Masalmo 101:1-8

  • Ntongi anacita pinthu mwakukhulupirika

    • ‘Ine nkhabe kulekerera munthu wakudzikuza’ (5)

    • “Ine ndinadzayangʼana anthu akukhulupirika” (6)

Nyimbo ya Dhavidhi. 101  Ine ndinadzaimba thangwi ya ufuni wakukhonda mala na ulungami. Yahova, ine ndinadzaimba nyimbo toera kukusimbani.  2  Ndinacita pinthu mwandzeru, pontho mwakusowa mulando.* Munabwera lini kudzandiphedza? Ine ndinakubverani na ntima wanga onsene+ nkati mwa nyumba yanga.  3  Ine nkhabe kudzayangʼana na maso anga pinthu pyakusowa basa. Ine ndisaida pinacita ale anasiya kucita pinthu pyadidi;+Nee ndinafendedzera pyakuipa pinacita iwo.  4  Ine ndisakhala kutali na munthu ali na ntima wakuipa;Ine nkhabe kutawira* kucita pyakuipa.  5  Ule analonga andzace psweda,+Ine ndinadzamʼmatamisa.* Munthu wakugaya na wakudzikuza,Ine nee ndinadzapirira pinacita iye.  6  Ine ndinadzayangʼana anthu akukhulupirika a pa dziko yapantsi,Toera iwo adzakhale pabodzi na ine. Munthu wakusowa mulando* anadzanditumikira.  7  Nee munthu mʼbodzi ananyengeza andzace anadzakhala panyumba panga,Pontho nee munthu mʼbodzi analonga uthambi anadzalimira pamaso panga.*  8  Ntsiku zonsene namacibese ndinadzapha* anthu akuipa pa dziko yapantsi,Toera kumalisa anyakucita pyakuipa onsene mu nzinda wa Yahova.+

Pidzindikiro Pyapantsi

^ Peno: “mwakukhulupirika.”
^ Fala na Fala: “kudziwa.”
^ Peno: “ndinadzanfudza.”
^ Peno: “Munthu wakukhulupirika.”
^ Fala na Fala: “anadzalimira patsogolo pamaso anga.”
^ Peno: “ndinadzafudza.”

Copyrights for this publication