Soma ibirimo

Jya kuri meni ya kabiri

Reba urutonde rw'ibirimo

Abahamya ba Yehova

Ikinyarwanda

Bibiliya kuri interineti | BIBILIYA-UBUHINDUZI BW'ISI NSHYA

Abacamanza 7:1-25

7  Nuko Yerubayali,+ ari we Gideyoni,+ n’abantu bose bari kumwe na we bazinduka kare mu gitondo, bakambika ku iriba rya Harodi. Abamidiyani na bo bari bakambitse mu kibaya, mu majyaruguru y’inkambi ya Gideyoni, hafi y’umusozi wa More.  Yehova abwira Gideyoni ati “abantu bari kumwe nawe ni benshi cyane ku buryo ntahana Abamidiyani mu maboko yabo,+ kuko bishobora gutuma Abisirayeli birata+ bakambwira bati ‘amaboko yacu ni yo yadukijije.’+  None hamagara abantu ubabwire uti ‘ni nde wumva afite ubwoba kandi akaba ahinda umushyitsi? Uwo niyitahire.’”+ Uko ni ko Gideyoni yabagerageje. Nuko abantu ibihumbi makumyabiri na bibiri basubira iwabo, hasigara abantu ibihumbi icumi.  Ariko Yehova abwira Gideyoni ati “abantu baracyari benshi.+ Bamanure bajye ku mazi kugira ngo abe ari ho mbakugeragereza. Umuntu wese ndi bukubwire nti ‘uyu ni we muri bujyane,’ uwo ni we uri bujyane nawe. Ariko uwo ndi bukubwire nti ‘uyu ntimuri bujyane,’ uwo ntari bujyane nawe.”  Gideyoni amanura abantu abajyana ku mazi.+ Nuko Yehova aramubwira ati “umuntu wese uri bujabaguze amazi ururimi nk’uko imbwa zibigenza, umushyire ukwe; n’umuntu wese uri bunywe amazi apfukamye umushyire ukwe.”+  Abantu bose banywesheje amazi urushyi, babaye magana atatu. Abasigaye bose banyoye amazi bapfukamye.  Yehova abwira Gideyoni ati “abagabo magana atatu banywereye amazi ku rushyi ni bo nzakoresha kugira ngo mbakize, kandi nzahana Abamidiyani mu maboko yawe.+ Abasigaye bose ubareke bitahire, buri muntu ajye iwe.”  Bafata impamba abo bantu bari bitwaje n’amahembe yabo,+ Gideyoni asezerera Abisirayeli buri wese ajya iwe, asigarana n’abantu magana atatu. Inkambi y’Abamidiyani yari mu kibaya,+ munsi y’aho Gideyoni yari akambitse.  Iryo joro+ Yehova abwira Gideyoni ati “haguruka utere inkambi yabo, kuko nayihanye mu maboko yawe.+ 10  Ariko niba ufite ubwoba bwo kumanuka, banza umanukane na Pura umugaragu wawe mujye kuri iyo nkambi,+ 11  utege amatwi ibyo bari buvuge,+ biratuma ugira ubutwari+ kandi rwose uri bumanuke utere inkambi yabo.” Nuko we n’umugaragu we Pura baramanuka begera aho abo muri iyo nkambi bari bashinze ibirindiro. 12  Abamidiyani, Abamaleki n’ab’Iburasirazuba bose+ bari bagandagaje mu kibaya banganya ubwinshi n’inzige.+ Ingamiya zabo+ ntizagiraga ingano, zari nyinshi nk’umusenyi wo ku nkombe z’inyanja. 13  Gideyoni araza asanga hari umugabo urotorera mugenzi we inzozi ati “umva inzozi narose.+ Nabonye umugati wiburungushuye ukozwe mu ngano za sayiri ugenda mu nkambi y’Abamidiyani wikaraga, ugeze ku ihema uryikubitaho riragwa,+ uraribirindura rigwa hasi, rirarambarara.” 14  Nuko mugenzi we aramusubiza+ ati “icyo nta kindi ni inkota ya Gideyoni+ mwene Yowashi w’Umwisirayeli. Imana y’ukuri+ yahanye Abamidiyani n’abo muri iyi nkambi bose mu maboko ye.”+ 15  Gideyoni yumvise iby’izo nzozi n’icyo zisobanura,+ ahita aramya Imana.+ Hanyuma asubira mu nkambi y’Abisirayeli aravuga ati “nimuhaguruke,+ kuko Yehova yahanye inkambi y’Abamidiyani mu maboko yanyu.” 16  Ba bagabo magana atatu abagabanyamo imitwe y’ingabo itatu, buri wese amuha ihembe+ n’ikibindi kirimo ifumba igurumana. 17  Arababwira ati “murebe ibyo nkora namwe abe ari byo mukora. Ningera aho inkambi itangirira, ibyo ndi bukore abe ari byo namwe mukora. 18  Jye n’abo turi kumwe bose nituvuza amahembe, namwe aho muri bube mugose inkambi+ yose muvuze amahembe, kandi muvuge muti ‘intambara ni iya Yehova+ na Gideyoni!’” 19  Hanyuma Gideyoni azana n’abantu ijana bari kumwe na we, bagera aho inkambi itangirira igicuku kinishye.+ Bari bamaze guhinduranya abarinzi. Nuko bavuza amahembe,+ bakubita hasi bya bibindi bari bafite biramenagurika.+ 20  Abo muri ya mitwe itatu y’ingabo bavuza amahembe,+ bamena ibibindi bari bafite, bafata na ya mafumba agurumana mu kuboko kw’ibumoso, mu kuboko kw’iburyo bafata amahembe kugira ngo bayavuze. Batera hejuru bati “inkota ni iya Yehova+ na Gideyoni!” 21  Bakomeza guhagarara bakikije inkambi, buri wese mu mwanya we; abo mu nkambi bose bakwira imishwaro, bahunga bavuza induru.+ 22  Ba bandi magana atatu+ bakomeza kuvuza amahembe,+ Yehova atuma buri wese mu nkambi ahindukirana mugenzi we amutikura inkota;+ abo mu nkambi bakomeza guhunga bagera i Beti-Shita n’i Serera, bagera no ku rugabano rwa Abeli-Mehola+ hafi y’i Tabati. 23  Hagati aho bahuruza Abisirayeli baturutse mu Banafutali,+ mu Basheri+ no mu Bamanase+ bose, bakurikira+ Abamidiyani. 24  Gideyoni yohereza intumwa mu karere kose k’imisozi miremire ya Efurayimu,+ ngo zibabwire ziti “nimumanuke musanganire Abamidiyani, mubatange ku byambu byo kuri Yorodani n’imigezi yayo kugeza i Beti-Bara muhashinge ibirindiro.” Nuko Abefurayimu bose bateranira hamwe bashinga ibirindiro ku byambu+ byo kuri Yorodani n’imigezi yayo kugeza i Beti-Bara. 25  Nanone bafata ibikomangoma bibiri by’Abamidiyani, ari byo Orebu na Zebu.+ Orebu+ bamwicira ku rutare rwa Orebu, naho Zebu bamwicira mu rwengero rwa divayi rwa Zebu. Bakomeza gukurikira Abamidiyani,+ bazanira Gideyoni igihanga cya Orebu n’icya Zebu mu karere ka Yorodani.+

Ibisobanuro ahagana hasi