Soma ibirimo

Jya kuri meni ya kabiri

Reba urutonde rw'ibirimo

Abahamya ba Yehova

Ikinyarwanda

Bibiliya kuri interineti | BIBILIYA-UBUHINDUZI BW'ISI NSHYA

Imigani 18:1-24

18  Uwitarura abandi aba ashaka kugera ku byo ararikiye bishingiye ku bwikunde,+ akanga ubwenge bwose.+  Umupfapfa ntiyishimira ubushishozi,+ ahubwo yishimira kugaragaza ibiri mu mutima we.+  Iyo umuntu mubi aje agasuzuguro na ko karaza,+ kandi gukorwa n’isoni+ bizana n’umugayo.  Amagambo y’umuntu ameze nk’amazi maremare,+ kandi isoko y’ubwenge ni nk’umugezi ududubiza.+  Si byiza gutonesha umuntu mubi,+ kandi si byiza kurenganya umukiranutsi mu rubanza.+  Iminwa y’umupfapfa yishora mu ntonganya,+ kandi akanwa ke kihamagarira inkoni.+  Akanwa k’umupfapfa ni ko kamurimbuza,+ kandi iminwa ye igusha ubugingo bwe mu mutego.+  Amagambo y’umuntu usebanya ameze nk’ibyokurya bimiraguranwa umururumba,+ bikamanuka bikagera mu nda.+  Umuntu unebwa mu murimo we+ aba ari umuvandimwe w’umurimbuzi.+ 10  Izina rya Yehova ni umunara ukomeye.+ Umukiranutsi awirukiramo akabona uburinzi.+ 11  Ibintu by’agaciro by’umukire ni wo mugi we ukomeye,+ kandi mu bwenge bwe yumva bimeze nk’urukuta rumurinda.+ 12  Mbere y’uko umuntu agwa, umutima we ubanza kwishyira hejuru,+ kandi kwicisha bugufi bibanziriza icyubahiro.+ 13  Usubiza atarumva neza ikibazo+ aba agaragaje ubupfapfa, kandi bimukoza isoni.+ 14  Umutima ukomeye utuma umuntu ashobora kwihanganira indwara ye,+ ariko umutima wihebye ni nde wawihanganira?+ 15  Umutima w’umuntu ujijutse wunguka ubumenyi,+ kandi ugutwi kw’abanyabwenge gushakisha ubumenyi.+ 16  Impano y’umuntu imwugururira irembo rigari,+ kandi iramuyobora ikamugeza imbere y’abakomeye.+ 17  Ubanje kuvuga mu rubanza asa n’ufite ukuri,+ ariko iyo mugenzi we aje aramuhinyuza.+ 18  Ubufindo buhosha amakimbirane,+ ndetse bukiranura n’abanyambaraga.+ 19  Umuvandimwe wakorewe icyaha araruhanya kuruta umugi ukomeye,+ kandi habaho amakimbirane amera nk’ibihindizo byugariye igihome.+ 20  Inda y’umuntu ihaga imbuto z’akanwa ke,+ kandi ahaga umusaruro w’ibiva mu minwa ye.+ 21  Urupfu n’ubuzima byombi biri mu maboko y’ururimi,+ kandi urukunda azarya imbuto zarwo.+ 22  Ubonye umugore mwiza+ aba abonye ikintu cyiza,+ kandi yemerwa na Yehova.+ 23  Umukene avuga yinginga,+ ariko umukire asubizanya umwaga.+ 24  Habaho incuti ziba ziteguye kumarana,+ ariko habaho incuti inamba ku muntu ikamurutira umuvandimwe.+

Ibisobanuro ahagana hasi