Yesaya 27:1-13
27 Icyo gihe Yehova azahana Lewiyatani,* ya nzoka igenda inyerera,Lewiyatani ya nzoka igenda yihinahina,Ayitere inkota ye nini ikomeye iteye ubwoba.+
Azica icyo gisimba kinini cyo mu nyanja.
2 Icyo gihe muzamuririmbire* muti:
“Uruzabibu ruvamo divayi ibira ikazana ifuro.+
3 Njyewe Yehova ni njye umurinda.+
Buri gihe ndamwuhira,+Murinda ku manywa na nijoroKugira ngo hatagira umugirira nabi.+
4 Nta mujinya mfite.+
Ni nde uzantega ibihuru by’amahwa n’ibyatsi mu ntambara?
Nzabikandagira kandi mbitwikire rimwe.
5 Naho ubundi, nafate ubuhungiro bwanjye abukomezeAshake uko twabana amahoro,Rwose nashake uko twabana amahoro.”
6 Mu gihe kizaza, Yakobo azashora imizi;Isirayeli azazana uburabyo n’amashami+Kandi bazuzuza igihugu imbuto zabo.+
7 Ese umukubita yagombye kumukubita cyane nk’uko amukubita?
Ese akwiriye kwicwa nk’uko abo yishe bapfuye?
8 Azahangana na we amwirukanishe urusaku rwumvikana cyane.
Azamwirukanisha umuyaga we ukaze, igihe hazaba hari umuyaga w’iburasirazuba.+
9 Uko ni ko ikosa rya Yakobo rizababarirwa+Kandi izi ni zo mbuto azera namukuraho icyaha:
Azatuma amabuye yose yo ku gicaniro ashwanyagurika,Amere nk’ibice by’ingwaKandi nta nkingi z’ibiti* zisengwa cyangwa ibicaniro byo gutwikiraho umubavu* bizasigara.+
10 Umujyi ukikijwe n’inkuta uzaba ahantu hadatuwe,Aho amatungo yarishaga hazatabwa hasigare hameze nk’ubutayu.+
Aho ni ho ikimasa kizarisha kandi ni ho kizaryama,Kirye amashami y’ibiti kiyamareho.+
11 Udushami nitwuma,Abagore bazaza batuvuneBaducanishe umuriroKuko aba bantu batagira ubwenge.+
Ni yo mpamvu Umuremyi wabo atazabagirira imbabaziKandi Uwatumye babaho ntazabagirira impuhwe.+
12 Icyo gihe Yehova azakubita imbuto z’igiti uhereye aho rwa Ruzi* rutembera ukagera mu Kibaya* cya Egiputa+ kandi muzatoragurwa umwe umwe, mwa Bisirayeli mwe.+
13 Icyo gihe hazavuzwa ihembe rinini,+ maze abazaba barimbukira mu gihugu cya Ashuri+ n’abatatanyirijwe mu gihugu cya Egiputa+ bose, baze bapfukamire Yehova ku musozi wera w’i Yerusalemu.+
Ibisobanuro ahagana hasi
^ Reba Ibisobanuro by’amagambo.
^ Uko bigaragara uvugwa aha ashobora kuba ari Isirayeli, ikaba yariswe umugore kandi ikagereranywa n’uruzabibu.
^ Reba Ibisobanuro by’amagambo.
^ Reba Ibisobanuro by’amagambo.
^ Ni ukuvuga, Ufurate.
^ Reba Ibisobanuro by’amagambo.
