Talukilani kuya kubintu bili mukati

Talukilani kuya kumitwi yankani

Bakamboni ba Yehova

Salani cishobo Cisoli

 Ciiyo 5

Inga Lesa Walalengela Cani Cishi Capanshi?

Inga Lesa Walalengela Cani Cishi Capanshi?

1. Inga Lesa walalengela cani cishi capanshi?

Yehova walapa cishi capanshi kubantu. Nimunshi wetu. Ici cilaambanga eti bantu bakutanguna bene Adamu ne Eva baliyawa kulengwa eti bakaisushe bantu kwilu sobwe. Lesa walikuba lalenge keendi bangelo kwamba eti bekale kwilu. (Yobu 38:4, 7) Emulandu wakendi Lesa walamanta muntu wakutanguna nekumusha mupaladaiso, libala lyaina lya Edeni. (Genesis 2:15-17) Yehova walikuyanda eti Adamu nebana bendi bonse bakekale nebuyumi butapu pacishi capanshi.—Belengani Masalimo 37:29; 115:16.

Pakutanguna, libala lya Edeni lyonka owa elyali kuba paladaiso. Bantu bakutanguna aba babili ebali kuyandika kwisusha bana babo pacishi conse. Mukupita kwacindi, cishi conse necalaba paladaiso. (Genesis 1:28) Cishi nteti cikaonongewe sobwe. Nicikapitilishe kuba munshi wabantu.—Belengani Masalimo 104:5.

2. Nimulandu wacani cishi nteco paladaiso lino?

Adamu ne Eva baliyawa kumunyumfwila Lesa, emulandu wakendi Yehova walabatandanya mulibala lya Edeni. Paladaiso yalataika, kayi kuliyawa muntu uliyense welela kucikonsha kwileta. Baibolo ikute kwamba eti: “Cishi capanshi calapewa mumakasa amuntu waipa.”—Yobu 9:24.—Belengani Genesis 3:23, 24.

Sena Yehova walacileka ncali kuyanda kwamba eti cishi capanshi cikabe? Sobwe. Niwangofu shonse. Nkaela kwalilwa. (Yesaya 45:18) Nakabainshile bantu ncali kuyanda pakutanguna.—Belengani Masalimo 37:11, 34.

3. Inga Paladaiso niikabeko aconi?

Paladaiso niikabeko kayi pano pacishi capanshi Yesu akatatika kulela kali Mwami wasalwa ne Lesa. Pankondo ya Amagedoni, Yesu nakatangunine bangelo ba Lesa pakuononga bantu  bonse batamunyumfwili Lesa. Kufuma apo, Yesu nakamusunge Satana byaka bili 1,000. Bantu ba Lesa nibakapuluke mulandu wakwamba eti Yesu nakabatabilile. Nibakekale nebuyumi butapu mu Paladaiso pacishi capanshi.—Belengani Chivumbulutso 20:1-3; 21:3, 4.

4. Inga mapensho nakapwe lilyoni?

Inga Lesa nakafunyepo lilyoni mapensho pacishi capanshi? Yesu walapa “cinshibilo” cakwamba eti mapwililisho ali pepi. Bintu bilainshikinga pacishi bilayoshonga kayi bilaleshenga eti tuli mumasuba “amapwililisho abwikalo ubu.”—Belengani Mateyu 24:3, 7-14, 21, 22.

Cindi Yesu akalelanga pacishi capanshi byaka bili 1,000 kali kwilu, nakafunyepo mapensho onse. (Yesaya 9:6, 7; 11:9) Yesu nakabe Mwami kayi nakasebensenga kali Kashishi Mukulene eshi akafunyepo bucimo kubantu bonse bamusuni Lesa. Ici cilaambanga eti kupitila muli Yesu, Lesa nakafunyepo malwashi, bucekulu, kayi nelufu.—Belengani Yesaya 25:8; 33:24.

5. Inga nibani beti bakekale mu Paladaiso?

Ku Ng’anda ya Bwami, inga mucanako bantu bamusuni Lesa kayi bakute kuyanda kumukondwelesha

Bantu bakute kunyumfwila Lesa nibakaikale mu Paladaiso. (1 Yohane 2:17) Yesu walatuma beshikwiya bakendi kuya kulangaula bantu baina myoyo nekubayisha ncebela kwinsa kwamba eti Lesa abasumine. Masuba ano, Yehova lanyamfwilishinga mamilyoni abantu kwamba eti bakaikale mu Paladaiso pacishi capanshi. (Zefaniya 2:3) Ku Manda a Bwami a Bakamboni ba Yehova, bantu bakute kwiya ncebela kwinsa kwamba eti babe balume, bakashi, kayi nebamashali baina. Bana nebamashali bakute kupaila pamo kayi nekwiya ncebela kwinsa kwamba eti banyamfwiwe nemakani aina.—Belengani Mika 4:1-4.