Talukilani kuya kubintu bili mukati

Talukilani kuya kumitwi yankani

Bakamboni ba Yehova

Salani cishobo Cisoli

 CIIYO 5

Samueli Wali Kwinsa Bintu Byaina

Samueli Wali Kwinsa Bintu Byaina

Kufumina cindi Samueli kacili kanike maningi, wali kwikala nekusebensela kutente yakupailila yaba Isilayeli, musenya bantu nkobali kwisa kupailila Yehova. Sena ucinshi calapa eti Samueli atatike kwikala kutente? Leka tanguna tubone makani alaambanga sha banyina Samueli, ba Hana.

Kwacindi citali, Hana wali kusunishisha kuba nemwana, koma cali kwala. Emulandu wakendi walapempela kuli Yehova nekumusenga kwamba eti amunyamfwe. Walashomesha eti, ito akabe nemwana mutuloba, nakamutwale kuya kwikala nekusebensela kutente. Yehova walamukumbula nekumupa mwana mutuloba. Walamutumba eti Samueli. Kwelana nencalashomesha Hana, Samueli mpwalaba nebyaka 3 na 4 byakusemwa, walamutwala kutente kwamba eti asebenselenga Lesa.

Eli ewali kuba mupailishi mukulene kutente. Bana bendi babili naboyo bali kusebensela kutente. Nkotaluba eti tente yali kuba ng’anda ya Lesa yakupaililamo, kayi bantu bali kuyandika kwinsa bintu byaina babanga kusa. Nacikaba ico, bana ba Eli bali kwinsa bintu byaipa maningi. Samueli wali kubona byonse byobali kwinsa. Sena Samueli neye wali kwinsa bintu byaipa eti bana ba Eli?— Sobwe, wali kwinsa bintu byaina byobalamuyisha bashali bakendi.

Inga wayeyenga eti nicani Eli ncali kuyandika kwinsa pabintu byaipa byobali kwinsa bana bendi babili?— Wali kuyandika kubakalalila kayi nekubakanisha kusebensela pang’anda ya Lesa. Eli liyawa kwinsa ico, emulandu wakendi Yehova walakalala. Yehova walasala kubashina bonse, Eli nebana bendi babili.

Samueli walaambila Eli makani kufumina kuli Yehova

Buna nabumo Samueli kali wona, walanyumfwa muntu kamukuwa eti: ‘Samueli!’ Samueli walapunduka nekufwambila kuli Eli, koma Eli walakumbula eti: ‘Ndiyawa kukukuwapo.’ Ici calenshika  kayi tunkanda tubili. Kacitatu, Eli walaambila Samueli eti ito anyumfwe kayi liswi lyakuwunga, akumbule eti: ‘Yehova ambani ndakutikinga.’ Samueli walensa ico. Yehova walaambila Samueli eti: ‘Ambila Eli eti nindibashine bamu banja yakendi pamulandu wabintu byaipa mbyobalenshi.’ Sena ulayeyenga eti cali kuba capuba kuli Samueli kumwambila Eli makani aya?— Sobwe, cali kuba cayuma. Nacikaba eti Samueli wali kutina, walensa ncalamwambila Yehova. Ncalaamba Yehova calenshika. Bana bendi Eli babili balashiniwa, neye Eli walafwa.

Samueli nicakubonenako caina kuli njafwe. Wali kwinsa bintu byaina nacikaba eti bantu bali kwinsa bintu byaipa. Inga obe niwinsenga aconi? Sena nubenganga eti Samueli nekwinsa bintu byaina cindi conse? Ito na ulenshi ico, Yehova nebashali bakobe nibakakondwe.

BELENGANI MU BAIBOLO YENU

  • 1 Samueli 2:22-26; 3:1-21