Mabasa a Apostolo 27:1-44
27 Pidatongwa ife toera kuenda ku Italya+ na bote, Paulu na anyankaidi anango aperekwa kuna nkadamu wa anyankhondo anacemerwa Julyo wa nsoka wa anyankhondo a Augusto.*
2 Takwira bote ya ku Adhrameto ikhafuna kuenda mʼmagombe a nʼkhundu-nʼkhundu mwa bara ku provinsya ya Azya. Ife tatoma ulendo wathu, tikhali pabodzi na Aristarko+ adabuluka ku Masedhonya mu nzinda wa Tesalonika.
3 Mangwana mwace ife tatsama ku Sidhoni, kweneko Julyo apangiza kukoma ntima kwace kuna Paulu, mbantawirisa kuti aende kuna axamwali ace toera iwo akwanise kuntsalakana.
4 Kweneko ife takwira bote mbatipita cifupi na ntsuwa ya Xipre idatitsidzikiza ku mphepo ikhabuluka kunaenda ife.
5 Buluka penepo, tapita na pakati pa bara nʼkhundu-nʼkhundu mwa dziko ya Silisya na Panfilya mbatitsama ku gombe ya Mira mu dziko ya Lisya.
6 Kweneko nkadamu wa anyankhondo agumana bote ya ku Alexandriya ikhaenda ku Italya, iye atikwiza mwenemu.
7 Pidapita ntsiku zizinji mbatikafamba pangʼono-pangʼono, tafika mwakunentseka ku Kinidho. Pidacimwana ife kuenda kutsogolo thangwi ya mphepo, tapita dhuzi na ku Salmone toera ntsuwa ya Kreta ititsidzikize.
8 Pidafamba ife mwakunentseka nʼkhundu-nʼkhundu mwa ntsuwa, tafika pa mbuto inacemerwa Magombe Adidi, yakuti ikhali dhuzi na nzinda wa Lazeya.
9 Kweneko takhalako ntsiku zizinji, mbwenye pikhali pyakugopswa kucita ulendo na bote thangwi jejuu* ya Ntsiku Yakuphimbira Madawo+ ikhadapita, penepo Paulu aacenjeza:
10 “Amunamwe, ndisaona kuti tingapitiriza na ulendo uyu tinadzaluza pinthu pizinji, nee tinadzaluza mitolo na bote basi, mbwenye panango tinadzaluzambo umaso wathu.”
11 Ngakhale tenepo, nkadamu wa anyankhondo abvera pidalonga nyakufambisa bote na mwanaciro bote, mbapwaza pidalonga Paulu.
12 Nakuti gombe ineyi nee ikhali yakuthema toera kumala ndzidzi onsene wa khoni, azinji aphedzera maonero akuti mbapidakhala pyadidi abuluke pa mbuto ineyi toera aone khala mbadakwanisa kufika ku Fenisya. Fenisya ikhali gombe ya ku Kreta yakuti kumabulukiro a dzuwa, khundu ibodzi ikhayangʼanira kunkwiriro, khundu inango ikhayangʼanira kunterero.
13 Mphepo yakunterero pikhatoma iyo kumenya pangʼono-pangʼono, iwo anyerezera kuti unoyu ukhali ndzidzi toera kucita pikhafuna iwo. Natenepa, iwo abulusa nangula mbaenda na nʼkhundu-nʼkhundu mwa ntsuwa ya Kreta.
14 Pidapita ndzidzi ungasi, yatoma mphepo ikulu inacemerwa Eurakilo* ikhabuluka ku ntsuwa.
15 Nakuti mphepo ineyi ikhamenya kakamwe bote, ife tikhacimwana kuenda kutsogolo kukhabuluka mphepo; na thangwi ineyi, ife tasiya kucapa toera bote ikwekwetwe na mphepo.
16 Natenepa, ife tapita na nʼkhundu-nʼkhundu mwa ntsuwa ingʼono inacemerwa Kaudha toera titsidzikizike; ngakhale tenepo, ife tanentseka kakamwe toera kutsidzikiza bote* ingʼono idamangirwa nduli mwa bote.
17 Mbwenye pidamala iwo kukwiza bote ingʼono mʼbote, amanga bote na nkhambala toera kuitsidzikiza. Nakuti akhagopa kutcerera mʼmatcetca a ku Sirti,* iwo agwisa nkhambala zinango toera kubweza nguwo zinafambisa bote, mbatoma kukwekwetwa na mphepo.
18 Nakuti tikhamenywa kakamwe na condzi, mangwana mwace iwo atoma kutaya mitolo mʼmadzi toera bote ilulupirwe.
19 Pa ntsiku yacitatu, iwo ataya na manja awo pyombo pinango pyakufambisa napyo bote.
20 Pidamala ife ntsiku zizinji nee kuona dzuwa nee nyenyezi, mbatikamenywa na condzi cikulu, tatoma kuluza cidikhiro consene cakuti mbatidapulumuka.
21 Pidamala iwo ntsiku zizinji nee kudya cinthu, Paulu alimira pakati pawo mbalonga: “Amunamwe, mbamudabvera uphungu udakupangani ine toera tikhonde kubuluka ku gombe ya Kreta, nee mbatidathabuka na nyatwa zinaona ife mbatiluza pinthu tenepa.+
22 Ngakhale tenepo, ine ndisakuwangisani toera mukhale na cipapo, thangwi nee mʼbodzi wa imwe anadzafa, mbwenye bote inaluzika.
23 Masiku, anju+ wa Mulungu wanga analambira ine aonekera pana ine,
24 mbalonga: ‘Paulu, leka kugopa. Iwe usafunika ulimire pamaso pa Sezari.+ Pontho, Mulungu anadzapulumusa iwe na anthu onsene ali paulendo pabodzi na iwe.’
25 Natenepa khalani na cipapo amunamwe, thangwi ine ndisakhulupira Mulungu kuti pinadzacitika sawasawa ninga mudapangirwa ine.
26 Mbwenye bote yathu iyi, inadzalobzweka cifupi na ntsuwa inango.”+
27 Tamala ntsiku 14 masiku na masikati mbatikaponywa na mphepo uku na uku mʼBara ya Adhriya. Pa tcititciti, anyakufambisa bote anyerezera kuti tikhali cifupi na ntunda.
28 Iwo apima kuzika kwa madzi mbaona kuti akhali metru 36. Pidafamba iwo pangʼono kuenda kutsogolo, apima pontho mbaona kuti akhali metru 27.
29 Nakuti akhagopa kuti panango bote mbidadhimika pa miyala, iwo aponya nangula zinai zikhali nduli mwa bote, mbadikhira kuti kunja kuce mwakucimbiza.
30 Mbwenye anyakufambisa bote ayesera kuthawa. Iwo atcitisa bote ingʼono mʼbara mbacita ninga asafuna aende kagwisa nangula ziri kudomu yakutsogolo kwa bote.
31 Paulu adzindikira pyenepi mbapanga nkadamu wa anyankhondo na anyankhondo kuti: “Amuna awa angakhonda kupitiriza mʼbote ino, imwe nee munapulumuka.”+
32 Natenepa, anyankhondo agwanda nkhambala za bote ingʼono mbaisiya toera iende.
33 Cifupi na kuca kunja, Paulu awangisa onsene toera adye, mbaapanga: “Mpaka lero, zapita ntsiku 14 mbamukadikhira, mu ntsiku zenezi imwe nee mwadya cinthu.
34 Natenepa, ine ndisakuwangisani toera mudye, pyenepi pinakuphedzani kakamwe; thangwi nee mʼbodzi wa imwe anadzaluza tsisi ibodzi ya munsolo mwace.”*
35 Pidamala iye kulonga pyenepi, akwata nkate, apereka takhuta kuna Mulungu pamaso pa onsene, buluka penepo augwanda mbatoma kudya.
36 Penepo onsene akhala na cipapo, mbatomambo kudya.
37 Tonsene mʼbote tikhali anthu akukwana 276.
38 Pidamala iwo kudya mbakhuta, atoma kutaya tirigu mʼmadzi toera bote ilulupirwe.+
39 Pidaca kunja, iwo nee akhakwanisa kudzindikira mbuto ikhali iwo,+ mbwenye aona ntunda ukhali na matcetca, natenepa iwo anyerezera kuti pingakwanisika aende katsamisa bote kweneko.
40 Natenepa, iwo agwanda nkhambala, nangula mbazigwera mʼbara, mu ndzidzi ubodzi ene asudzula nkhambala za nguwo inafambisa bote. Pidamala iwo kufuthula nguwo yakutsogolo kwa bote toera akwanise kukwatwa na mphepo, iwo atoma kuenda kuntunda.
41 Bote yatcerera pidadhima iyo matcetca akhali pantsi pa madzi mʼbara. Domu yakutsogolo yapita mʼmatcetca mbicimwana kubuluka, mbwenye mabimbi akhamenya domu ya nduli mbitoma kusweka.+
42 Natenepa, anyankhondo anyerezera kupha anyankaidi onsene gopa angasambirira, anathawa.
43 Mbwenye nkadamu wa anyankhondo akhafuna kakamwe kupulumusa Paulu, mbaakhondesa kucita pikhafuna iwo. Iye alonga kuti ale anadziwa kusambirira mbatome ndiwo kugwera mʼmadzi toera aenda kuntunda,
44 adasala mbadatowera nduli: Anango mbadakwira matabwa, anangombo mbadakwira mapindi a bote. Natenepa, onsene akwanisa kupulumuka mbafika mwadidi kuntunda.+
Pidzindikiro Pyapantsi
^ Augusto nee ndi dzina ya munthu, mbwenye ndi cidzo ca ntongi wa dziko ya Roma.
^ Ineyi ndi jejuu ya Ntsiku Yakulekererwa Madawo, ikhacitwa pa mwezi wa Tisri, wakuti ndi khundu ya Setembro na Outubro, unoyu ndi ndzidzi ukhatoma kubvumba madzi, pontho mʼbara mukhali na mabimbi kakamwe.
^ Ineyi ndi mphepo ikhabuluka kunkwiriro.
^ Ineyi ndi bote ingʼono ikhaphatisirwa toera kupulumusa anthu bote ingalobzweka.
^ Onani Mabvekero a Mafala Anango.
^ Peno: “nee mʼbodzi wa imwe anadzafa.”