Masalmo 38:1-22
Nyimbo ya Dhavidhi toera anthu akumbukire.
38 Yahova lekani kundisandika uku mwaipirwa,Pontho lekani kundilanga uku mwaipirwa.+
2 Thangwi mapswimo anu andilasa nkati kakamwe,Pontho djanja yanu ikundilemera kakamwe.+
3 Manungo anga onsene akupha thangwi yakuipirwa kwanu.
Mʼmagogodo mwanga nkhabemo ntendere thangwi ya madawo anga.+
4 Thangwi madodo anga anjipa mpaka padzulu pa nsolo wanga;+Ninga ntolo wakulemera, ine ndisacimwana kuathukula thangwi ndi mazinji kakamwe.
5 Pironda pyanga pisanunkha, pontho pisabuluka utosi*Thangwi ya udzemwa wanga.
6 Ndiri wakudzudzumika na wakutsukwala kakamwe;Ntsiku yonsene ndisafamba wakutsukwala.
7 Ndikubva kupisa mʼmanungo mwanga;*Manungo anga onsene akupha.+
8 Ine ndaneta kakamwe, pontho mphambvu zanga zamaliratu;Ntima wanga wakutsukwala wandicitisa kubulira* kakamwe.
9 Yahova, imwe musadziwa pyonsene pinafuna ine,Pontho imwe musadziwa kubulira kwanga.
10 Ntima wanga ukudhima kakamwe, mphambvu zanga zamala,Maso anga nkhabe kuonabve.*+
11 Axamwali anga na andzanga asandicalira thangwi ya utenda wanga,Pontho axamwali anga apantima ali kutali na ine.
12 Ale anasaka umaso wanga anditeyera misampha;Ale anafuna kundicita pyakuipa, asalonga pyakundifudza;+Ntsiku yonsene iwo asacita masasanyiro toera kundinyengeza.
13 Mbwenye ninga dhrodhro, nee ndisabva;+Ninga bewewe, nee ndisafungula mulomo wanga.+
14 Ndadzakhala ninga munthu wakuti nkhabe kubva,Wakuti mulomo wace nkhabe kulonga cinthu toera kutsidzikizika.
15 Thangwi ine ndikhadikhira imwe Yahova,+Pontho imwe Yahova Mulungu wanga mwanditawira.+
16 Ine ndalonga: “Iwo mbaleke kutsandzaya thangwi ya inePeno kupasika mbiri manyalo anga angatherezeka.”
17 Thangwi ndikhadasala pangʼono toera kugwa,Pontho ndzidzi onsene ndikhabva kupha.+
18 Ndabweka madodo anga;+Ndikhanentseka thangwi ya madawo anga.+
19 Mbwenye anyamalwa anga ndi akuwanga* na amphambvu,*Ale anandiida mwakusowa mathangwi adzakhala azinji kakamwe.
20 Ndingacita pyadidi iwo akhandibwezera pyakuipa;Iwo andipingiza pikhawangisira ine kucita pinthu pyadidi.
21 Yahova, lekani kundisiya.
Mulungu, lekani kukhala kutali na ine.+
22 Ndiphedzeni mwakucimbiza,Imwe Yahova mpulumusi wanga.+
