Misangani 25:1-28
25 Iyi ndi misangani inango ya Salomoni,+ idalembwa* na atumiki a Ezekiya+ mambo wa ku Yuda:
2 Mbiri ya Mulungu ndi kupitiriza kukoya cinthu ncibisobiso,+Mbiri ya amambo ndi kuonesesa mwadidi cinthu.
3 Ninga kudzulu ndi kutali, pontho bara* ndi yakuzika,Natenepa mphyakunentsa kubvesesa mitima ya amambo.
4 Bulusa pirombo pa parata,Natenepa iyo inadzacena kakamwe.+
5 Bulusa munthu wakuipa pamaso pa mambo,Mpando wace waumambo unadzakhazikika thangwi yaulungami.+
6 Leka kupasika mbiri pamaso pa mambo,+Pontho leka kukhala pakati pa akulu-akulu,+
7 Thangwi mphyadidi akupange ndiye kuti: “Bwera pano,”
Kupiringana akupwaze pamaso pa munthu wakulemedzwa.+
8 Leka kucimbiza kusumirana na ndzako,Thangwi unadzacitanji ndzako angapangiza kuti ndiwe adadawa?+
9 Cedza na ndzako toera mumalise nseru wanu,+Mbwenye leka kulonga pinthu pyacibisobiso pidapangwa iwe,*+
10 Gopa ule anakubvesera anakupasa manyadzo,Pontho nee unadzakwanisa kumalisa mphangwa zakuipa zidamwaza iwe.
11 Mafala analongwa pa ndzidzi wakuthema,Ndi ninga masau a ouro mu mbale ya* parata.+
12 Munthu waudziwisi angasandika munthu wakubvesesa,Asakhala ninga mphete ya ouro na nkufu wa ouro yadidi.+
13 Ntumiki wakukhulupirika kuna ale anantuma,Ndi ninga kutonthola kwa neve pa ntsiku yakubvuna,Thangwi iye asatsandzayisa mbuyace.*+
14 Munthu anagaya na muoni wakuti cipo aupereka,Ndi ninga makole na mphepo pyakuti nkhabe kubvumbisa madzi.+
15 Thangwi yakupirira, munthu anakwanisa kukhuya ntima wa ntongi,Pontho mafala adidi anakwanisa* kuswa gogodo.+
16 Ungagumana uci, dya unakwanisa iwe;Thangwi ungaudya kakamwe, unamalisira kutapika.+
17 Leka kuenda kazinji kene kunyumba kwa ndzako,Gopa iye ananeta na iwe, mbatoma kukuida.
18 Ule anapereka umboni wauthambi thangwi ya mʼbale wace,Ndi ninga munthu anaphekesa ndzace+ na martelo,* supada na pswimo yakutwa.
19 Kunyindira munthu wakukhonda kunyindirika mu ndzidzi wa nyatwa,Ndi ninga kutafuna na dzino yakubeduka peno kufamba na mwendo wakuti nee uli mwadidi.
20 Ule anaimbira nyimbo munthu adatsukwala,Ndi ninga munthu anadula nguwo pa ntsiku yakutonthola,Pontho ndi ninga kuikha vinagre mʼmunyu.+
21 Khala nyamalwa wako* ali na njala, mpase cakudya toera adye;Khala iye ali na nyota, mpase madzi toera amwe,+
22 Thangwi ungacita pyenepi ndi ninga ukugumanya makala a moto pa nsolo pace,*+Pontho Yahova anadzakupasa nkhombo.
23 Mphepo inabuluka kunkwiriro isabvumbisa madzi,Pontho lirimi inalonga mapsweda isacitisa anthu kuipirwa.+
24 Mphyadidi kukhala pankhomo ya ntsoi ya nyumba,Kupiringana kukhala nʼnyumba ibodzi ene na nkazi wanthonga.*+
25 Mphangwa zadidi zidabuluka ku dziko yakutali,Ndi ninga madzi akutonthola kuna munthu adaneta.+
26 Nyakulungama anatawira kunyengererwa na munthu wakuipa,Ndi ninga mphuno ya madzi yakuti iri na matope na ncera wakuti uli na madzi a mabvundu.
27 Si pyadidi tayu kudya maningi uci,+Pontho si pyadidi tayu munthu kusaka kupasika mbiri ekhene.+
28 Munthu wakuti nkhabe nentsa kuipirwa,*Ndi ninga nzinda wakuti mipanda yace yamala kufudzwa.+
Pidzindikiro Pyapantsi
^ Peno: “idakopiyarwi.”
^ Fala na Fala: “dziko yapantsi.”
^ Peno: “Mbwenye leka longa cibisobiso ca anango.”
^ Peno: “mu combo ca.”
^ Peno: “ntima wa mbuyace.”
^ Fala na Fala: “lirimi yadidi inakwanisa.”
^ Peno: “nyundo.”
^ Fala na Fala: “Khala ule anakuida.”
^ Pyenepi pisabveka kufewesa ntima wa munthu na kukhurudza kuipirwa kwace.
^ Peno: “nkazi anakhala mbadungunya.”
^ Peno: “Munthu wakucimwana kudzitonga.”
