Zaburi 27:1-14

  • Yehova ni we undinda

    • Nishimira urusengero rw’Imana (4)

    • Niyo ababyeyi banta, Yehova we yanyitaho (10)

    • “Iringire Yehova” (14)

Zaburi ya Dawidi. 27  Yehova ni urumuri rwanjye n’umukiza wanjye. Nzatinya nde? Yehova ni we undinda. Ni nde uzantera ubwoba?   Igihe abagizi ba nabi, ari na bo banzi banjye bandwanyaga, bakantera bashaka kunyica,Barasitaye baragwa.   Nubwo naba ngoswe n’ingabo,Sinzagira ubwoba. Nubwo nahura n’intambara,Nabwo nzakomeza kumwiringira.   Ikintu kimwe nasabye Yehova,Ari na cyo nifuza,Ni uko natura mu nzu ya Yehova iminsi yose yo kubaho kwanjye,Nkareba ubwiza bwa Yehova,Kandi nkitegereza urusengero rwe nishimye.   Kuko ku munsi w’amakuba azampisha ahantu hari umutekano.Azampisha mu bwihisho bw’ihema rye.Azanshyira ku rutare rurerure, kugira ngo abanzi banjye batangirira nabi.   Natsinze abanzi banjye bose bangose.Nzatamba ibitambo mu ihema rye ndangurura ijwi ry’ibyishimo.Nzaririmbira Yehova musingiza.   Yehova, ningutakira ujye unyumva,Ungirire neza kandi unsubize.   Navuze ibyawe ngira nti: “Nimushake uko mwakwemerwa n’Imana.” Yehova, nzakora uko nshoboye nemerwe nawe.   Mana, ntunyirengagize. Ntundakarire ngo unyirukane, Ahubwo untabare.Mana mukiza wanjye, ntundeke kandi ntuntererane. 10  Niyo papa na mama banta,Nzi ko wowe Yehova, uzanyakira. 11  Yehova, nyigisha inzira yaweKandi unyobore mu nzira yo gukiranuka, unkize abanzi banjye. 12  Ntundeke ngo abanzi banjye bangenze uko bashaka,Kuko hari abiyemeje kunshinja ibinyoma,Kandi bankangisha kungirira nabi. 13  Ese iyo ntizera ko nzakomeza kubaho ngo mbone ineza ya Yehova,Nari kuba uwa nde?* 14  Iringire Yehova.Gira ubutwari kandi ukomere. Rwose, iringire Yehova.

Ibisobanuro ahagana hasi

Bishobora no kuvugwa ngo: “Nizeye ntashidikanya ko nzabona ineza ya Yehova nkiriho.”