Talukilani kuya kubintu bili mukati

Talukilani kuya kubintu bing'ana byakusala

Talukilani kuya kumitwi yankani

Bakamboni ba Yehova

Cisoli

Bayisheni Bana Benu

 CIIYO 2

Rabeka Wali Kuyanda Kukondwelesha Yehova

Rabeka Wali Kuyanda Kukondwelesha Yehova

Rabeka wali kuba mutukashi wasuna Yehova. Mwibendi wali kuba Isaki. Isaki neye wali kumusuna Yehova. Inga Rabeka ne Isaki balenshibana aconi? Inga Rabeka walalesha aconi eti wali kuyanda kukondwelesha Yehova? Leka tubone.

Bashali ba Isaki bali kuba ba Abulahamu ne Sala. Bonse bali kwikala mu Kanani. Bantu bamumusenya uyu nkabali kupaila Yehova. Nacikaba ico, Abulahamu wali kuyanda eti mwanendi mutuloba ebe mutukashi ukute kupaila Yehova. Emulandu wakendi walatuma musebenshi wakendi, apona ni Eliyesa, kuya ku Halani, musenya kwali kwikala banse ba Abulahamu, kwamba eti enga alangaule mutukashi ngwela kweba Isaki.

Rabeka walaliyaba kuteka menshi akupa ngamila

Eliyesa walaya kucishi ico pamo ne basebenshi bambi ba Abulahamu. Musuma uyu wali kuba utali maningi. Mpobali kuya, bali kuba ne ngamila shili 10 shali kuba shanyamuna byakulya nebipo. Inga Eliyesa walenshiba aconi mutukashi ngwali kuyandika kusalila Isaki? Eliyesa ne bantu mbwali kuba nabo mpobalashika ku Halani, balapumwina pamukalo pakwinga Eliyesa wali kwinshiba eti batukashi nibese kwisa kuteka menshi. Eliyesa walapempela kuli Yehova nekwamba eti, ‘Ito mutukashi ngweti nsenge menshi ampe ame pamo ne ngamila, ninjinshibe eti uyu emutukashi ngomulansalili.’

Kufuma apo, Rabeka walesa kwisa kuteka menshi kumukalo. Baibolo ikute kwamba eti Rabeka wali kuba wapa maningi. Eliyesa mpwalamusenga menshi akunwa, Rabeka walakumbula eti: ‘Owo. Nindimutekele menshi akunwa, kayi ne ngamila shenu nashoyo nindishipe menshi.’ Ngamila shafwa inyotwa shikute kunwa menshi manji maningi. So kwamba eti ngamila shonse shikwane, Rabeka walateka menshi manji. Sena ulamubono mucipikica ncalasebensenga cangofu?— Eliyesa walakankama kubona Yehova ncalakumbula pempelo yakendi.

Eliyesa walapa Rabeka bipo binji byaina. Rabeka walaambila Eliyesa nebanendi eti benga pamo kung’anda kucomwabo. Mpobalashika, Eliyesa walabaambila mulandu Abulahamu ncaalamutumina ku Halani kayi walaamba ne ncalaikumbula Yehova pempelo yakendi. Banja ya Rabeka yalasumina eti Isaki aebe Rabeka.

Rabeka walaya pamo ne Eliyesa ku Kanani kuya kwebewa kuli Isaki

Sena ulayeyenga eti Rabeka walakana kwebewa kuli Isaki?— Rabeka walenshiba eti Yehova endiye walamutuma Eliyesa. Bashali mpobalamwipusha Rabeka ito wali kuyanda kwebewa kuli Isaki nekuya ku Kanani, walakumbula eti, ‘Ee, ndandanga kuya.’ Popelapo, Rabeka ne Eliyesa balatatikapo kuya ku Kanani. Mpobalashika, Rabeka ne Isaki balebana.

Pakwinga Rabeka wali kwinsa ncasuni Yehova, Yehova walamupa colwe. Mpokwalapita byaka binji, Yesu walesa kusemenwa mumukowa wa Rabeka! Ito nenjobe uli eti Rabeka, kayi koinsa ncasuni Yehova, nenjobe nakakupe colwe.

BELENGANI MU BAIBOLO YENU

  • Genesis 12:4, 5; 24:1-58, 67