthu azinji afe,+Pontho anthu adapha iye ndi azinji.+
27 Nyumba yace isatsogolera Munthumbi;*Iwo asatcitira ku mbuto inagumanika anyakufa.
Pidzindikiro Pyapantsi
^ Peno: “mwambo wanga.”
^ Fala na Fala: “wakunja.” Onani Misangani 2:16.
^ Fala na Fala: “wakunja.” Onani Misangani 2:16.
^ Peno: “akutapira.”
^ Fala na Fala: “Miyendo yace nkhabe kukhala.”
^ Peno: “katcunyuswa na maunyolo.”
^ Peno: “Seoli,” ndi kumasiye kunaikhwa anthu onsene. Onani Mabvekero a Mafala Anango.
