Soma ibirimo

Jya kuri meni ya kabiri

Reba urutonde rw'ibirimo

Abahamya ba Yehova

Ikinyarwanda

Bibiliya kuri interineti | BIBILIYA-UBUHINDUZI BW'ISI NSHYA

Abacamanza 6:1-40

6  Nuko Abisirayeli bakora ibibi mu maso ya Yehova.+ Yehova abahana mu maboko y’Abamidiyani+ mu gihe cy’imyaka irindwi.  Abamidiyani bakandamiza Abisirayeli,+ bituma Abisirayeli bashaka ahantu ho guhisha imyaka yabo mu myobo yo mu misozi no mu buvumo, n’ahandi hantu hagerwa bigoranye.+  Iyo Abisirayeli babibaga imyaka,+ Abamidiyani, Abamaleki+ n’ab’Iburasirazuba+ barazamukaga bakabagabaho igitero.  Barazaga bagashinga amahema bakabarwanya, bakangiza imyaka yose yeze mu mirima yabo kugeza i Gaza. Nta kintu na kimwe cyo kurya basigaga muri Isirayeli, habe n’intama cyangwa inka cyangwa indogobe.+  Bazanaga n’amatungo yabo n’amahema yabo. Bazaga ari benshi cyane nk’inzige,+ kandi bo n’ingamiya zabo ntibagiraga ingano;+ barazaga bakayogoza igihugu.+  Abamidiyani bakenesha Abisirayeli cyane, maze Abisirayeli batakambira Yehova ngo abatabare.+  Kubera ko Abisirayeli batakambiye Yehova ngo abatabare, abakize Abamidiyani,+  Yehova yoherereje Abisirayeli umuhanuzi,+ arababwira ati “Yehova Imana ya Isirayeli aravuze ati ‘ni jye wabakuye muri Egiputa,+ mbavana mu nzu y’uburetwa.+  Narabacunguye mbakura mu maboko y’Abanyegiputa no mu maboko y’ababakandamizaga bose, mbirukana imbere yanyu mbaha igihugu cyabo.+ 10  Nanone narababwiye nti “ndi Yehova Imana yanyu.+ Ntimugatinye imana z’Abamori,+ bene igihugu mutuyemo.”+ Ariko ntimwanyumviye.’”+ 11  Nyuma yaho, umumarayika wa Yehova yaraje+ yicara munsi y’igiti kinini cyari muri Ofura, kikaba cyari icya Yowashi w’Umwabiyezeri.+ Icyo gihe umuhungu we Gideyoni+ yarimo ahurira ingano mu rwengero rwa divayi, agira ngo agire vuba Abamidiyani batamubona. 12  Umumarayika wa Yehova aramubonekera, aramubwira ati “Yehova ari kumwe nawe+ wa munyambaraga w’intwari we!” 13  Gideyoni aramusubiza ati “ariko se databuja, niba Yehova ari kumwe natwe,+ kuki ibi byose bitugeraho? Ibikorwa byose bitangaje+ ba sogokuruza bavugaga ko yakoze biri he?+ Ntibatubwiraga bati ‘Yehova yadukuye muri Egiputa’?+ None dore Yehova yaradutaye,+ aduhana mu maboko y’Abamidiyani.” 14  Yehova* aramureba aramubwira ati “genda ukoreshe izo mbaraga ufite,+ kandi uzakiza Abisirayeli ubakure mu maboko y’Abamidiyani.+ Si jye ukohereje?”+ 15  Na we aramusubiza ati “ariko se Yehova, nzakirisha iki Abisirayeli?+ Dore umuryango* wanjye ni wo muto mu Bamanase, kandi ni jye muto mu rugo rwa data.”+ 16  Yehova aramubwira ati “kubera ko nzaba ndi kumwe nawe,+ uzatsinda Abamidiyani+ nk’uko watsinda umuntu umwe.” 17  Gideyoni aramubwira ati “niba ntonnye mu maso yawe,+ mpa ikimenyetso kigaragaza ko ari wowe tuvuganye.+ 18  Ndakwinginze ntuve hano kugeza aho ndi bugarukire+ nkuzaniye impano nkayishyira imbere yawe.”+ Nuko aramusubiza ati “ndakomeza kwicara hano kugeza aho uri bugarukire.” 19  Gideyoni ajya iwe ategura umwana w’ihene,+ afata na efa* y’ifu ayikoramo imigati idasembuwe.+ Inyama azishyira mu cyibo, asuka umufa mu nkono, abizanira wa mumarayika munsi y’igiti kinini, abishyira imbere ye. 20  Umumarayika w’Imana y’ukuri aramubwira ati “fata izo nyama n’imigati idasembuwe ubishyire kuri kiriya gitare,+ usukeho umufa.” Nuko abigenza atyo. 21  Umumarayika wa Yehova arambura ukuboko akoza umutwe w’inkoni yari afite kuri izo nyama n’imigati idasembuwe, nuko umuriro uzamuka muri icyo gitare ukongora izo nyama n’iyo migati idasembuwe.+ Uwo mumarayika wa Yehova ahita abura. 22  Gideyoni ahita amenya ko uwo yari umumarayika wa Yehova.+ Aravuga ati “ayii, Yehova Mwami w’Ikirenga, ndagowe kuko nabonye umumarayika wa Yehova amaso ku yandi!”+ 23  Ariko Yehova aramubwira ati “gira amahoro.+ Ntutinye.+ Nturi bupfe.”+ 24  Gideyoni yubakira Yehova igicaniro+ aho hantu, kandi n’ubu kiracyitwa+ Yehova-Shalomu. Kiracyari muri Ofura+ y’Ababiyezeri. 25  Muri iryo joro Yehova aramubwira ati “fata ikimasa cy’umushishe, ikimasa cya so, ikimasa cya kabiri cy’umushishe gifite imyaka irindwi, kandi usenye igicaniro so yubakiye Bayali,+ uteme n’inkingi yera y’igiti iri iruhande rwacyo.+ 26  Wubakire Yehova Imana yawe igicaniro kuri kiriya gihome kirekire, ucyubakishe amabuye atondetse neza, maze ufate icyo kimasa cya kabiri cy’umushishe ugitambire ku nkwi zivuye kuri ya nkingi yera y’igiti uri buteme, kibe igitambo gikongorwa n’umuriro.” 27  Nuko Gideyoni afata abagabo icumi mu bagaragu be, aragenda abikora nk’uko Yehova yabimubwiye.+ Ariko kubera ko yatinyaga cyane abo mu rugo rwa se n’abo muri uwo mugi, aho kubikora ku manywa yabikoze nijoro.+ 28  Abo muri uwo mugi babyutse kare mu gitondo nk’uko bisanzwe, basanga igicaniro cya Bayali cyashenywe, n’inkingi yera y’igiti+ yari iruhande rwacyo bayitemye, na cya kimasa cya kabiri cy’umushishe cyatambiwe ku gicaniro cyahubatswe. 29  Barabazanya bati “ni nde wakoze ibi bintu?” Barabaririza, barashakisha, amaherezo baravuga bati “Gideyoni mwene Yowashi ni we wakoze ibi bintu.” 30  Abo muri uwo mugi babwira Yowashi bati “sohora umuhungu wawe tumwice,+ kuko yashenye igicaniro cya Bayali, akanatema inkingi yera y’igiti yari iruhande rwacyo.” 31  Yowashi+ abaza abari bamuhagurukiye+ ati “ese murashaka kuburanira Bayali kugira ngo murebe niba mushobora kumukiza? Uburanira Bayali wese akwiriye kwicwa muri iki gitondo.+ Niba Bayali ari Imana,+ niyiburanire+ kuko hari umuntu wamusenyeye igicaniro.” 32  Guhera uwo munsi bita Gideyoni Yerubayali,+ bavuga bati “Bayali niyiburanire, kuko hari umuntu wamusenyeye igicaniro.”+ 33  Abamidiyani+ n’Abamaleki+ n’ab’Iburasirazuba+ bose bateranira hamwe nk’umuntu umwe,+ barambuka bakambika mu kibaya cya Yezereli.+ 34  Umwuka wa Yehova+ utwikira Gideyoni, avuza ihembe+ ahamagara Ababiyezeri+ ngo bamukurikire. 35  Yohereza intumwa+ mu Bamanase bose baraza baramukurikira. Nanone yohereza intumwa mu Basheri no mu Bazabuloni no mu Banafutali, baramusanga. 36  Gideyoni abwira Imana y’ukuri ati “niba koko ari jye uzakoresha kugira ngo nkize Isirayeli nk’uko wabisezeranyije,+ 37  dore ngiye gushyira ubwoya ku mbuga bahuriraho. Ikime nigitonda kuri ubwo bwoya gusa ariko ubutaka bubukikije bugakomeza kumuka, ndamenya ko ari jye uzakoresha kugira ngo ukize Abisirayeli nk’uko wabisezeranyije.” 38  Nuko bigenda bityo. Abyutse kare mu gitondo ku munsi ukurikiyeho akamura bwa bwoya, buvamo amazi y’ikime yakuzura ibakure nini banywesha mu minsi mikuru. 39  Icyakora, Gideyoni abwira Imana y’ukuri ati “ntundakarire; reka nongere ngire icyo nkwisabira. Ndakwinginze, reka nongere ngeragereshe ubu bwoya kugira ngo mbyizere neza ntashidikanya. Ndakwinginze, noneho ureke ubwoya bube ari bwo bwumuka, maze ikime gitonde ku butaka bubukikije.” 40  Iryo joro Imana ibimugenzereza ityo; ubwoya buba ari bwo bukomeza kumuka, maze ikime gitonda ku butaka bubukikije.

Ibisobanuro ahagana hasi