Soma ibirimo

Jya kuri meni ya kabiri

Reba urutonde rw'ibirimo

Abahamya ba Yehova

Ikinyarwanda

Umunara w’Umurinzi  |  Ukuboza 2015

 INGINGO Y’IBANZE | NI IKI CYAGUFASHA GUSOBANUKIRWA BIBILIYA?

Uko wasobanukirwa Bibiliya

Uko wasobanukirwa Bibiliya

Tekereza wasuye ikindi gihugu kandi akaba ari ubwa mbere ukigezemo. Uhasanze abantu, imico, ibyokurya n’amafaranga utamenyereye. Birumvikana ko ibyo bishobora kugutesha umutwe.

Ibyo ni na ko bigenda iyo usomye Bibiliya bwa mbere. Iyo uyisoma, umera nk’usubiye mu isi ya kera utazi. Utangira kumva abantu bitwa Abafilisitiya, ukumva imico idasanzwe nko ‘gushishimura imyambaro,’ cyangwa ukumva bavuze ibyokurya byitwa manu n’igiceri cyitwa idarakama (Kuva 16:31; Yosuwa 13:2; 2 Samweli 3: 31; Luka 15:9). Ibyo byose bishobora kugutera urujijo. Kimwe n’umuntu ugeze mu kindi gihugu bwa mbere, iyo ubonye ugusobanurira ibintu bimwe na bimwe, birushaho kuba byiza.

NI IKI CYAFASHIJE ABANTU BA KERA GUSOBANUKIRWA BIBILIYA?

Kuva igihe Ibyanditswe Byera byandikiwe mu kinyejana cya 16 Mbere ya Yesu, abantu bagiye bafashwa kubisobanukirwa. Urugero, Mose wabaye umuyobozi wa mbere w’ishyanga rya Isirayeli, ‘yasobanuye’ Ibyanditswe byariho icyo gihe.—Gutegeka kwa Kabiri 1:5.

Mu myaka igera ku gihumbi yakurikiyeho, hari hakiboneka abantu bashoboye gusobanura Ibyanditswe. Mu wa 455 Mbere ya Yesu, Abayahudi benshi n’abana babo bahuriraga i Yerusalemu ku karubanda, maze abari bafite inshingano yo kwigisha Bibiliya ‘bagasoma mu gitabo [cyera] mu ijwi riranguruye.’ Nanone ‘basobanuraga ibyo basomaga kandi bakabyumvikanisha.’—Nehemiya 8:1-8.

Imyaka igera kuri 500 nyuma yaho, Yesu Kristo na we yakoze uwo murimo wo kwigisha. Ikintu cy’ibanze abantu bari bamuziho ni uko yigishaga neza (Yohana 13:13). Yigishaga imbaga y’abantu benshi cyangwa umuntu ku giti cye. Umunsi umwe yahaye disikuru imbaga y’abantu, maze “batangazwa n’uburyo bwe bwo kwigisha” (Matayo 5: 1, 2; 7: 28). Mu ntangiriro z’umwaka wa 33, yaganiriye n’abigishwa be babiri berekezaga mu mudugudu wari hafi ya Yerusalemu, ‘abasobanurira Ibyanditswe.’—Luka 24:13-15, 27, 32.

Abigishwa ba Yesu na bo bigishaga Ijambo ry’Imana. Hari igihe umutegetsi wo muri Etiyopiya yarimo asoma Ibyanditswe Byera, hanyuma umwigishwa witwaga Filipo aramwegera, aramubaza ati “ese ibyo usoma urabisobanukiwe koko?” Uwo Munyetiyopiya yaramushubije ati “mu by’ukuri se, nabisobanukirwa nte ntabonye unyobora?” Nuko Filipo atangira kumusobanurira.—Ibyakozwe 8: 27-35.

NI IKI CYADUFASHA GUSOBANUKIRWA BIBILIYA MURI IKI GIHE?

Kimwe n’abigishaga Bibiliya kera, Abahamya ba Yehova bakora umurimo wo kwigisha abantu Bibiliya mu bihugu 239 (Matayo 28:19, 20). Bigisha Bibiliya abantu barenga miriyoni icyenda, icyumweru kigashira ikindi kigataha. Mu bo bigisha Bibiliya harimo abantu benshi batari Abakristo. Bayigisha ku buntu kandi bashobora kukwigishiriza mu rugo cyangwa ahandi hantu hakunogeye. Hari n’abiga bakoresheje uburyo bwa videwo kuri telefoni, orudinateri cyangwa ibindi bikoresho by’ikoranabuhanga.

Niba wifuza kwiga Bibiliya, ushobora kubaza umwe mu Bahamya ba Yehova. Uzibonera ko Ibyanditswe Byera bitagoye kubisobanukirwa, ahubwo ko “bifite akamaro ko kwigisha no gucyaha no gushyira ibintu mu buryo no guhanira gukiranuka,” kugira ngo ube ‘wujuje ibisabwa byose, ufite ibikenewe byose kugira ngo ukore umurimo mwiza wose.’—2 Timoteyo 3: 16, 17.