Masalmo 81:1-16
Kuna nyakutsogolera nyimbo; inalonga pya Jitite.* Nyimbo ya Azafe.+
81 Khuwani mwakutsandzaya kuna Mulungu wakuti ndi mphambvu yathu.+
Khuwani mwakukomerwa kuna Mulungu wa Yakobe.
2 Tomani kuimba nyimbo, pontho kwatani pandero,Arpa yakuti isaimba nyimbo zadidi na pyakuimba napyo pya nkhambala.
3 Lizani nyanga pa ntsiku yakubalwa kwa mwezi,+Lizani nyanga pa ntsiku inaoneka mwezi wakudzala, thangwi ndi ntsiku ya phwando yathu.+
4 Thangwi unoyu ndi ntemo udapaswa Aizraeli,Ndi ntemo wa Mulungu wa Yakobe.+
5 Iye akhazikisa ntemo unoyu ninga cenjezo kuna Zuze+Mu ndzidzi ukhaenda iye kamenyana na dziko ya Ejitu.+
Ine ndabva fala* yakuti nee ndaidzindikira:
6 “Ine ndabulusa ntolo paphewa pace;+Ndakwata citundu cikhali mʼmanja mwace.
7 Mu ndzidzi wa nyatwa iwe wandicemera, ine mbandikupulumusa;+Ine ndakutawira mʼmakole akupswipa.*+
Ndakuyesera pa mbuto iri na madzi a ku Meribha.*+ (Sela)
8 Mbumba yanga ndibvesereni, pontho ine ndinakupangani pinanyerezera ine thangwi ya imwe.
Imwe Aizraeli, mbamudandibvera mbapidakhala mwadidi kakamwe.+
9 Pakati panu nee pasafunika kukhala mulungu wakukhonda dziwika,Pontho nee musafunika kulambira mulungu wa dziko inango.+
10 Ine Yahova, ndine Mulungu wanu,Ule adakubulusani mu dziko ya Ejitu.+
Fungulani mwadidi mulomo wanu toera ine ndikudyeseni mpaka kukhuta.+
11 Mbwenye mbumba yanga nee yabvera fala yanga;Aizraeli akhonda kundibvera.+
12 Natenepa, ine ndaasiya toera atowezere kuuma kwawo mitima;Iwo akhacita pikhanyerezera iwo kukhala pyadidi.*+
13 Mbumba yanga mbidandibvera,+Aizraeli mbadafamba munjira zanga!+
14 Ine mbandidakunda anyamalwa awo mwakucimbiza;Mbandidabweza djanja yanga toera kumenyana na anyamalwa awo.+
15 Ale anaida Yahova anadzabunyala pamaso pace thangwi yakugopa,Pontho, kufudzwa kwawo* kunadzakhala kwa kwenda na kwenda.
16 Mbwenye ine ndinadzakudyesa* tirigu yadidi kakamwe,*+Pontho ndinadzakukhutisa na uci wa pamwala.”+
Pidzindikiro Pyapantsi
^ Onani Mabvekero a Mafala Anango.
^ Peno “cilongero.”
^ Dzina ineyi isabveka “Kulongezana.”
^ Fala na Fala: “mbuto inabisala njazi.”
^ Fala na Fala: “Iwo akhacita pinthu mwakubverana na ndzeru zawo.”
^ Fala na Fala: “ndzidzi wawo.”
^ Fala na Fala: “ndinadzanʼdyesa,” pyenepi pisabveka, mbumba ya Mulungu.
^ Fala na Fala: “mafuta a tirigu.”
