Soma ibirimo

Jya kuri meni ya kabiri

Reba urutonde rw'ibirimo

Abahamya ba Yehova

Ikinyarwanda

Umunara w’Umurinzi  |  Ukwakira 2013

 INGINGO YO KU GIFUBIKO | NI UBUHE BUTUMWA BUKUBIYE MURI BIBILIYA?

Twakomotse he?

Twakomotse he?

Mu magambo make, igitabo cyo muri Bibiliya cy’Intangiriro kivuga uko isanzure ryabayeho, kigira kiti “mu ntangiriro Imana yaremye ijuru n’isi” (Intangiriro 1:1). Imana imaze kurema ibimera n’inyamaswa, yaremye abantu ba mbere ari bo Adamu na Eva. Bari batandukanye n’inyamaswa, kuko bari bafite imico y’Imana mu rugero runaka, kandi bakaba bari bafite uburenganzira bwo kwihitiramo ibibanogeye. Ku bw’ibyo, bashoboraga kuryozwa ibyo bakora. Iyo abo babyeyi bacu ba mbere baza kumvira amabwiriza Imana yabahaye, bari kugira uruhare mu isohozwa ry’umugambi yari ifitiye abantu, ni ukuvuga kubaho iteka ku isi, bafite amahoro n’ubuzima butunganye.

Icyakora, hari ikiremwa cy’umwuka cyangwa umumarayika wigaruriye abantu, maze arabakoresha kugira ngo agere ku ntego ze z’ubwikunde. Nguko uko uwo mumarayika yahindutse Satani, bisobanura “Urwanya.” Satani yakoresheje inzoka ashuka Eva, amubwira ko aramutse atayobowe n’Imana yabaho neza. Adamu na Eva bakurikiye Satani, bituma ubucuti bari bafitanye n’Umuremyi wabo buzamo agatotsi. Kuba ababyeyi bacu ba mbere barahisemo nabi, byatumye batakaza ibyiringiro by’ubuzima bw’iteka, maze twese baturaga icyaha, kudatungana n’urupfu.

Imana yahise igaragaza umugambi yari ifite wo gukemura icyo kibazo kibabaje cyari kimaze kuvuka, iha abari kuzakomoka kuri Adamu uburyo bwo kuzabaho iteka. Imana yavuze ko umuntu wihariye ugereranywa n“urubyaro,” yari kuzarimbura Satani kandi akavanaho imibabaro yose yatewe na Satani hamwe na Adamu na Eva (Intangiriro 3:15). Urwo ‘rubyaro’ rwari kuzaba nde? Igihe ni cyo cyari gutanga igisubizo.

Hagati aho, Satani yakomeje gukora uko ashoboye ngo aburizemo umugambi w’Imana uhebuje. Abantu babi bagiye barushaho kwiyongera, maze Imana yiyemeza kubarimbuza umwuzure. Yahaye umukiranutsi Nowa amabwiriza yo kubaka inkuge yari kuzarokokeramo, we n’abari bagize umuryango we hamwe n’inyamaswa yari yasabwe kwinjizamo. Iyo nkuge yari nk’igisanduku kinini cyari kureremba hejuru y’amazi.

Nyuma y’umwaka umwuzure utangiye, Nowa n’abari bagize umuryango we basohotse mu nkuge, baza ku isi yari imaze gusukurwa. Ariko “urubyaro” rwari rutaraza.

Bivugwa mu Ntangiriro igice cya 1-11; Yuda 6, 14, 15 no mu Byahishuwe 12:9.