Masalmo 140:1-13
Kuna nyakutsogolera nyimbo. Nyimbo ya Dhavidhi.
140 Yahova, ndipulumuseni kuna anthu anacita pyakuipa;Nditsidzikizeni kuna anthu anacita pyauphanga,+
2 Nditsidzikizeni kuna ale anacita masasanyiro akuipa mʼmitima mwawo,+Pontho akuti ntsiku zonsene asasosa nthonga.
3 Iwo asanoza malirimi awo mbakhala ninga a nyoka;+
Pamulomo pawo pana venenu ninga ya nyoka.+ (Sela)
4 Yahova, nditsidzikizeni mʼmanja mwa ale anacita pyakuipa;+Nditsidzikizeni kuna ale anacita pyauphanga,Kuna ale ananditeyera nsampha toera ndigwe.
5 Anthu akudzikuza asandibisira nsampha;Iwo asakwata nkhambala mbanditeyera ukonde* nʼkhundu mwa njira.+
Iwo asanditeyera misampha.+ (Sela)
6 Ine ndalonga kuna Yahova: “Imwe ndimwe Mulungu wanga.
Yahova, bveserani kudembetera kwanga toera kuphemba ciphedzo.”+
7 Imwe Yahova, Mbuya Wankulu Kakamwe, Mpulumusi wanga wamphambvu,Imwe musanditsidzikiza* pa ntsiku ya nkhondo.+
8 Yahova, lekani tawirisa kuti anyakucita pyakuipa acite pinafuna iwo.
Lekani tawirisa kuti pyakuipa pinanyerezera iwo piafambire mwadidi, toera iwo akhonde kudzikuza.+ (Sela)
9 Pinthu pyakuipa pinalonga ale adandizunguliraMbapigwere pa misolo pawo.+
10 Mbabvumbirwe na makala akugaka moto.+
Mbaponywe pa moto,Mbaponywe mʼmadjenje akuzika*+ toera akhonde kulamuka pontho.
11 Nyapsweda mbaleke kugumana mbuto pa dziko yapantsi.+
Uipi mbutowerere ale anacita pyauphanga toera kuafudza.
12 Ine ndisadziwa kuti Yahova anadzatsidzikiza anthu akucepeseka,Pontho anadzacitira ulungami anthu akutcerenga.+
13 Mwandimomwene anthu akulungama anadzasimba dzina yanu;Anthu adidi anadzakhala patsogolo panu.*+
Pidzindikiro Pyapantsi
^ Peno: “malitcera akusodza nawo ntsanga.”
^ Fala na Fala: “mwatsidzikiza nsolo wanga.”
^ Peno: “mʼmadjenje a madzi.”
^ Peno: “anadzakhala pana imwe.”
