Kronika Wakutoma 23:1-32
23 Pidakalamba Dhavidhi, mbasala pang’ono toera kufa, iye akhazikisa mwanace Salomoni toera akhale mambo wa Izraeli.+
2 Buluka penepo, iye acemeresa atsogoleri onsene a Izraeli,+ anyantsembe na Alevi.+
3 Alevi akhali na pyaka 30 kuenda kutsogolo alengeswa;+ onsene adalengeswa akhali 38.000.
4 Mwa iwo, 24.000 akhayang’anira basa panyumba ya Yahova, pontho pakhali na atsogoleri na anyakutonga miseru 6.000,+
5 pakhalimbo anyakuonera misuwo 4.000,+ pontho pakhali na anthu 4.000 akhasimba+ Yahova na pyakuimba napyo, pidalonga Dhavidhi kuti: “Ndapicita toera kusimba napyo Mulungu.”
6 Buluka penepo, Dhavidhi agawa misoka+ mwakubverana na ana a Levi: Jersoni, Kowati na Merari.+
7 Ana a Jersoni akhali Ladhani na Simei.
8 Ana a Ladhani akhali atatu: Jeiyeli, Zetamu na Yoeli.+
9 Ana a Simei akhali atatu: Selomoti, Azieli na Arani. Anewa akhali atsogoleri a madzindza a Ladhani.
10 Ana a Simei akhali Yaati, Zina, Yeusi na Bheriya. Anewa akhali ana anai a Simei.
11 Yaati akhali ntsogoleri, Ziza akhali waciwiri. Nakuti Yeusi na Bheriya nee abala ana amuna azinji, alengeswa ninga anthu a dzindza ibodzi ene akuti akhaphata basa ibodzi ene.
12 Ana a Kowati akhali anai: Amiramu, Izari,+ Ebhroni na Uzieli.+
13 Ana a Amiramu akhali Aroni+ na Mose.+ Mbwenye Aroni na anace asankhulwa*+ toera kuphata basa pa Mbuto Yakucena Kakamwe, toera apereke ntsembe pamaso pa Yahova na kuntumikira, pontho toera ndzidzi onsene+ alonge mafala akupasa nkhombo mu dzina yace.
14 Mbwenye Mose ntumiki wa Mulungu wandimomwene, anace akhaoniwa ninga a dzindza ya Alevi.
15 Ana a Mose akhali Jersoni+ na Eliezeri.+
16 Mwa ana a Jersoni, Sebhueli+ akhali ntsogoleri.
17 Mwa ana a Eliezeri, Reabhiya+ akhali ntsogoleri; Eliezeri nee abala ana anango, mbwenye Reabhiya abala ana azinji kakamwe.
18 Mwa ana a Izari,+ Selomiti+ akhali ntsogoleri.
19 Ana a Ebhroni akhali Yeriya wakuti akhali ntsogoleri, waciwiri akhali Amariya, wacitatu akhali Yaaziyeli, wacinai akhali Yekamiamu.+
20 Ana a Uzieli+ akhali Mika wakuti akhali ntsogoleri, waciwiri akhali Isiya.
21 Ana a Merari akhali Mali na Musi.+ Ana a Mali akhali Eleazare na Kisi.
22 Eleazare afa, mbwenye nee abala ana amuna, basi ene abala ana akazi. Natenepa, ana a Kisi akuti akhali abale awo, ndiwo adaasemba.
23 Ana a Musi akhali atatu: Mali, Edheri na Yeremoti.
24 Anewa akhali ana a Levi mwakubverana na mbumba zawo, mwakubverana na atsogoleri a mbumba zawo. Iwo alengeswa mbalemberwa madzina awo kutomera ale akhali na pyaka 20 kuenda kutsogolo toera aphate basa panyumba ya Yahova.
25 Dhavidhi akhadalonga: “Yahova Mulungu wa Izraeli apasa ntendere* mbumba yace,+ pontho iye anakhala mu Yerusalemu kwenda na kwenda.+
26 Natenepa Alevi nee anadzafunikabve kuthukula tabhernakulo na pyombo pinaphatisirwa pakulambira.”+
27 Mwakubverana na pitsogolero pyakumalisa pidapereka Dhavidhi, alengeswa Alevi akuti akhali na pyaka 20 kuenda kutsogolo.
28 Basa yawo ikhali kuphedza ana a Aroni+ toera kutumikira panyumba ya Yahova, kutsalakana thando* ya tabhernakulo,+ masala akudyera, kucenesa pinthu pikhaphatisirwa pa mbuto yakucena na mabasa anango onsene akhafunika kucitwa panyumba ya Mulungu wandimomwene.
29 Iwo akhaphedza kukhunganya mikate ya ntsembe,*+ ufa wadidi kakamwe toera kupereka ntsembe za pyakudya, mikate yakuphapatika yakusowa pyakutupisa,+ mikate yakuotcwa ya ufa wakubvungazwa na mafuta a azeti+ na midida yonsene yakupima nayo pinthu.
30 Ntsiku zonsene namacibese,+ pontho namaulo iwo akhafunika kupereka takhuta na kusimba Yahova.+
31 Iwo akhaphedza ndzidzi onsene ukhaperekwa ntsembe zakupiswa kuna Yahova m’Masabudu,+ pa ntsiku yakubalwa kwa mwezi+ na m’midzidzi ya maphwando+ mwakubverana na pidalembwa mu mwambo, iwo akhacita pyenepi ndzidzi onsene pamaso pa Yahova.
32 Iwo akhatsalakanambo mabasa awo pa nsasa wa nsonkhano, pa mbuto yakucena na kuphedza ana a Aroni, akuti akhali abale awo, pakuphata mabasa panyumba ya Yahova.
Pidzindikiro Pyapantsi
^ Fala na Fala: “aikhwa pakhundu.”
^ Fala na Fala: “apumisa.”
^ Peno: “kintalo; thambwe.”
^ Fala na Fala: “mikate yacipangizo.”
