Talukilani kuya kubintu bili mukati

Talukilani kuya kubintu bing'ana byakusala

Talukilani kuya kumitwi yankani

Bakamboni ba Yehova

Cisoli

Makani Aina Kufumina Kuli Lesa!

 Ciiyo 14

Nimulandu Wacani Lesa Ukute Likoto?

Nimulandu Wacani Lesa Ukute Likoto?

1. Nimulandu wacani Lesa walababunganya bana ba Isilayeli bakeendi?

Lesa walabunganya bamukowa wa Abulahamu kwamba eti cibe cishi kayi walabapa nemilawo. Cishi ici walacikuwa eti “Isilayeli” kayi walacisala eti kacipaila munshila yancine-ncine kayi nekusebensesha maswi akendi. (Masalimo 147:19, 20) Emulandu wakendi bantu beshi kufuma mubishi byonse bali kuyakucana colwe kupitila mu Isilayeli.—Belengani Genesis 22:18.

Lesa walasala bana ba Isilayeli kuba bakamboni bakendi. Makani akeendi akute kwamba sha bana ba Isilayeli, akute kulesha bantu mobelela kucanina colwe banyumfwilanga milawo ya Lesa. (Deuteronomo 4:6) Emulandu wakendi kupitila mubana ba Isilayeli, bantu nabamo balikucikonsha kumwinshiba Lesa wancine-ncine.—Belengani Yesaya 43:10, 12.

2. Inga nimulandu wacani Bakilisitu bancine-ncine bekatana?

Mukupita kwacindi, Lesa walabakana bana ba Isilayeli nekusala libungano lya Bakilisitu. (Mateyo 21:43; 23:37, 38) Pakwinga Lesa walabakana bana ba Isilayeli, Yehova walasala Bakilisitu bancine-ncine kuba bakamboni bakendi.—Belengani Machitidwe 15:14, 17.

Yesu walababunganya beshikwiya bakendi kwamba eti kabashimikila kayi nekupanga beshikwiya mubishi byonse. (Mateyo 10:7, 11; 24:14; 28:19, 20) Mumasuba ano amapwililisho abintu byamucishi, incito iyi nayoyo ili pepi kupwa. Kufumina keendi, Yehova lino labunganya mamiliyoni abantu beshi kufuma mubishi byashina-shiyana kwamba eti kabapaila mucancine-ncine. (Chivumbulutso 7:9, 10) Bakilisitu bancine-ncine bekatana kwamba eti banyamfwanenga. Mucishi conse capanshi, nkabakute kushiyana mbyobakute kwiya kufumina mu Baibolo kulibungano lyabo.—Belengani Aheberi 10:24, 25.

  3. Inga libungano lya Bakamboni ba Yehova bamasuba ano lyalatatika lilyoni?

Muma 1870, libungano ling’ana lya beshikwiya Baibolo lyalatatika kwinshiba makani ancine-ncine amu Baibolo. Bali kabenshi eti Yesu wali kukute libungano lya Bakilisitu kwamba eti kalishimikila, emulandu wakendi balatatika incito yakushimikila mubishi byashiyana-shiyana. Mu caka ca 1931 balatatika kusebensesha lina lya Bakamboni ba Yehova.—Belengani Machitidwe 1:8; 2:1, 4; 5:42.

4. Inga Bakamboni ba Yehova bekatana aconi?

Mumwanda wakutanguna, mabungano a Bakilisitu bonse mubishi byashiyana-shiyana alikunyamfwiwa nelikoto linga’na lyalikusuminisha eti Yesu Emutwi walibungano. (Machitidwe 16:4, 5) Cimo-cimo nemasuba ano, Bakamboni ba Yehova pacishi conse capanshi bakute kunyamfwiwa ne Likoto Lishikutangunina lyabamakulene benshibila. Likoto lyepele ili likute kulangilila incito ikute kwinshika kumaofesi amisampi akute kusandulula, kupulinta, kayi nekuyaba mabuku akute kwamba sha Baibolo mumilaka yapitilila pa 600. Kupitila mukusebensesha Baibolo, Likoto Lishikutangunina likute kucikonsha kuyuminisha nekutangunina mabungano apitilila pa 100,000 cishi conse capanshi. Mulibungano lili lyonse muli batuloba bakute kwinsa incito nashimo nshobakute kusebensa eti bamakulene na beshikulangilila. Batuloba aba bakute kushako mano kulitanga lya Lesa.—Belengani 1 Petulo 5:2, 3.

Bakamboni ba Yehova bekatana kwamba eti kabashimikila makani aina kayi nekupanga beshikwiya. Eti intumwi, tukute kushimikila kung’anda neng’anda. (Machitidwe 20:20) Tukute kuyisha Baibolo kubantu basuni cancine-ncine. Bakamboni ba Yehova ntelyo likoto owa, nimukowa ukute Mushali waina. Twense tobandume nenkashi bakute kushilana mano. (2 Atesalonika 1:3) Pakwinga bantu ba Yehova bekatana kwamba eti kabakondwelesha Lesa nekunyamfwa banabo, emumukowa muli kukondwa kupita mikowa yonse yapacishi capanshi.—Belengani Masalimo 33:12; Machitidwe 20:35.