Misangani 29:1-27
29 Munthu anapitiriza kuumisa ntima wace pakumala kusandikwa kazinji kene,+Anadzafudzwa mwakucimbiza, mbasowa cidikhiro.+
2 Anyakulungama anganjipa, anthu asatsandzaya,Mbwenye anyakuipa angatonga, anthu asalira.+
3 Munthu anafuna udziwisi asatsandzayisa pai wace,+Mbwenye ule anafamba na maputa asabvunga mpfuma yace.+
4 Thangwi yaulungami, mambo asacitisa kuti dziko yace ikhale yakukhazikika,+Mbwenye munthu anatawira kudyekerwa asaifudza.
5 Munthu anasimba ndzace mwaciphamaso,Asanteyera nsampha toera amange miyendo yace.+
6 Madawo anacita nyakuipa ndi nsampha kuna iye,+Mbwenye munthu wakulungama asakhuwa mwakukomerwa, mbatsandzaya.+
7 Nyakulungama asadzudzumika thangwi ya udidi wa anyakutcerenga,+Mbwenye anyakuipa nkhabe napyo basa.+
8 Anthu analonga mwakudzikuza asapisa nzinda,+Mbwenye ale akuti ndi audziwisi asamalisa ukali.+
9 Munthu waudziwisi angaketesana na dzemwa,Dzemwa asalonga mwaukali, mbaseka pyace, natenepa munthu waudziwisi nkhabe kupuma.+
10 Mapanga asaida munthu wakusowa mulando,+Pontho iwo asafuna kupha munthu wakulungama.*
11 Dzemwa asapangiza kuipirwa kwace konsene,+Mbwenye munthu waudziwisi asapitiriza kukhala wakukhurudzika.+
12 Ntongi angabvesera uthambi,Atumiki ace onsene anadzakhala akuipa.+
13 Nyakutcerenga na ule anaponderera andzace ndi sawasawa:
Yahova ndiye anapasa umaso uwiri wawo ene.
14 Ntongi angatonga anyakutcerenga munjira yakulungama,+Umambo wace unakhala wakuwanga ndzidzi onsene.+
15 Ntcamu* na kusandika pisapasa udziwisi,+Mbwenye mwana anasiyiwa toera acite pyonsene pinafuna iye asapasa manyadzo mai wace.
16 Anyakuipa angathimizirika, uipi usathimizirikambo,Mbwenye anyakulungama anadzaona kufudzwa kwawo.+
17 Langa mwanako, natenepa iye anadzakupumisa;Pontho iye anadzakutsandzayisa kakamwe.+
18 Pangasoweka citsogolero ca Mulungu,* mbumba isatayika,+Mbwenye ale anabvera mwambo+ asakhala akutsandzaya.
19 Ntumiki nee asalangika na mafala basi,Thangwi maseze abvesese, iye nkhabe kubvera.+
20 Waona kale munthu analonga mbadzati kunyerezera?+
Dzemwa ali na cidikhiro kakamwe kupiringana iye.+
21 Khala ntumiki asapaswa utumbe kutomera mu uwana wace,Iye anadzakhala munthu wakukhonda kupereka takhuta.
22 Munthu anaipirwa mwakucimbiza asacitisa anthu kukhonda bverana;+Ule wakuti nkhabe nentsa kuipirwa asacita madawo mazinji.+
23 Kudzikuza kwa munthu kunacitisa kuti iye apwazwe,+Mbwenye ule anacepeseka anadzalemedzwa.+
24 Xamwali wa mbava asaidika ekhene.*
Iye asapangwa toera aende kalonge pinadziwa iye, mbwenye iye nkhabe kulonga cinthu.+
25 Kugopa pamaso pa anthu* ndi nsampha,+Mbwenye ule ananyindira Yahova anadzatsidzikizwa.+
26 Anthu azinji asaphemba toera kulonga na ntongi,Mbwenye ulungami usabuluka kuna Yahova.+
27 Munthu wakuipa ndi wakunyanyasa kuna anyakulungama,+Mbwenye ule anafamba munjira yakulungama ndi wakunyanyasa kuna munthu wakuipa.+
Pidzindikiro Pyapantsi
^ Munjira inango: “Mbwenye munthu wakulungama asatsidzikiza umaso wace.”
^ Peno: “kulanga.”
^ Peno: “Pangasoweka masomphenya.”
^ Peno: “asathabusika ekhene.”
^ Peno: “Kugopa anthu.”
