Masalmo 64:1-10
-
Kutsidzikizwa ku makunje akuipa
-
“Mulungu anadzaalasa” (7)
-
Kuna nyakutsogolera nyimbo. Nyimbo ya Dhavidhi.
64 Mulungu, ine ndingadembetera, bveserani fala yanga.+Tsidzikizani umaso wanga toera ukhonde kugopa nyamalwa.
2 Nditsidzikizeni ku makunje a anthu akuipa,+
Kuna mwinji wa anyakucita pyakuipa.
3 Iwo asanoza malirimi awo ninga supada;Iwo asalondeza mafala awo akuipa ninga mapswimo,
4 Iwo asalasa munthu wakusowa mulando kubulukira mʼmbuto zawo zakubisalira;Mwakukhonda dikhira iwo asamulasa nee kugopa.
5 Iwo asawangisira toera kucita pinthu pyakuipa pinafuna iwo;*Asabverana kuti anabisa tani misampha yawo.
Iwo asalonga: “Mbani anafuna kuiona?”+
6 Iwo asasaka njira zipswa toera kucita pinthu pyakuipa;Iwo asacita masasanyiro anewa akuipa mwacibisobiso;+Pinanyerezera ntima wa mʼbodzi na mʼbodzi wa iwo nkhabe dziwika.
7 Mulungu anadzaalasa;+Mwakukhonda dikhira iwo anadzalaswa na pswimo.
8 Pinalonga iwo ndipyo pinafuna kuacitisa kufudzwa;+Onsene anafuna kuona pyenepi anadzasukusa misolo yawo.
9 Penepo, anthu onsene anadzagopa,Iwo anadzadziwisa pidacita Mulungu,Pontho iwo anadzabvesesa pinthu pidacita iye.+
10 Anyakulungama anadzakomerwa thangwi ya Yahova, pontho iwo anadzathawira kuna iye;+Onsene ale ali na mitima yadidi anadzatsandzaya.
Pidzindikiro Pyapantsi
^ Peno: “Iwo asawangisana unango na ndzace toera kucita pinthu pyakuipa.”
