Soma ibirimo

Jya kuri meni ya kabiri

Reba urutonde rw'ibirimo

Abahamya ba Yehova

Ikinyarwanda

Bibiliya kuri interineti | BIBILIYA-UBUHINDUZI BW'ISI NSHYA

Abacamanza 16:1-31

16  Umunsi umwe, Samusoni yagiye i Gaza+ ahabona umugore w’indaya, yinjira iwe.+  Nuko babwira ab’i Gaza bati “Samusoni yaje ino.” Bagota aho yari ari,+ iryo joro ryose bamwubikirira ku marembo y’umugi.+ Bamara iryo joro ryose nta wukoma, bibwira bati “nibucya turahita tumwica.”+  Ariko Samusoni araryama ageza mu gicuku. Nuko igicuku kinishye arabyuka, afata inzugi z’amarembo y’umugi,+ azishingurana n’ibikingi byazo byombi hamwe n’igihindizo, abiterera ku bitugu abizamukana+ mu mpinga y’umusozi uteganye n’i Heburoni.+  Nyuma y’ibyo, abenguka umukobwa wo mu kibaya cy’i Soreki witwaga Delila.+  Abami biyunze+ b’Abafilisitiya baza kureba uwo mukobwa baramubwira bati “umushukashuke+ umenye aho imbaraga ze nyinshi ziva, umenye icyo twakora kugira ngo tumuneshe, n’ibyo twamubohesha kugira ngo tumucogoze. Natwe buri wese azaguha ibiceri by’ifeza igihumbi n’ijana.”+  Hanyuma Delila abwira Samusoni ati “rwose mbwira, imbaraga nyinshi ufite uzikura he, kandi se ni iki umuntu yakubohesha kugira ngo agucogoze?”+  Samusoni aramubwira ati “uwambohesha imirya irindwi ikiri mibisi,+ batigeze bumisha, imbaraga zanjye zashira nkamera nk’umuntu usanzwe.”  Ba bami biyunze+ b’Abafilisitiya bazanira Delila imirya irindwi ikiri mibisi, batigeze bumisha. Hanyuma ayibohesha Samusoni.  Bari bamuciriye igico mu kindi cyumba cy’uwo mugore.+ Aramubwira ati “urapfuye Samusoni we, Abafilisitiya+ baragufashe!” Samusoni aca izo njishi nk’uko ubutumba bukaraze bucika iyo bukubiswe n’umuriro.+ Ntibamenya aho imbaraga ze zituruka.+ 10  Nuko Delila+ abwira Samusoni ati “uranshuka kandi ukambeshya.+ None mbwira ndakwinginze, ni iki umuntu yakubohesha.” 11  Aramubwira ati “uwambohesha imigozi mishya itarigeze igira ikindi ikoreshwa, akayikomeza, imbaraga zanjye zashira nkamera nk’umuntu usanzwe.” 12  Delila afata imigozi mishya arayimubohesha, arangije aramubwira ati “urapfuye Samusoni we, Abafilisitiya baragufashe!” Hagati aho, hari abari bamuciriye igico mu kindi cyumba.+ Samusoni ahita aca iyo migozi nk’uca ubudodo, imuva ku maboko.+ 13  Nyuma yaho Delila abwira Samusoni ati “na n’ubu uracyanshuka kandi ukambeshya.+ Mbwira icyo umuntu yakubohesha.”+ Samusoni aramusubiza ati “fata imigabane irindwi y’umusatsi wanjye uyiboheranye ukoresheje urudodo rw’umuboshyi.”+ 14  Nuko ayishimangiza urubambo, arangije aramubwira ati “urapfuye Samusoni we, Abafilisitiya+ baragufashe!” Samusoni ahita akanguka, ashingura urwo rubambo hamwe na rwa rudodo. 15  Uwo mugore abwira Samusoni ati “utinyuka ute kuvuga uti ‘ndagukunda’+ kandi utambwira ibikuri ku mutima? Dore wanshutse incuro eshatu zose ntiwambwira aho imbaraga zawe zituruka.”+ 16  Yakomeje kumubuza amahwemo+ amubwira ayo magambo kandi amuhoza ku nkeke, kugeza ubwo Samusoni* yumvise arembye byo gupfa.+ 17  Amaherezo amubwira ibyari ku mutima we byose,+ ati “icyuma cyogosha+ nticyigeze kingera ku mutwe, kuko ndi Umunaziri w’Imana kuva nkiva mu nda ya mama.+ Baramutse banyogoshe, imbaraga zanjye zahita zimvamo, ngacogora nkamera nk’abandi bantu bose.”+ 18  Delila abonye ko amubwiye ibimuri ku mutima byose, ahita atumaho ba bami biyunze b’Abafilisitiya+ ati “ubu bwo noneho nimuze, kuko yambwiye ibimuri ku mutima byose.”+ Abami biyunze b’Abafilisitiya baraza, bamuzaniye n’amafaranga.+ 19  Delila abikirira Samusoni ku bibero bye, ahamagara umuntu amwogosha ya migabane irindwi y’umusatsi yari ku mutwe we. Hanyuma Delila atangira kwerekana ko yamushoboye, imbaraga za Samusoni zigenda zimuvamo. 20  Delila abwira Samusoni ati “urapfuye Samusoni we, Abafilisitiya baragufashe!” Samusoni ahita akanguka, aribwira ati “ndabacika nk’uko nsanzwe+ mbacika.” Ariko ntiyamenya ko Yehova yari yamukuyeho amaboko.+ 21  Abafilisitiya baramufata bamunogoramo amaso,+ bamujyana i Gaza+ bamubohesha iminyururu ibiri y’umuringa,+ bamugira umusyi+ mu nzu y’imbohe.+ 22  Hagati aho, umusatsi wo ku mutwe we watangiye gukura ari mwinshi nyuma y’aho bamwogosheye.+ 23  Abami biyunze b’Abafilisitiya barakorana kugira ngo batambire imana yabo Dagoni+ igitambo, kandi bishime. Baravugaga bati “imana yacu yahanye umwanzi wacu Samusoni mu maboko yacu!”+ 24  Abantu babonye Samusoni bahita basingiza imana yabo,+ bavuga bati “ni ukubera ko umwanzi wacu+ wari warayogoje igihugu+ cyacu kandi akatwicamo benshi,+ imana yacu yamuhanye mu maboko yacu.” 25  Nuko kubera ko abantu bari banezerewe,+ baravuga bati “nimuzane Samusoni adusetse.”+ Bavana Samusoni mu nzu y’imbohe kugira ngo abasetse,+ bamuhagarika hagati y’inkingi ebyiri. 26  Samusoni abwira umwana w’umuhungu wari umurandase ati “ndeka mfate ku nkingi zifashe iyi nzu, nziyegamize.” 27  (Iyo nzu yari yuzuye abagabo n’abagore, kandi abami biyunze b’Abafilisitiya bose bari bahari.+ Hejuru ku gisenge hari abagabo n’abagore bagera ku bihumbi bitatu barebaga Samusoni igihe yabasetsaga.)+ 28  Samusoni+ atakambira Yehova+ ati “Yehova Mwami w’Ikirenga, ndakwinginze nyibuka,+ Mana y’ukuri, ndakwinginze mpa imbaraga+ ubwa nyuma, kugira ngo nihorere ku Bafilisitiya, nibura mporere rimwe mu maso yanjye.”+ 29  Nuko Samusoni afata inkingi ebyiri zo hagati zari zifashe iyo nzu, afatisha ukuboko kw’iburyo ku nkingi imwe n’ukw’ibumoso ku yindi, 30  aravuga ati “ubugingo bwanjye bupfane+ n’Abafilisitiya.” Arunama aritugatuga, iyo nzu ihita igwira ba bami biyunze b’Abafilisitiya, n’abantu bose bari bayirimo.+ Abantu yishe bagapfana na we bari benshi kurusha abo yari yarishe mu buzima bwe bwose.+ 31  Hanyuma abavandimwe be n’abo mu nzu ya se bose baramanuka batwara umurambo we, bajya kuwuhamba hagati y’i Sora+ na Eshitawoli,+ mu irimbi rya se Manowa.+ Samusoni yari amaze imyaka makumyabiri ari umucamanza wa Isirayeli.+

Ibisobanuro ahagana hasi