Masalmo 146:1-10
146 Simbani Yahova!*+
Umaso wanga onsene mbusimbe Yahova.+
2 Ine ndinadzasimba Yahova mu umaso wanga onsene.
Ndinadzaimba nyimbo zakusimba Mulungu wanga mu ndzidzi unakhala ine mʼmaso.
3 Lekani kunyindira atsogoleri*Nee mwana wa munthu wakuti nkhabe kwanisa kupulumusa.+
4 Mphambvu yace ya umaso isabuluka,* iye mbabwerera kumataka;+Pa ntsiku ineyi, manyerezero ace onsene asamala.+
5 Nyakutsandzaya ndi ule wakuti mʼphedzi wace ndi Mulungu wa Yakobe,+Ule wakuti asadikhira Yahova Mulungu wace,+
6 Ule adacita kudzulu na dziko yapantsi,Bara na pinthu pyonsene piri mwenemo,+Ule wakuti ndi wakukhulupirika ndzidzi onsene,+
7 Ule anacitira ulungami anyakupondererwa,Ule anapasa cakudya ale anabva njala.+
Yahova asabulusa ale ali nkaidi.*+
8 Yahova asafungula maso a maboliboli;+Yahova asalamusa ale adakotama;+Yahova asafuna anthu akulungama.
9 Yahova asatsidzikiza anthu akudza;Iye asatsalakana ana aumphawi* na akazi azice,*+Mbwenye asapingiza masasanyiro a anyakucita pyakuipa.*+
10 Yahova anadzakhala Mambo kwenda na kwenda,+Iwe Sioni, Mulungu wako anadzatonga mu ubalwi na ubalwi.
Simbani Yahova!*
Pidzindikiro Pyapantsi
^ Peno: “Aleluya!” Fala na Fala: “Yah.” Yah ndi dzina ya Yahova ingalembwa mwacigwagwa.
^ Peno: “atongi.”
^ Peno: “Nzimu wace usabuluka.”
^ Fala na Fala: “ale adamangwa.”
^ Peno: “ana adaferwa na pai.”
^ Peno: “nkazi adaferwa na mamunace.”
^ Peno: “asagongonyesa njira za anyakucita pyakuipa.”
^ Peno: “Aleluya!” Fala na Fala: “Yah.” Yah ndi dzina ya Yahova ingalembwa mwacigwagwa.
