Talukilani kuya kubintu bili mukati

Talukilani kuya kubintu bing'ana byakusala

Talukilani kuya kumitwi yankani

Bakamboni ba Yehova

Cisoli

Makani Aina Kufumina Kuli Lesa!

 Ciiyo 11

Inga Milawo ya Lesa Ikute Kutunyamfwa Aconi?

Inga Milawo ya Lesa Ikute Kutunyamfwa Aconi?

Ito tulayandanga kwamba eti twinshibe nshila yaina, inga makani ancine-ncine amu Baibolo inga atunyamfwa aconi?—MASALIMO 36:9.

1. Nimulandu cini tulayandikinga kutanguninwa?

Mulengi wetu ukute mano kutupita afwe. Eti Mushali waina, ukute kutushako mano. Lesa liya kutulenga kwamba eti katulisalila byakwinsa. (Yeremiya 10:23) Eti bana ncobakute kuyanda kutanguninwa nebashali babo, nenjafwe tulayandikinga kutanguninwa ne Lesa. (Yesaya 48:17, 18) Colwe cikute kufuma kuli Lesa nimilawo yamu Baibolo ikute kututangunina.—Belengani 2 Timoteyo 3:16.

Milawo ya Lesa ikute kutuyisha nshila yaina yotwelela kukonka lino kayi ikute kutulesha ncetwela kucana bintu byaina bitapu kuntangu. Pakwinga Lesa ewalatulenga, twelela kumunyumfwila nekumulekela kwamba eti katutangunina.—Belengani Masalimo 19:7, 11; Chivumbulutso 4:11.

2. Inga Maswi a Lesa akute kutunyamfwa aconi?

Makani naamo amu Baibolo akute kutulesha ncetwela kwinsa mumikalilo yashiyana-shiyana. Koma milawo naimo nkaikute kupita pambali, ikute kutwambila ncetwela kwinsa mubwikalo ubo. (Deuteronomo 22:8) Twelela kusebensesha mano kwamba eti tubone makani naamo amu Baibolo ncalatwambilinga eti encetwelela kwinsa mubwikalo ubo. (Miyambo 2:10-12) Mucikoshano, Baibolo ikute kuyisha eti buyumi nicabupe kufumina kuli Lesa. Makani aya inga atutangunina mpotuli kuncito, kung’anda kayi nepabulwendo. Makani aya akute kutunyamfwa kwamba eti tusale cena nshila.—Belengani Machitidwe 17:28.

3. Nimilawo cini ibili isuniki maningi?

Yesu walaamba milawo ibili isuniki maningi. Mulawo wakutanguna ukute kutulesha Lesa ncalalengela bantu, walabalenga kwamba eti bamwinshibe, bamuyande, kayi nekumusebensela cakushomeka.  Katutana tusala cili conse cakwinsa twelela kuyeya mulawo wakutanguna. (Miyambo 3:6) Abo bakute kukonka mulawo uyu wakutanguna, bakute kuba banendi Lesa, nibakacane buyumi butapu, kayi nekukondwa kwancine-ncine.—Belengani Mateyo 22:36-38.

Mulawo wacibili inga utunyamfwa kwamba eti katunyumfwana nebantu bashiyana-shiyana. (1 Akorinto 13:4-7) Kwamba eti tucikonshe kukonka mulawo uyu wacibili, twelela kwiya Lesa ncakute kubabona bantu.—Belengani Mateyo 7:12; 22:39, 40.

4. Inga milawo ya Lesa ikute kutunyamfwa aconi?

Milawo ya Lesa ikute kuyisha mikowa kwamba eti kaili yekatana kayi kaili yasunana. (Akolose 3:12-14) Maswi a Lesa kayi akute kwinyamfwa kupitila mukuyisha makani aya asuniki maningi—bantu bebana belela kuba pamo kwacindi conse.—Belengani Genesis 2:24.

Kukonka ncoikute kuyisha Baibolo inga kutunyamfwa mubuyumi bwetu bonse. Mucikoshano, beshikwingisha incito tunkanda twinji bakute kuyanda basebenshi bakute kukonka milawo yamu Baibolo ikute kwamba shakushomeka kayi nekutaba batolo. (Miyambo 10:4, 26; Aheberi 13:18) Maswi a Lesa akute kutuyisha eti nkatulayandikinga kuba nebintu bingi kayi akute kutwambila eti twelela kushako mano maningi kubucibusa bwetu ne Lesa kupita bintu byonse byamucishi.—Belengani Mateyo 6:24, 25, 33; 1 Timoteyo 6:8-10.

Kukonka milawo yamu Baibolo inga kutunyamfwa kuba nebuyumi bwaina. (Miyambo 14:30; 22:24, 25) Mucikoshano, kukonka mulawo wa Lesa ukute kukanisha kukolewa, inga kutunyamfwa kwamba eti tutakolwa malwashi eshikushina kayi nekubintu bikute kwinshika mwakutenshiba. (Miyambo 23:20) Yehova ukute kutusuminisha kunwa bwalwa pang’ana owa. (Masalimo 104:15; 1 Akorinto 6:10) Milawo ya Lesa ikute kutunyamfwa kwamba eti katutainshi bintu byaipa kayi katutayeye bintu byaipa. (Masalimo 119:97-100) Nacikaba ico, Bakilisitu bancine-ncine nkabakute kukonka milawo ya Lesa kwamba eti bacane bintu byaina owa. Bakute kukonka milawo ya Lesa kwamba eti kabamulemeka Yehova.—Belengani Mateyo 5:14-16.