Talukilani kuya kubintu bili mukati

Talukilani kuya kubintu bing'ana byakusala

Talukilani kuya kumitwi yankani

Bakamboni ba Yehova

Cisoli

Bayisheni Bana Benu

 CIIYO 7

Sena Nacimo Cindi Ukute Kumwenenenwa Kayi Nekutina?

Sena Nacimo Cindi Ukute Kumwenenenwa Kayi Nekutina?

Bona mwana mutuloba uli pacipikica ici. Labonekenga kumwenenenwa kayi nekutina. Sena nacimo cindi nenjobe ukute kumwenenenwa nekutina?— Twense owa nacimo cindi tukute kumwenenenwa nekutina. Baibolo ikute kutwambila sha banendi Yehova nabamo bali kumwenenenwa nekutina. Umo wabo ni Eliya. Leka tubone makani alaambanga sha Eliya.

Yezebeli wali kuyanda kumushina Eliya

Eliya wali kwikala mu Isilayeli byaka binji Yesu katanasemwa. Ahabu, mwami wa Isilayeli, nkali kupaila Lesa wancine-ncine, Yehova. Ahabu ne Yezebeli mukashendi, bali kupaila balesa babubepeshi. Pamulandu wa ico, bantu banji mu Isilayeli balatatika kupaila Baala. Yezebeli wali kuba wayuma moyo kayi wali kuyanda eti bantu bonse beshi kupaila Yehova, kushapo ne Eliya, babashine! Sena ucinshi ncalensa Eliya?—

Eliya walafwamba! Walafwambila mucimpayuma nekusolama mucikwe na mubuceni.  Sena ulayeyenga eti walenshila cani ico?— Ee, wali kutina. Eliya nkali kuyandika kutina. Inga nimulandu cini? Wali kwinshiba eti Yehova inga umunyamfwa. Yehova wali kuba lamunyamfwapo kendi Eliya. Cindi nacimo, Yehova walakumbula pempelo ya Eliya kupitila mukutuma mulilo kufumina kwilu. Yehova wali kakute ngofu shakunyamfwa Eliya!

Inga Yehova walamunyamfwa aconi Eliya?

Eliya kali wasolama, Yehova walepusha Eliya eti: ‘Ulenshinga cani kuno?’ Eliya walakumbula eti: ‘Njame owa ndashala shikumupaila. Ndashala owa ndenka, kayi ndatininga eti ngabakashina.’ Eliya walikuyeya eti bantu bonse beshi kupaila Yehova balabashina. Koma Yehova walaambila Eliya eti: ‘Nkobali nabamo, nkoli wenka sobwe. Kuli bantu bashika ku 7,000 bakute kumpaila. Nkotatina. Kucili incito inene njolayandikinga kwinsa!’ Sena ulayeyenga eti Eliya liyawa kukondwa kunyumfwa maswi aya?—

Nicani ncowela kwiya kubintu byalenshikila Eliya?— Nkolayandikinga kumwenenenwa kayi nekutina. Ukute banobe bamusuni Yehova kayi nenjobe bakusuni. Kayi, Yehova ukute ngofu shinji maningi, nakakunyamfwe cindi cili conse! Sena uliyawa kunyumfwa cena kubona eti ukute banobe banji?—

BELENGANI MU BAIBOLO YENU

  • 1 Mafumu 19:3-18

  • Masalimo 145:18

  • 1 Petulo 5:9