Talukilani kuya kubintu bili mukati

Talukilani kuya kumitwi yankani

Bakamboni ba Yehova

Salani cishobo Cisoli

 CIIYO 3

Rahabi Walashoma Muli Yehova

Rahabi Walashoma Muli Yehova

Tiye twelekeshe kuyeya eti tuli mumunshi wa Yeliko. Munshi uyu uli mu Kanani, bantu nkobatashomo muli Yehova. Mumunshi mopele umu mukute kwikala mutukashi naumo. Lina lyakendi ni Rahabi.

Kacili kanike, Rahabi walanyumfwa makani alaambanga Mozesi ncalaimanika menshi mu Lishiba Lifubela (Red Sea) kayi nencalafunya bana ba Isilayeli mu Ijipiti. Rahabi kayi walanyumfwa Yehova ncalanyamfwa ba Isilayeli kwamba eti babalwane balwani babo. Pacindi ici, Rahabi walanyumfwa eti ba Isilayeli bali pepi ne Yeliko!

Rahabi walabasoleka beshikusensa mulandu wakwambeti walashoma muli Yehova

Buna nabumo kumansailo, bene Isilayeli babili balaya ku Yeliko kwakusensa munshi uyu. Mpobalashika balaya kung’anda ya Rahabi. Walabatambula nekubaambila eti bekale. Mashiku, mwami waku Yeliko walanyumfwa makani akwamba eti mumunshi muli beshikusensa bali kung’anda ya Rahabi. Mwami walatuma bantu kwamba eti benga babekate. Rahabi walabasoleka aba beshikusensa pelu paciluli capapalala nekubaambila bantu mbalatuma mwami eti: ‘Beshikusensa banga balesa kuno, koma balafumu kendi mumunshi. Ito mubakonke lino, inga mubacana!’ Sena ucinshi ncalabasolekela Rahabi beshikusensa aba?— Wali kushoma muli Yehova kayi wali kwinshiba eti Lesa nakape ba Isilayeli cishi ca Kanani.

Beshikusensa kabatana baya, balashomesha Rahabi eti, nakapuluke pamo nebanja yakendi wakawonongeka munshi wa Yeliko. Sena ucinshi ncobalamwambila kwinsa?— Balaamba eti: ‘Manta lutambo ulu lufubela nekulusungilila pawindo. Wainseco, bantu bonse bali mung’anda yakobe nibakapuluke.’ Rahabi walanyumfwila nekwinsa ncebalamwambila beshikusensa. Sena ucinshi calakonkapo kwinshika?—

Yehova walamupulusha Rahabi nemukwashi wakendi

Mpokwalapita owa masuba ang’ana, ba Isilayeli balatatika kwenda pelete kushunguluka munshi kabali bamwena owa. Balenda pelete kwamasuba ali 6, kankanda kamo palisuba. Palisuba lyanamba 7, balenda pelete tunkanda tuli 7 kabashunguluka munshi. Mpobalapwisha bonse pamo balooloma neliswi linene. Yehova walalengesha eti lubumbu lwali kuba lwashunguluka munshi lutatike kuwa panshi. Koma ng’anda yalikukute lutambo lufubela pawindo iliyawa kuwa sobwe! Sena ulaibono mucipikica?— Rahabi nebanja yakendi balapuluka!

 Inga ulaiyi cani kufuma kuli Rahabi?— Rahabi walashoma muli Yehova pamulandu wabintu byaina byonse mbyalaiya pali Lesa. Nenjobe uleyinga bintu binji byaina bilaambanga pali Yehova. Sena ukute kumushoma eti ncalensa Rahabi— Tucinshi eti ukute kumushoma!

BELENGANI MU BAIBOLO YENU

  • Yoswa 2:1-24; 6:1-5, 14, 15, 20-25

  • Aheberi 11:31