Samweli Wakutoma 29:1-11
-
Afilisti nee anyindira Dhavidhi (1-11)
29 Afilisti+ agumanya anyankhondo awo onsene ku Afeki, mu ndzidzi wakuti Aizraeli akhadamanga misasa yawo dhuzi na mphuno ya madzi ya ku Yezrieli.+
2 Atongi a Afilisti akhapita na misoka yawo ya anyankhondo 100 na ya anyankhondo 1.000, pontho Dhavidhi na amuna akhali na iye akhabwera nduli mwawo pabodzi na Akisi.+
3 Mbwenye atsogoleri a Afilisti abvundza: “Thangwi yanji Ahebheri awa ali pano?” Akisi atawira atsogoleri a Afilisti: “Uyu ndi Dhavidhi ntumiki wa Mambo Sauli wa Izraeli, iye ali na ine mu caka cibodzi peno kupiringana.+ Kutomera pa ntsiku idabwera iye kuna ine mpaka lero, nkhabe cakuipa cidaona ine kuna iye.”
4 Mbwenye atsogoleri a Afilisti aipirwa kakamwe na iye, mbampanga: “Panga mamuna unoyu toera abwerere+ ku mbuto idampasa iwe. Leka kuntawirisa kuenda kunkhondo na ife gopa anatisandukira mu ndzidzi wa nkhondo.+ Kodi pinakwanisika kuti iye akhale wakutawirika kuna mbuyace mbakhonda kupha amuna ali na ife?
5 Kodi unoyu si Dhavidhi tayu wakuti akhaimbirwa, pontho anthu akhambvinira mbalonga:
‘Sauli apha anyamalwa 1.000,Mbwenye Dhavidhi apha anyamalwa 10.000’?”+
6 Natenepa Akisi+ acemera Dhavidhi mbampanga: “Ndiri kudumbira mu dzina ya Yahova Mulungu wa mʼmaso kuti iwe ndiwe munthu wakulungama, pontho ndiri wakutsandzaya thangwi yakubwera kwako kunkhondo pabodzi na anyankhondo anga.+ Kutomera pa ntsiku idabwera iwe kuna ine mpaka lero,+ nkhabe cakuipa cidaona ine kuna iwe. Mbwenye atongi a Afilisti nkhabe kukunyindira.+
7 Natenepa bwerera muntendere, pontho leka cita cinthu cakuti cinatsukwalisa atongi a Afilisti.”
8 Mbwenye Dhavidhi abvundza Akisi: “Thangwi yanji? Ninji pidacita ine? Ine ntumiki wanu ndakudawisiraninji kutomera pa ntsiku idafika ine mpaka lero? Thangwi yanji nee ndisafunika kuenda na imwe kamenyana na anyamalwa a mbuyanga mambo?”
9 Akisi atawira Dhavidhi: “Kwa ine, iwe ndiwe munthu wadidi ninga anju wa Mulungu.+ Mbwenye atsogoleri a Afilisti alonga: ‘Lekani kuntawirisa aende na ife kunkhondo.’
10 Mangwana beserani kakamwe toera muende, iwe pabodzi na atumiki a mbuyako adabwera na iwe; mungaona kuti kunja kwaca, lamukani muende.”
11 Natenepa Dhavidhi na amuna akhali na iye alamuka namacibese kakamwe toera abwerere ku dziko ya Afilisti, mbwenye Afilisti aenda ku Yezrieli.+
