Masalmo 22:1-31
Kuna nyakutsogolera nyimbo; inalonga pya “Mbawala Ikazi ya Mʼbambakuca.”* Nyimbo ya Dhavidhi.
22 Mulungu wanga, Mulungu wanga, thangwi yanji mwandisiya?+
Thangwi yanji nee mwabwera kudzandipulumusa,Thangwi yanji nee mwabva nʼkhuwo wa kubulira kwanga?+
2 Mulungu wanga, ine ndisakucemerani namasikati, mbwenye imwe nkhabe kunditawira;+Ngakhale namasiku, ine ndisapitiriza kukucemerani.
3 Mbwenye imwe ndimwe wakucena,+Imwe mwazungulirwa na Izraeli* wakuti asakusimbani.
4 Ambuyathu akhanyindira imwe;+Iwo akhakunyindirani, pontho imwe mukhaatawira.+
5 Iwo akhakhuwa kuna imwe, pontho akhapulumuswa;Iwo akhakunyindirani, pontho nee akhaphatiswa mwala.*+
6 Mbwenye ine ndine mpfunye, tayu munthu,Anthu asandisingirira,* mbindipwazwa na mbumba.+
7 Onsene anandiona asandisingirira;+Asandiseka mbasukusa misolo yawo mwakundipwaza mbalonga:+
8 “Iye aperekeka kuna Yahova. Natenepa Iye mbampulumuse!
Nakuti Mulungu akomerwa naye, Iye mbampulumuse!”+
9 Ndimwe adandibulusa mʼmimba mwa mai wanga,+Imwe mwanditsidzikiza mu ndzidzi ukhandiyamwisa mai wanga.
10 Kutomera ntsiku idabalwa ine, ndaperekwa mʼmanja mwanu toera munditsalakane;Imwe ndimwe Mulungu wanga kutomera ndzidzi ukhali ine mʼmimba mwa mai wanga.
11 Lekani kukhala kutali na ine, thangwi nyatwa ziri dhuzi+Pontho nkhabe munthu unango toera kundiphedza.+
12 Anangʼombe azinji andizungulira;+Ngʼombe zamphambvu za ku Bhasani zandizungulira.+
13 Izo zisafungula milomo yazo toera kundidya,+Ninga nkhalamu yakulira yakuti isakhwedzula nyama idaphata iyo.+
14 Ine ndathirirwa pantsi ninga madzi;Magogodo anga onsene amala lekana-lekana.
Ntima wanga usanyunguluka ninga upula*+Nkati mwa diti yanga.+
15 Ine nkhabebve mphambvu, basi ene ndasala ninga dzinga;+Lirimi yanga yaphatirira nkanwa mwanga;+Imwe mwandibweresa nʼdjenje toera ndife.+
16 Thangwi anambwa andizungulira;+Iwo andizungulira ninga pinacita nsoka wa mapanga,+Ninga nkhalamu, iwo akuluma manja anga na manyalo anga.+
17 Ine ndinakwanisa kulengesa magogodo anga onsene.+
Anyamalwa anga asandiona, mbapitiriza kundiyangʼana.
18 Iwo agawana nguwo zanga,Pontho acita pyakulotera thangwi ya nguwo yanga.+
19 Mbwenye imwe Yahova, lekani kukhala kutali na ine.+
Imwe ndimwe mphambvu yanga, bwerani mudzandiphedze mwakucimbiza.+
20 Ndipulumuseni toera ndikhonde kuphiwa na supada,Pulumusani umaso wanga wakufunika kakamwe* mʼmanyalo* mwa anambwa;+
21 Ndipulumuseni nkanwa mwa nkhalamu,+ pontho toera ndikhonde kulaswa na nyanga za nyati;Nditawireni, pontho ndipulumuseni.
22 Ine ndinadzadziwisa dzina yanu kuna abale anga;+Pakati pa mpingo ine ndinadzakusimbani.+
23 Imwe anagopa Yahova, nsimbeni!
Imwe monsene a dzindza* ya Yakobe, mpaseni mbiri!+
Mulemedzeni imwe monsene a dzindza* ya Izraeli.
24 Iye nee afunga maso ace toera akhonde kuona kuthabuka kwa munthu anapondererwa;+Iye nee amʼbisira nkhope yace.+
Pidakhuwa iye toera kuphemba ciphedzo, iye amubva.+
25 Ndinakusimbani mu mpingo ukulu;+Ndinadzakwanirisa mapikiro anga pamaso pa ale anakugopani.
26 Anthu akucepeseka* anadzadya mbakhuta;+Ale anasaka Yahova anadzansimba.+
Khalani na umaso* kwenda na kwenda.
27 Anthu onsene pa dziko yonsene yapantsi anadzakumbuka Yahova mbabwerera kuna iye.
Misoka yonsene ya madzindza inadzagodama pamaso panu.+
28 Yahova ndi Mambo;+Iye asatonga madzindza onsene.
29 Anthu onsene akupfuma* pa dziko yapantsi anadzadya mbanʼgodamira;Onsene ale anaenda kupfumbi anadzagodama pamaso pace;Nee mʼbodzi wa iwo anakwanisa kupulumusa umaso wace.
30 Dzindza* yawo inadzantumikira;Ubalwi wantsogolo unadzapangwa pya Yahova.
31 Iwo anadzalonga pya mabasace akulungama.
Iwo anadzalonga pinthu pinacita iye kuna anthu anafuna kubalwa.
Pidzindikiro Pyapantsi
^ Panango ndi ntundu unango wa maimbiro.
^ Peno: “mwakhazikiswa pa mpando waumambo pakati pa Aizraeli.”
^ Peno: “nee akhapaswa manyadzo.”
^ Peno: “asandipasa manyadzo.”
^ Panango unoyu ndi upula unacitwa na nyuci toera kukoya uci. Upula unoyu nkhabe nentsa kunyunguluka.
^ Fala na Fala: “wakupambulika,” akhalonga pya umaso wace.
^ Fala na Fala: “mʼmanja.”
^ Fala na Fala: “mbeu.”
^ Fala na Fala: “mbeu.”
^ Peno: “akukhurudzika; akupfulika; akumatama.”
^ Fala na Fala: “ntima wanu mbukhale mʼmaso.”
^ Fala na Fala: “akukhuma.”
^ Fala na Fala: “mbeu.”
