Tsamba Kuna Akristu a ku Efeso 3:1-21
3 Na thangwi ineyi, ine Paulu, ndiri nkaidi+ thangwi ya Kristu Yezu, pontho thangwi yakufuna kuphedza imwe anthu a madzindza anango . . .*
2 Mwandimomwene, imwe mwabva kuti ine ndapaswa basa yakutsalakana+ kukoma ntima kukulu kwa Mulungu toera kukuphedzani,
3 pontho kuti iye andipangiza cibisobiso cace cakucena ninga mudakulemberani ine kale mwacigwagwa.
4 Natenepa, mungaleri pyenepi, imwe munakwanisa kudzindikira kuti ine ndisabvesesa mwadidi cibisobiso cakucena+ cinalonga pya Kristu.
5 Cibisobiso ceneci nee cikhadapangizwa kuna anthu a mʼmidzidzi yakale ninga munapangizwa ico cincino kuna apostolo ace akucena na aprofeta ace kubulukira mu nzimu wakucena,+
6 kuti mwakuphatana na Kristu Yezu, pontho kubulukira mu mphangwa zadidi, anthu a madzindza anango anakhalambo anyakutambira unthaka, mbakhala makhundu a manungo mabodzi ene,+ mbadikhirambo pikiro idacitirwa ife.
7 Ine ndadzakhala ntumiki wa cibisobiso ceneci thangwi ya kukoma ntima kukulu kwa Mulungu. Iye andipasa muoni* unoyu kubulukira mu mphambvu yace.+
8 Ine munthu wangʼono kakamwe kupiringana munthu wangʼono pakati pa anthu onsene akucena,+ ndapangizwa kukoma ntima kukulu+ toera ndimwaze mphangwa zadidi kuna anthu a madzindza anango zinalonga pya mpfuma zakukhonda kulengeseka za Kristu,
9 pontho ndiphedze anthu onsene toera aone kuti Mulungu, ule adacita pinthu pyonsene asaphatisira tani cibisobiso cakucena+ cikhakoya iye mu pyaka pizinji.
10 Cifuniro ca pyenepi ndi toera kubulukira mu mpingo,+ cincino maumambo na mautongi mu mbuto zakudzulu adziwiswe pya makhundu akusiyana-siyana a udziwisi ukulu wa Mulungu.+
11 Pyenepi pisabverana na cifuniro cakukhonda mala cidakhazikisa iye thangwi ya Kristu+ Yezu Mbuyathu,
12 kubulukira mwa iye, ife tiri na ufulu wakulonga, mbatikwanisa kufendedzera Mulungu mwakusudzuka,+ pontho na cinyindiro consene thangwi yakukhulupira kwathu Kristu.
13 Natenepa, ine ndisakuphembani toera mukhonde kubwerera nduli* pakuona nyatwa zinapirira ine thangwi ya imwe, thangwi izo zisabweresa mbiri kuna imwe.+
14 Na thangwi ineyi, ine ndisagodama pamaso pa Baba,
15 wakuti ndiye adapasa dzina mabanja onsene kudzulu na pa dziko yapantsi.
16 Ine ndisaphembera kuna Mulungu toera kubulukira mu mbiri yace ikulu,+ iye aphatisire mphambvu ya nzimu wace wakucena toera kuwangisa mitima yanu na manyerezero anu,
17 toera kubulukira mu cikhulupiro canu, Kristu akhale mʼmitima yanu pabodzi na ufuni.+ Khalani na mitcitci,+ pontho khalani akuwanga pa mbuto idamangwa cikhulupiro canu,+
18 toera imwe pabodzi na anthu onsene akucena mukwanise kubvesesa mwadidi ugugumi, ulaphi, cengo na kuzika,
19 mbamudziwa ufuni wa Kristu,+ wakuti ndi ukulu kupiringana cidziwiso, toera imwe mudzale na makhaliro onsene anapereka Mulungu.
20 Ule, wakuti mwakubverana na mphambvu yace inaphata basa muna ife,+ anakwanisa kucita pizinji kakamwe kupiringana pinthu pyonsene pinaphemba ife peno pinanyerezera ife,+
21 mbapaswe mbiri kubulukira mu mpingo, pontho kubulukira mwa Yezu Kristu mu ubalwi onsene,* kwenda na kwenda. Ameni.
Pidzindikiro Pyapantsi
^ Pisaoneka kuti mafala a vesi ineyi asapitiriza pa vesi 14.
^ Peno: “muoni wakukhonda lipa.”
^ Peno: “lekani kufewa manungo.”
^ Peno: “mʼmidzidzi yonsene.”
