Talukilani kuya kubintu bili mukati

Talukilani kuya kubintu bing'ana byakusala

Bakamboni ba Yehova

Cisoli

Nimulandu Cini Nkamukute Kusekelela Isita?

Nimulandu Cini Nkamukute Kusekelela Isita?

Bantu banji mbyobakute kuyeya

Bubepeshi: Bakamboni ba Yehova nkabakute kusekelela Isita (kupundushiwa kwa Yesu) pamulandu wakwamba eti ntebo Bakilisitu.

Cancine-ncine: Tukute kushoma eti Yesu Kilisitu e Shikutupulusha, kayi tukute kusebensa cangofu kwamba eti ‘tukonkenga mwalapita.’—1 Petulo 2:21; Luka 2:11.

Bubepeshi: Nkamukute kushoma eti Yesu walapundushiwa kufuma kulufu.

Cancine-ncine: Tukute kushoma eti Yesu walapundushiwa; tucinshi eti nimakani asuniki maningi kwamba eti tube Bakilisitu kayi tukute nekwambilako bantu bambi shamakani aya.—1 Akorinto 15:3, 4, 12-15.

Bubepeshi: Nacikaba eti bana benu bakute kupitwa cindi ca kusekelela kupundushiwa kwa Yesu, amwe nkamukute kubashako nemano.

Cancine-ncine: Tubasuni bana betu—tukute kulibenga kwamba eti tubayishe kayi nekubanyamfwa kwamba eti kabali bakondwa.—Tito 2:4.

Nimulandu cini Bakamboni ba Yehova nkabakute kusekelela kupundushiwa kwa Yesu?

  • Kusekelela kupundushiwa kwa Yesu nkakukute kufumina mu Baibolo.

  • Yesu walaamba eti twanukenga lufu lwakendi, liyawa kwamba eti twanukenga kupundushiwa kwakendi. Tukute kwanuka busuba ubu caka ne caka kwelana ne kalenda yamu Baibolo.—Luka 22:19, 20.

  • Tukute kushoma eti kutatika kwa miteto ya kupundushiwa kwa Yesu, kukute kufumina kumiteto yakeendi yalushalo, ici cikute kupa eti miteto iyi kaimucima Lesa. Lesa usuni eti tumupenga bulemu pakumupempela, emuladu wakendi ukute kucimwa nebantu bakute kukonka miteto iyi njatasuminishi.—Ekisodo 20:5; 1 Mafumu 18:21

Tukute kushoma eti kutamantamo lubasu kwetu mukusekelela kupundushiwa kwa Yesu kukute kufuma mu Baibolo, yalo ikute kutwambila eti katusebenseshanga “mano akute kunyamfwa ne kuyeya cena” mucindi cakukonka mbyobakute kuyeya bantu. (Miyambo 3:21; Mateyu 15:3) Nacikaba eti tukute kubaambila bantu mbyotukute kushoma mumakani a kupundushiwa kwa Yesu, tukute kubaleka kwamba eti balisalile byakwinsa.—1 Petulo 3:15.