Soma ibirimo

Jya kuri meni ya kabiri

Abahamya ba Yehova

Ikinyarwanda

Umubatizo ni iki?

Umubatizo ni iki?

Icyo Bibiliya ibivugaho

Ijambo umubatizo risobanura kwibiza umuntu mu mazi no kuburuka. * Ni yo mpamvu Yesu yabatirijwe mu mugezi (Matayo 3:13, 16). Nanone Umunyetiyopiya yasabye kubatizwa ageze ku ‘kidendezi cy’amazi.’—Ibyakozwe 8:36-40.

Umubatizo usobanura iki?

Bibiliya igereranya umubatizo no guhambwa (Abaroma 6:4; Abakolosayi 2:12). Kubatizwa mu mazi menshi bigereranya gupfa ku bihereranye n’imibereho wari usanganywe, ugatangira kubaho ukora ibyo Imana ishaka. Imana ni yo yateganyije ko abantu batera intambwe zigana ku mubatizo kandi bakabatizwa kugira ngo binyuze ku gitambo cya Yesu Kristo bagire umutimanama utabacira urubanza (1 Petero 3:21). Ni yo mpamvu Yesu yavuze ko abigishwa be bagomba kubatizwa.Matayo 28:19, 20.

Ese umubatizo ukuraho icyaha?

Oya. Bibiliya yigisha ko amaraso ya Yesu yamenwe ari yo yonyine akuraho ibyaha (Abaroma 5:8, 9; 1 Yohana 1:7). Icyakora igitambo cya Yesu kigirira umuntu akamaro iyo yizera Yesu, agahindura imyifatire ye, agakurikiza inyigisho ze hanyuma akabatizwa.Ibyakozwe 2:38; 3:19.

Ese Bibiliya yaba ivuga ko impinja zigomba kubatizwa?

Oya. Ibyo nta hantu na hamwe wabisanga muri Bibiliya. Hari amadini abatiza impinja (bakazisuka amazi ku gahanga) maze bakazita amazina. Umubatizo ugenewe abantu bashobora kumva “ubutumwa bwiza bw’ubwami bw’Imana” kandi bakabwizera (Ibyakozwe 8:12). Ibyo bikubiyemo kumva Ijambo ry’Imana, kuryemera no kwihana; kandi ibyo nta ruhinja rwabikora.Ibyakozwe 2:22, 38, 41.

Nanone, Bibiliya ivuga ko Imana ibona ko abana bakiri bato bafite ababyeyi b’Abakristo ari abera kandi batanduye mu maso ye kubera ko ababyeyi babo ari abizerwa (1 Abakorinto 7:14). Iyo kubatizwa kw’abana bakiri bato biza kuba byemewe, ntibyari kuba ngombwa ko Imana ibona ko ari abere kubera ababyeyi babo. *

Ibintu abantu bakunze kwibeshyaho ku birebana n’umubatizo wa gikristo

Ikinyoma: Kuminjagira cyangwa gusuka amazi ku muntu ni igikorwa cyemewe gisimbura kwibiza umuntu mu mazi.

Ukuri: Imibatizo yose ivugwa muri Bibiliya yakorwaga bibiza umuntu wese uko yakabaye mu mazi. Urugero, igihe intumwa Filipo yabatizaga umugabo w’umunyetiyopiya, bombi ‘baramanutse bajya mu mazi,’ maze aramubatiza. Nyuma yaho, “bavuye mu mazi.”Ibyakozwe 8:36-39. *

Ikinyoma: Iyo Bibiliya ivuga ko abagize umuryango bose babatijwe iba ishatse kuvuga ko harimo n’abana. Urugero, Bibiliya ivuga ko umurinzi w’inzu y’imbohe w’i Filipi ‘we n’abo mu rugo rwe bose babatijwe.’Ibyakozwe 16:31-34.

Ukuri: Inkuru ivuga uko uwo murinzi w’imbohe yahindutse, igaragaza ko ababatijwe bari basobanukiwe ‘ijambo rya Yehova’ kandi ko ‘bishimye cyane’ (Ibyakozwe 16:32, 34). Ibyo bigaragaza ko umwana ushobora kuba yari mu rugo rw’uwo murinzi w’inzu y’imbohe, atari kubatizwa kuko atari kuba asobanukiwe ijambo rya Yehova.

Ikinyoma: Inyigisho za Yesu zigaragaza ko abana bato bashobora kubatizwa kuko yavuze ko Ubwami bw’Imana ari ubw’abameze nka bo.Matayo 19:13-15; Mariko 10:13-16.

Ukuri: Yesu ntiyarimo avuga ku byerekeye umubatizo igihe yavugaga ayo magambo. Ahubwo yavugaga ko kugira ngo abantu buzuze ibisabwa byo kujya mu Bwami bw’Imana, bagombaga kuba bameze nk’abana, ni ukuvuga ko bagombaga kuba bicisha bugufi kandi bemera kwigishwa.Matayo 18:4; Luka 18:16, 17.

^ par. 3 Ijambo ry’ikigiriki ryahinduwemo “kubatizwa” rikomoka ku muzi w’inshinga isobanura “kwibiza.” Reba igitabo Theological Dictionary of the New Testament, Umubumbe wa I, ipaji ya 529.

^ par. 10 Dukurikije uko igitabo kimwe kibivuga, “nta hantu na hamwe mu Isezerano Rishya havuga ko abana bakwiriye kubatizwa.” Nanone icyo gitabo kivuga ko ibyo byazanywe n’abantu “babonaga umubatizo mu buryo budakwiriye,” bibwira ko uvanaho ibyaha.The International Standard Bible Encyclopedia, Umubumbe wa 1, ipaji ya 416-417.

^ par. 13 Hari igitabo cyatanze ibisobanuro ku ijambo “Umubatizo (ryo muri Bibiliya)” kivuga ko “rigaragaza ko Abakristo ba mbere bibizwaga mu mazi.”New Catholic Encyclopedia, Umubumbe wa 2, ipaji ya 59.