Kronika Waciwiri 3:1-17
3 Penepo Salomoni atoma kumanga nyumba ya Yahova+ mu Yerusalemu Paphiri ya Moriya,+ padaonekera Yahova kuna Dhavidhi+ pai wace Salomoni, pa mbuto idakhunganya Dhavidhi pa mbuwa ya Ornani,+ Muyebusi.
2 Iye atoma kumanga nyumba ineyi pa ntsiku yaciwiri ya mwezi waciwiri wa caka cacinai ca utongi wace.
3 Nyumba ineyi ya Mulungu wandimomwene yakuti Salomoni aikha miyala pantsi toera kuimanga ikhali na makhono 60 aulaphi na makhono 20 augugumi,+ mwakubverana na n’dida wakale.*
4 Khonde ikhali kutsogolo kwa templo ikhali na makhono 20 aulaphi, akuti akhali sawasawa na ugugumi wa nyumba. Cengo cace cikhali 120,* nkati mwace iye akhwazamo ouro yadidi kakamwe.+
5 Mapfufu* a mbuto ikulu* iye aaphimbira na matabwa a junipero, buluka penepo aakhwaza ouro yadidi kakamwe,+ pidamala iye alembamo pinthu pyakulandana na micindu+ na pinango pyakulandana na maunyolo.+
6 Kusiyapo pyenepi, iye abalikisa nyumba ineyi na miyala ya ntengo ukulu.+ Pontho ouro idaikha iye ikhali ouro+ ya ku Parvaimu.
7 Iye akhwaza ouro+ nyumba ineyi: M’mitanda ya pantsoi, m’matabwa a n’khundu mwa misuwo na m’misuwo ene, m’mapfufu iye alembamo akerubhi.+
8 Iye asasanya Mbuto Yakucena Kakamwe;+ ulaphi wace ukhali sawasawa na ugugumi wa nyumba, makhono 20 aulaphi, ugugumi wace ukhalimbo makhono 20. Mbuto ineyi aikhwaza ouro yadidi kakamwe+ yakukwana matalento* 600.
9 Ouro idaphatisira iye toera kucita maperego ikhalemera masiklo* 50. Iye akhwazambo ouro m’makwartu a ndzulu.
10 Buluka penepo, iye asasanya akerubhi awiri mu Mbuto Yakucena Kakamwe, mbaakhwaza ouro.+
11 Ulaphi onsene wa maphapido a akerubhi+ ukhali makhono 20; phapido ibodzi ya kerubhi wakutoma ikhali na makhono maxanu, ikhagwentsa kupfufu ya nyumba, phapido inango ya makhono maxanu ikhagwentsa phapido ya kerubhi unango.
12 Phapido ya kerubhi unango ikhali ya makhono maxanu ikhagwentsa pfufu inango ya nyumba, phapido yace inango ikhali ya makhono maxanu ikhagwentsa phapido ya kerubhi wakutoma.
13 Akerubhi anewa akhadafuthula maphapido awo mbakwana makhono 20, iwo akhali dzololo, nkhope zawo mbaziyang’ana nkati.*
14 Iye acitambo nguwo ikulu+ ya usalu wa bhurumu, yakucitwa na maweya a mabira akukhwazwa pinthu pyakufuirira, usalu wakufuira na nguwo yadidi kakamwe, mbaisonera pinthu pyakubalikisa napyo pyakulandana na akerubhi.+
15 Buluka penepo asasanya mizati* miwiri+ kutsogolo kwa nyumba, cengo cace cikhali makhono* 35, cakubalikisa naco ca nzati ubodzi na ubodzi cikhali na makhono maxanu.+
16 Iye asasanya maunyolo akulandana na mikufu, mbaaikha padzulu pa mizati,* pontho asasanya pyakubalikisa napyo pyakukwana 100 pyakulandana na misapo ya roma, mbapiikha m’maunyolo anewa.
17 Iye aikha mizati ineyi kutsogolo kwa templo, ubodzi kukhundu yamadyo,* unango kukhundu yabzwere;* ukhali kukhundu yamadyo aupasa dzina ya Yakini,* ukhali kukhundu yabzwere aupasa dzina ya Bhoazi.*
Pidzindikiro Pyapantsi
^ Khono ibodzi ndi masentimetru 44 na hafu, mbwenye anango asatawira kuti “n’dida wakale” ukhali wa masentimetru 51,8. Onani Apendise B14.
^ Nkhabe dziwika khala apima na makhono peno pinango.
^ Ineyi ndi Mbuto Yakucena.
^ Peno: “Maparedhi.”
^ Talento ibodzi ikhalemera makilu 34,2. Onani Apendise B14.
^ Siklo ibodzi ikhalemera magrama 11,4. Onani Apendise B14.
^ Nkati mwa Mbuto Yakucena.
^ Peno: “matcikhwa.”
^ Khono ibodzi ndi masentimetru 44 na hafu. Onani Apendise B14.
^ Peno: “matcikhwa.”
^ Peno: “kunterero.”
^ Peno: “kunkwiriro.”
^ Dzina ineyi isabveka “Iye [wakuti ndi Yahova] Mbakhazikise Mwakuwanga.”
^ Panango dzina ineyi isabveka “Mu Mphambvu.”
