Dheuteronomyo 32:1-52
32 “Bveserani imwe muli kudzulu, ine ndinalonga,Imwe muli pa dziko yapantsi, bveserani mafala a pamulomo panga.
2 Cipfundziso canga cinadzagwa ninga madzi akubvumba;Mafala anga anagwa ninga bume,Ninga madzi anabvumba mwapangʼono-pangʼono pa tsanga,Pontho ninga madzi mazinji anabvumbira thongwe.
3 Thangwi ndinalonga dzina ya Yahova.+
Dziwisani ukulu wa Mulungu wathu!+
4 Iye ndi Mwala, pyonsene pinacita iye ndi pyakulungama,+Thangwi njira zace zonsene ndi zakulungama.+
Mulungu wakukhulupirika,+ wakuti cipo asacita pinthu pyakukhonda kulungama;+Iye ndi wadidi na wakulungama.+
5 Adacita pinthu pyakuipa ndiwo.+
Iwo nee ndi anace, cilema ndi cawo.*+
Iwo ndi dzindza yakuipa na yakunyengeza!+
6 Kodi musafunika kutsalakana Yahova munjira ineyi,+Imwe mbumba yaupswiru na yakusowa ndzeru?+
Kodi iye ndi Pai wanu adakubalani,+Ule adakucitani mbakukhazikisani mwakuwanga?
7 Kumbukani midzidzi yakale;Nyerezerani pidacitika mu pyaka pyanduli.
Bvundza pai wako, iye anakupanga;*+Bvundza akulu pakati pako, iwo anakufokotozera.
8 Pidapereka Wamphambvu Zonsene unthaka+ kuna dzindza ibodzi na ibodzi,Pidamwaza iye mʼbodzi na mʼbodzi wa ana a Adhamu,*+Iye akhazikisa madire a anthu+Mwakubverana na kunjipa kwa mbumba ya Izraeli.+
9 Mbumba ya Yahova ndi khundu yace;+Yakobe ndi unthaka wace.+
10 Iye anʼgumana mucisa ca thando,+Nʼthando yakusowa pinthu, inalira pinyama pya ntsanga.+
Iye anzungulira toera kuntsidzikiza, mbantsalakana,+Iye antsidzikiza ninga diso yace.*+
11 Ninga capungu anapfundzisa anace kumburuka,Mbafuthulira anace maphapido,Asathasika maphapido ace toera kuakwata,Mbaathukula mʼmanthenga ace,+
12 Yahova ndiye basi akhantsogolera;*+Nee mulungu mʼbodzi wa madzindza anango akhali na iye.+
13 Iye anfambisa padzulu pa mapiri a dziko yapantsi,+Mbakwanisa kudya pidabuluswa mʼmunda.+
Anʼdyesa uci wa pamwala,Na mafuta a azeti adabuluka pamwala,*
14 Mantega a nkaka wa ngʼombe na nkaka wa mabira,Pabodzi na mabira adidi kakamwe,Mabira a ku Bhasani na mabokho,Pabodzi na tirigu yadidi kakamwe;+Pontho, iye ampasa vinyu ya ciropa ca mauva toera amwe.
15 Yesuruni* pidakhuma iye, asandukira mbuyace mbamʼbhutsula.
Inde, iwe wakhuma, wakhala na mphambvu, mbukhuta mwakupiringana midida.+
Na thangwi ineyi, iye asiya Mulungu adancita,+
Mbapwaza Mwala wacipulumuso cace.
16 Asosa ukali wace thangwi ya alungu anango;+Iwo akhantsukwalisa na pinthu pyakunyanyasa.+
17 Akhapereka ntsembe kuna madimonyo, tayu kuna Mulungu,+Kuna alungu akuti iwo nee akhaadziwa,Alungu apswa, adaoneka kwene cincino,Alungu akuti ambuyanu nee akhaadziwa.
18 Iwe waduwala Mwala+ udakubala,Mbuduwala Mulungu adakubala.+
19 Yahova pidaona iye pyenepi, aakhonda+Thangwi anace amuna na akazi antsukwalisa.
20 Natenepa iye alonga: ‘Ndinaabisira nkhope yanga,+Ndinaona pinafuna kuacitikira.
Thangwi iwo ndi dzindza yakuipa,+Ana akukhonda khulupirika.+
21 Iwo asosesa ukali wanga thangwi ya cinthu cakuti nee ndi mulungu;+Anditsukwalisa na madzimunthu awo akusowa basa.+
Inembo ndinaacitisa kukhala na bibvu thangwi ya anthu akuti nee ndi mbumba;+Ndinaatsukwalisa na dzindza yakusowa ndzeru.+
22 Thangwi kuipirwa kwanga kwagasa moto,+Wakuti unagaka mpaka pantsi kakamwe pa Nthumbi,+Unadzameza dziko na pinthu pinabuluka pa mataka,Pontho unadzagasa pantsi padatoma mapiri.
23 Ndinadzathimizira nyatwa zawo;Mbandiaponyera mapswimo anga onsene.
24 Iwo anadzaneta* na njala+Anadzafa thangwi yakuferuka mwakupiringana midida, mbafudzwa mwakutsukwalisa.+
Ndinadzatumiza pikala toera pialume,+Na venenu ya pinyama pinafamba na mimba.
25 Kunja, anawo anadzaphiwa na supada;+Nkati iwo anaphatwa na kugopa kakamwe,+Pyenepi pinacitika kuna aphale na atsikana ene,Kuna anapiana na ankhalamba* ene.+
26 Ine mbidalonga kuti: “Ndinaabalalisa;Ndinacitisa kuti akhonde kukumbukirwa pontho pakati pa anthu,”
27 Mbidakhonda kugopa pinafuna kucita anyamalwa,+Thangwi anyamalwa mbadabvesesa mwakuphonyeka.+
Iwo mbadalonga kuti: “Takwanisa kuwina na mphambvu zathu;+Si Yahova tayu adacita pinthu pyenepi pyonsene.”
28 Thangwi iwo ndi mbumba yakusowa ndzeru,*Pakati pawo nkhabe ali na luso yakudzindikira.+
29 Mbadakhala anthu audziwisi,+ iwo mbadanyerezera mwadidi pyenepi!+
Mbadanyerezera pinafuna kuacitikira.+
30 Pinakwanisika tani kuti munthu mʼbodzi athamangise anthu 1.000,Anthu awiri athamangise anthu 10.000?+
Nkhabe kwanisika; pinacitika basi ene khala aguliswa na Mwala wawo+Yahova mbaapereka kuna anyamalwa awo.
31 Thangwi mwala wawo wasiyana na Mwala wathu,+Ngakhale anyamalwa athu asadziwa pyenepi.+
32 Thangwi iwo ndi ninga munda wa mauva wa ku Sodhoma,Na minda ya mʼmapiri a ku Gomora.+
Mauva awo ndi mauva akuti ali na venenu,Matsandzo a mauva awo ndi akuwawa.+
33 Vinyu yawo ndi ninga nyongo ya nyoka,Venenu yakupha ya nyoka zakugopswa.
34 Kodi ine nee ndakoya pyenepi,Mbandipifungira na selo ncikwa canga?+
35 Kubwezera ndi kwanga; ine ndinadzabwezera,+Pa ndzidzi wakuthema unafuna kutherezeka miyendo yawo,+Thangwi ntsiku inafuna kuoneswa iwo nyatwa iri dhuzi,Pontho pire pinafuna kuacitikira pinabwera mwakucimbiza.’
36 Thangwi Yahova anadzatonga mbumba yace,+Iye anabvera ntsisi atumiki ace,+Angaona kuti mphambvu zawo zapunguka,Kuti adasala ndi anthu akusowa citsidzikizo* na akusowa mphambvu.
37 Penepo iye anadzalonga: ‘Ali kupi alungu awo,+Mwala udathawira iwo toera kusaka citsidzikizo,
38 Alungu akuti akhadya mafuta a ntsembe zawo,
Mbamwa vinyu ya ntsembe zawo za pyakumwa?+
Mbabwere toera akuphedzeni.
Mbakhale mbuto yanu yakubisalira.
39 Cincino onani kuti ine ndine Mulungu,*+Nkhabepo Mulungu unango kusiyapo ine.+
Ine ndisapha, ine ndisapasa umaso.+
Ine ndisaphekesa,+ pontho ndinadzawangisa,+Nkhabe anakwanisa kuombola munthu mʼmanja mwanga.+
40 Thangwi ine ndisalamusa manja anga kudzulu,Mbandidumbira: “Ninga ine ndiri na umaso kwenda na kwenda,”+
41 Ndinganoza supada yanga yakuyetimira,Ndingakhunganya manja anga toera kutonga,+Ine ndinadzabwezera anyamalwa anga,+Mbandibwezera ale anandiida.
42 Mapswimo anga ndinaaledzeresa na ciropa,Supada yanga inadzadya nyama,Inamwa ciropa ca ale adaphiwa na ca ale adaendeswa ku ubitcu,Mbidya misolo ya atsogoleri a anyamalwa.’
43 Imwe anthu a madzindza onsene,+ tsandzayani pabodzi na mbumba yace,Iye anadzabwezera anyamalwa thangwi ya ciropa ca atumiki ace,+Anadzatcunyusa anyamalwa ace,+Mbacenesa* madawo a dziko ya mbumba yace.”
44 Penepo Mose abwera mbalonga mafala onsene a nyimbo ineyi pamaso pa mbumba,+ iye pabodzi na Ozeya*+ mwana wa Nuni.
45 Pidamala Mose kulonga mafala anewa onsene kuna mbumba yonsene ya Izraeli,
46 iye aapanga: “Nyerezerani mafala onsene a cenjezo inakupasani ine lero,+ toera mupange ananu kuti abvere mafala onsene a Mwambo uyu.+
47 Thangwi mafala anewa nee ndi akusowa basa kuna imwe, mbwenye mungaabvera munakhala na umaso,+ pontho mungabvera mafala anewa, munakhala na umaso mu ntsiku zizinji mu dziko inafuna kupita imwe mungawambuka nkulo wa Yordani.”
48 Yahova alonga na Mose pa ntsiku ineyi, mbampanga:
49 “Kwira paphiri iyi ya Nebho+ inagumanika mucisa ca Abharimu+ mu dziko ya Moabhe; ona dziko ya Kanani inafuna kupasa ine Aizraeli ninga unthaka wawo.+
50 Buluka penepo, iwe unadzafa paphiri inafuna kukwira iwe, mbugumanyizwa pabodzi na ambuyako, ninga mudafa Aroni mʼbale wako Paphiri ya Ori,+ mbagumanyizwa na ambuyace,
51 thangwi imwe uwiri wanu nee mwakhala akukhulupirika kuna ine pakati pa Aizraeli, ku Kadhesi pa madzi a ku Meribha+ kuthando ya Zini, thangwi imwe nee mwandicenesa* pamaso pa mbumba ya Izraeli.+
52 Iwe unadzaona dziko ineyi nakutali, mbwenye nee unadzapita mu dziko inafuna kupasa ine mbumba ya Izraeli.”+
Pidzindikiro Pyapantsi
^ Peno: “madodo ndi awo.”
^ Peno: “anakufokotozera.”
^ Munjira inango: “dzindza ya anthu.”
^ Peno: “ninga mboni ya diso yace.”
^ Akhatsogolerwa ndi Yakobe.
^ Peno: “mwala wa libwe.”
^ Dzina ineyi isabveka “Wakulungama”; ndi cidzo toera kulemedza Izraeli.
^ Peno: “anadzamala mphambvu.”
^ Peno: “na anyaimbvi.”
^ Munjira inango: “yakukhonda kubvera uphungu.”
^ Peno: “akupwazika; akusowa ciphedzo.”
^ Fala na Fala: “ine ndine iye.”
^ Peno: “anadzabulusa.”
^ Ineyi ikhali dzina yakutoma ya Yoswa. Ozeya ndi cigwagwa ca dzina ya Ozaya, yakuti isabveka “Adapulumuswa na Yahova; Yahova Apulumusa.”
^ Peno: “mwandilemedza; mwandipasa mbiri.”
