Soma ibirimo

Jya kuri meni ya kabiri

Reba urutonde rw'ibirimo

Abahamya ba Yehova

Ikinyarwanda

Bibiliya kuri interineti | BIBILIYA-UBUHINDUZI BW'ISI NSHYA

Imigani 10:1-32

10  Imigani ya Salomo.+ Umwana w’umunyabwenge anezeza se,+ ariko umwana w’umupfapfa atera nyina agahinda.+  Ubutunzi bw’umuntu mubi nta cyo buzamumarira,+ ariko gukiranuka kuzakiza urupfu.+  Yehova ntazemera ko umukiranutsi asonza,+ ariko azigiza kure ibyo ababi bararikira.+  Ukorana ukuboko kudeha azakena,+ ariko ukuboko k’umunyamwete kuzamukiza.+  Umwana ukorana ubushishozi ahunika mu mpeshyi; umwana w’urukozasoni we araryamira mu gihe cy’isarura.+  Imigisha iri ku mutwe w’umukiranutsi,+ ariko akanwa k’ababi gahisha imigambi y’urugomo.+  Kwibukwa k’umukiranutsi kumuhesha umugisha,+ ariko izina ry’ababi rizabora.+  Umuntu ufite umutima w’ubwenge azemera amategeko,+ ariko ufite iminwa ivuga iby’ubupfapfa azanyukanyukirwa hasi.+  Ugendera mu nzira itunganye azagenda afite umutekano,+ ariko ugoreka inzira ze azimenyekanisha.+ 10  Uwicanira ijisho azateza imibabaro,+ kandi ufite iminwa ivuga iby’ubupfapfa azanyukanyukirwa hasi.+ 11  Akanwa k’umukiranutsi ni isoko y’ubuzima,+ ariko akanwa k’ababi gahisha imigambi y’urugomo.+ 12  Urwango rukurura amakimbirane,+ ariko urukundo rutwikira ibicumuro byose.+ 13  Ubwenge buboneka ku minwa y’umuntu ujijutse,+ ariko umugongo w’umuntu utagira umutima uberewe n’inkoni.+ 14  Abanyabwenge bizigamira ubumenyi,+ ariko akanwa k’umupfapfa kugarijwe no kurimbuka.+ 15  Ibintu by’agaciro by’umukire ni umugi we ukomeye.+ Kurimbuka kw’aboroheje ni ubukene bwabo.+ 16  Ibyo umukiranutsi akora bizana ubuzima;+ umusaruro w’umuntu mubi wo uyobora ku cyaha.+ 17  Uwemera igihano ni inzira iyobora ku buzima,+ ariko uwanga gucyahwa atera kuyobagurika.+ 18  Ahari umuntu uhisha urwango haba iminwa ivuga ibinyoma,+ kandi uvuga amagambo yo gusebanya ni umupfapfa.+ 19  Amagambo menshi ntaburamo ibicumuro,+ ariko urinda iminwa ye aba agaragaje ubwenge.+ 20  Ururimi rw’umukiranutsi ni ifeza y’indobanure;+ umutima w’umuntu mubi wo ufite agaciro gake cyane.+ 21  Iminwa y’umukiranutsi iragira abantu benshi,+ ariko abapfapfa bakomeza gupfa bazira kutagira umutima.+ 22  Umugisha Yehova atanga ni wo uzana ubukire,+ kandi nta mibabaro awongeraho.+ 23  Umupfapfa abona ko kwishora mu bwiyandarike ari nk’umukino,+ ariko ubwenge bufitwe n’abagira ubushishozi.+ 24  Icyo umuntu mubi atinya ni cyo kizamugeraho,+ ariko abakiranutsi bazahabwa ibyo bifuza.+ 25  Nk’uko inkubi y’umuyaga ihuha igahita, ni ko n’umuntu mubi ashiraho;+ ariko umukiranutsi ni nk’urufatiro ruhoraho kugeza ibihe bitarondoreka.+ 26  Nk’uko divayi y’umushari imerera amenyo, kandi nk’uko umwotsi umerera amaso, ni ko n’umuntu w’umunebwe amerera abamutumye.+ 27  Gutinya Yehova byongerera umuntu iminsi yo kubaho,+ ariko imyaka yo kubaho y’abantu babi izagabanywa.+ 28  Ibyo abakiranutsi baba biteze birabanezeza,+ ariko ibyiringiro by’ababi bizashiraho.+ 29  Inzira ya Yehova ni igihome gikingira umuntu w’inyangamugayo,+ ariko inkozi z’ibibi zo zizarimbuka.+ 30  Umukiranutsi ntazanyeganyezwa kugeza ibihe bitarondoreka,+ ariko ababi bo ntibazakomeza gutura mu isi.+ 31  Akanwa k’umukiranutsi kera imbuto z’ubwenge,+ ariko ururimi ruvuga ibigoramye ruzakurwaho.+ 32  Iminwa y’umukiranutsi imenya ibituma yemerwa,+ ariko akanwa k’ababi kavuga ibigoramye.+

Ibisobanuro ahagana hasi