Kronika Waciwiri 4:1-22
4 Buluka penepo, iye acita guwa ya nkuwa+ ya makhono* 20 aulaphi, makhono 20 augugumi na makhono 10 a cengo.
2 Iye acita Tanki ya madzi*+ ya utale wakunyunguluswa. Tanki ineyi ikhali yakubulungika, khundu yapadzulu ikhali na makhono khumi, ikhali na makhono maxanu a cengo, pontho toera kupima tanki ineyi pakhafunika nkhambala ya makhono 30 toera kuizungulira.+
3 N’khundu monsene mwa padzulu pa Tanki, aikhamo pyakubalikisa pyakubulungika.+ Pa khono ibodzi pikhalipo khumi kuzungulira tanki yonsene. Pyakubalikisa pyenepi pikhali m’mizera miwiri, pontho pikhadaumbwa pa tanki ineyi.
4 Tanki ineyi ikhadasandzikwa pa ng’ombe zimuna 12+ za nkuwa. Ng’ombe zitatu zikhayang’ana kunkwiriro, zitatu zikhayang’ana kumadokero a dzuwa, zitatu zikhayang’ana kunterero, zitatu zikhayang’ana kumabulukiro a dzuwa. Tanki* ineyi ikhali padzulu pa ng’ombe zenezi, pontho matako onsene a ng’ombe zenezi akhali pakati pa tanki.
5 Mphindza ya Tanki ikhali ya ugugumi wa djanja;* mulomo wa Tanki ukhadacitwa ninga wa khomitco, pontho ukhadacitwa ninga maluwa. Tanki ineyi ikhapita mabhato* akukwana 3.000 a madzi.
6 Kusiyapo pyenepi, iye acita mabasiya khumi; aikha maxanu kukhundu yamadyo ya nyumba, anango maxanu aaikha kukhundu yabzwere.+ M’mabasiya anewa iwo akhatsuka na kukamulira pinthu pyonsene pikhaperekwa ninga ntsembe zakupiswa.+ Mbwenye anyantsembe akhasamba madzi a mu Tanki.*+
7 Iye acita pyakuikhira nyale pya ouro+ mwakubverana na pitsogolero,+ mbapiikha mu templo, pixanu kukhundu yamadyo, pixanu kukhundu yabzwere.+
8 Iye acitambo meza khumi mbaziikha mu templo, zixanu kukhundu yamadyo, zixanu kukhundu yabzwere;+ pontho acita mbale 100 za ouro.
9 Buluka penepo, iye acita thando*+ ya anyantsembe,+ thando ikulu+ na misuwo ya thando ikulu, mbakhwaza nkuwa m’misuwo ineyi.
10 Iye aikha Tanki kunterero,+ kukhundu yamadyo ya nyumba.
11 Iramu acitambo pyakubulusa napyo dotha, mafoxolo na mbale.+
Natenepa, Iramu amala kucitira Mambo Salomoni basa yonsene panyumba ya Mulungu wandimomwene:+
12 Mizati miwiri*+ na pyakubalikisa pyakulandana na mbale pyakuti pikhali padzulu pa mizati ineyi; pinthu piwiri pyakulandana na malitcera+ toera kugudumira pyakubalikisa piwiri pyakulandana na mbale pyakuti pikhali padzulu pa mizati;
13 maromaa 400+ toera kuaikha pa pinthu piwiri pyakulandana na malitcera, mizera miwiri ya maromaa pa cinthu cibodzi na cibodzi cakulandana na malitcera toera kugudumira pyakubalikisa napyo piwiri pyakulandana na mbale pyakuti pikhali padzulu pa mizati;*+
14 ngolo khumi na mabasiya khumi akhali pa ngolo+ zenezi;
15 Tanki* na ng’ombe 12 zakuti zikhali pantsi pa Tanki;+
16 pyombo pyakubulusa napyo dotha, mafoxolo, magarfu+ na pyombo pinango pyonsene. Iramu-Abhi+ acitira Mambo Salomoni pinthu pyenepi na nkuwa wakuyetimira toera apiikhe n’nyumba ya Yahova.
17 Mambo Salomoni apisasanyisa na pyakuumba napyo pya dongo ku dhistritu ya Yordani, pakati pa Sukoti+ na Zaredha.
18 Salomoni acita pyombo pyenepi pizinji kakamwe, pontho nee akwanisa kupima nkuwa thangwi ukhadanjipa kakamwe.+
19 Salomoni acita pyombo pyonsene+ pya n’nyumba ya Mulungu wandimomwene: Guwa ya ntsembe ya ouro;+ meza+ toera kuikhirapo mikate ya ntsembe;*+
20 pyakuikhira nyale na nyale zace za ouro yadidi kakamwe,+ toera zipitirize kugaka nkati mwa nyumba mwakubverana na pitsogolero;
21 maluwa, nyale na pyakuthimisa napyo moto, pya ouro; ouro yadidi kakamwe;
22 pyakuthimisa napyo moto, mbale, makhomitco na pyakupalira moto, pyonsene pikhali pya ouro yadidi kakamwe. Mbuto yakupita nayo n’nyumba, misuwo yankati toera kupita mu Mbuto Yakucena Kakamwe+ na misuwo ya templo, pyonsene pikhadacitwa na ouro.+
Pidzindikiro Pyapantsi
^ Khono ibodzi ndi masentimetru 44 na hafu. Onani Apendise B14.
^ Fala na Fala: “acita Bara.”
^ Fala na Fala: “Bara.”
^ Masentimetru 7,4. Onani Apendise B14.
^ Bhato ibodzi ikhapita malitru 22. Onani Apendise B14.
^ Fala na Fala: “m’Bara.”
^ Peno: “thambwe; kintalo.”
^ Peno: “Matcikhwa mawiri.”
^ Peno: “matcikhwa.”
^ Fala na Fala: “Bara.”
^ Fala na Fala: “mikate yacipangizo.”
