Masalmo 75:1-10
-
Mulungu asatonga mwaulungami
-
Anyakucita pyakuipa anadzamwa piri nʼkhomitco ya Yahova (8)
-
Kuna nyakutsogolera nyimbo. Inalonga pya “Lekani Kundifudza.” Nyimbo ya Azafe.+
75 Tisapereka takhuta kuna imwe Mulungu, tisapereka takhuta kuna imwe;Dzina yanu iri dhuzi,+Pontho anthu asadziwisa mabasa anu akudzumisa.
2 Imwe musalonga: “Ndingakhazikisa ndzidzi,Ndisatonga mwaulungami.
3 Pidatetemera dziko yapantsi na onsene anakhala mwenemo,Ndine adalikhisa mizati yace.” (Sela)
4 Ine ndapanga anthu akudzikuza: “Lekani kugaya,”
Ndapangambo anthu anacita pyakuipa: “Lekani kukhala na nthuku thangwi ya mphambvu* zanu.
5 Lekani kukhala na nthuku ikulu thangwi ya mphambvu* zanuPeno kulonga mwakudzikuza.
6 Thangwi kulemedzwa kwa munthuNkhabe kubuluka kumabulukiro a dzuwa, kumadokero a dzuwa peno kunterero.
7 Mulungu ndi Ntongi.+
Iye asacepesa mʼbodzi mbakuza unango.+
8 Thangwi mʼmanja mwa Yahova muli na khomitco;+Vinyu yabvungazwa, pontho ikubuluka mapobvu.
Mwandimomwene iye anadzaikhuthula,Pontho anthu onsene anacita pyakuipa pa dziko yapantsi anadzaimwa yonsene mpaka thotho yakumalisa.”+
9 Mbwenye ine ndinadzadziwisa pinthu pyenepi kwenda na kwenda;Ndinaimba nyimbo zakusimba Mulungu wa Yakobe.
10 Thangwi iye asalonga: “Ndinadzamalisa mphambvu* zonsene za anyakucita pyakuipa,Mbwenye mphambvu* za anyakulungama zinadzathimizirika.”
