Soma ibirimo

Jya kuri meni ya kabiri

Reba urutonde rw'ibirimo

Abahamya ba Yehova

Ikinyarwanda

Umunara w’Umurinzi—wo kwigwa  |  Mata 2014

Ese wishimira ko Yehova akwitegereza?

Ese wishimira ko Yehova akwitegereza?

“Amaso ya Yehova ari hose, yitegereza ababi n’abeza.”—IMIG 15:3.

1, 2. Kuba Yehova atwitegereza bitandukaniye he n’uko za kamera zigenzura abantu?

IBIHUGU byinshi birushaho gushyira za kamera ku mihanda zigenzura uko imodoka zigenda kandi zigafata amafoto y’impanuka zikorwa. Iyo izo kamera zifashe amafoto y’umushoferi wagize impanuka agahita yigendera, ayo mafoto ashobora gufasha abapolisi kumubona maze bakamuta muri yombi. Kubera ko izo kamera ziba ziri ahantu henshi, abakora amakosa basigaye batahurwa mu buryo bworoshye bagahanwa.

2 Ariko se kuba ahantu henshi hasigaye hari za kamera, byaba bifite aho bihuriye no kuba Data wuje urukundo Yehova ahora atwitegereza? Bibiliya ivuga ko amaso ye “ari hose” (Imig 15:3). Ese ibyo byaba bishaka kuvuga ko ahora agenzura ibyo dukora? Ese Imana itwitegereza ishaka gusa kureba aho twica amategeko yayo maze ngo iduhane (Yer 16:17; Heb 4:13)? Oya rwose. Impamvu y’ibanze ituma Yehova atwitegereza ni uko akunda buri wese muri twe, kandi akaba yifuza ko tumererwa neza.—1 Pet 3:12.

3. Ni ibihe bintu bitanu turi busuzume bigaragaza ko Imana itwitaho?

3 Ni iki kizadufasha gusobanukirwa ko Imana itwitegereza kubera ko idukunda? Reka turebe uko ibigaragaza.  Ibikora (1) ituburira iyo ibonye dutangiye kugira ibyifuzo bibi, (2) idukosora igihe twakoze amakosa, (3) ituyobora ikoresheje amahame dusanga mu Ijambo ryayo, (4) idufasha mu gihe duhanganye n’ibigeragezo binyuranye, (5) itugororera mu gihe dukoze ibyiza.

IMANA ITWITEGEREZA ISHAKA KUTUBURIRA

4. Ni iki Yehova yari agamije igihe yaburiraga Kayini amubwira ko icyaha cyari ‘cyubikiriye ku muryango we’?

4 Reka tubanze dusuzume ukuntu Imana ituburira iyo dutangiye kugira ibyifuzo bibi (1 Ngoma 28:9). Kugira ngo turusheho gusobanukirwa iyo mpamvu ituma Imana itwitegereza, nimucyo turebe icyo yakoreye Kayini ‘wazabiranyijwe n’uburakari’ igihe Imana itamwemeraga. (Soma mu Ntangiriro 4:3-7.) Yehova yateye Kayini inkunga yo ‘guhindukira agakora ibyiza.’ Yehova yamubwiye ko nadahindukira, ‘icyaha cyari cyubikiriye ku muryango we.’ Yaramubajije ati ‘ese uzashobora kukinesha?’ Yashakaga ko Kayini yumvira umuburo maze akongera kumwemera. Kwemerwa n’Imana byari gutuma akomeza kugirana imishyikirano myiza na yo.

5. Ni mu buhe buryo Yehova atuburira kugira ngo twikuremo ibyifuzo bibi dushobora kuba dufite?

5 Twebwe se byifashe bite? Yehova areba mu mitima yacu; amenya ibitekerezo byacu n’ibyifuzo byacu, kandi nta cyo dushobora kumuhisha. Data udukunda yifuza ko tugendera mu nzira zo gukiranuka, ariko ntabiduhatira. Akoresha Ijambo rye Bibiliya kugira ngo atuburire igihe tugiye kunyura mu nzira idakwiriye. Mu buhe buryo? Iyo dusoma Bibiliya buri munsi, akenshi tugera ku mirongo idufasha kwikuramo ibyifuzo bibi. Nanone kandi, gusoma ibitabo byacu bishobora gutuma tumenya intege nke dufite, n’uko twazirwanya. Byongeye kandi, mu materaniro yacu twese duhabwa inama ziba ziziye igihe.

6, 7. (a) Ni iki kigaragaza ko Imana yita kuri buri wese mu bagaragu bayo? (b) Ni iki usabwa kugira ngo Yehova akwiteho?

6 Iyo miburo yose igaragaza ko Yehova akunda buri wese muri twe. Ni iby’ukuri ko Bibiliya imaze ibinyejana byinshi yanditswe, n’ibitabo byacu bikaba byandikirwa abantu babarirwa muri za miriyoni. Amateraniro yacu na yo aba agamije gufasha abagize itorero bose. Nyamara kandi, binyuze kuri ibyo byose, Yehova yagiye atuma werekeza ubwenge bwawe ku Ijambo rye, bityo uhindura ibitekerezo byawe. Ku bw’ibyo, dushobora kuvuga ko icyo ari ikimenyetso kigaragaza ko Yehova akwitaho wowe ku giti cyawe.

Umutimanama wacu watojwe na Bibiliya udufasha kwirinda akaga (Reba paragarafu ya 6 n’iya 7)

7 Kugira ngo imiburo y’Imana itugirire akamaro, mbere na mbere tugomba kwemera ko itwitaho. Hanyuma tugomba kumvira ibyo Ijambo ryayo ritubwira, tukihatira kwikuramo ibitekerezo byose bitayishimisha. (Soma muri Yesaya 55:6, 7.) Kumvira imiburo duhabwa bizaturinda ibibazo byinshi. Ariko se byagenda bite turamutse turenze kuri iyo miburo? Icyo gihe Data udukunda yadufasha ate?

DATA UTWITAHO ARADUKOSORA

8, 9. Ni mu buhe buryo inama Yehova aduha akoresheje abagaragu be zigaragaza ko atwitaho cyane? Tanga urugero.

8 Dushobora kumenya neza kurushaho ko Yehova atwitaho mu gihe dukosowe. (Soma mu Baheburayo 12:5, 6.) Mu by’ukuri, ntidushimishwa no kugirwa inama cyangwa guhanwa (Heb 12:11). Ariko iyo umuntu atugiriye inama ishingiye kuri Bibiliya, ni iby’ingenzi cyane ko dusobanukirwa impamvu ayiduhaye. Ntaba agamije kutubabaza, ahubwo aba abona ko dushobora gutakaza imishyikirano dufitanye na Yehova Imana. Aba yemeye gufata igihe cye kandi agashyiraho  imihati kugira ngo atwereke uko twagarukira Yehova akoresheje Bibiliya. Twumvira iyo nama aduhaye kuko iba ituruka kuri Yehova.

9 Reka turebe ukuntu inama umuntu ahawe ishobora kugaragaza ko Imana itwitaho. Hari umuvandimwe wakundaga kureba porunogarafiya mbere y’uko amenya ukuri, ariko aza gucika kuri iyo ngeso. Icyakora, yari agifite ibitekerezo bya kera, byamugurumaniragamo nk’inkwi ziri mu muriro. Igihe yabonaga telefoni nshya, yasubiye ku ngeso yo kureba porunogarafiya (Yak 1:14, 15). Yakoreshaga iyo telefoni akajya ku mbuga za interineti zerekana porunogarafiya. Umunsi umwe, ubwo we n’umusaza w’itorero babwirizaga bakoresheje telefoni, yamutije telefoni ye kugira ngo arebemo za aderesi. Igihe uwo musaza yatangiraga gukoresha iyo telefoni, hahise hagaragara za mbuga zerekana porunogarafiya. Uwo musaza yahise amugira inama. Yemeye iyo nama yari iziye igihe, kandi yaje kunesha iyo ngeso. Birakwiriye rwose ko dushimira Data wo mu ijuru utwitaho, we ubona ibyaha byacu bihishwe maze akadukosora mbere y’uko ibintu bizamba.

GUKURIKIZA AMAHAME YA BIBILIYA BITUGIRIRA AKAMARO

10, 11. (a) Ni mu buhe buryo washakira ubuyobozi ku Mana? (b) Umuryango umwe wiboneye ute akamaro ko gukurikiza ubuyobozi Yehova atanga?

10 Umwanditsi wa zaburi yaririmbiye Yehova ati ‘unyoboza inama zawe’ (Zab 73:24). Igihe cyose dukeneye ubuyobozi, dushobora ‘kuzirikana’ Yehova dusuzuma Ijambo rye kugira ngo tumenye uko abona ibintu. Gukurikiza amahame yo muri Bibiliya ntibitugirira akamaro mu buryo bw’umwuka gusa, ahubwo hari n’igihe bituma tubona ibyo dukeneye mu buryo bw’umubiri.—Imig 3:6.

11 Urugero rugaragaza ukuntu Yehova yagiye ayobora abagaragu be, ni ibyabaye ku muvandimwe wabaga mu isambu yatishaga, mu karere k’imisozi miremire ya Masbate, muri Filipine. We n’umugore we bari abapayiniya b’igihe cyose nubwo bari bafite abana benshi. Umunsi umwe, batunguwe no kubona ibaruwa ya nyir’isambu yababwiraga ko bagombaga kuyivamo. Byari bitewe n’iki? Abantu bari bababeshyeye bavuga ko ari abahemu. Nubwo uwo muvandimwe yari ahangayikishijwe no kubona aho yari gutuza umuryango we, yaravuze ati  “Yehova azatwitaho. Igihe cyose aduha ibyo dukeneye, uko byaba bimeze kose.” Uwo muvandimwe ntiyibeshyaga. Nyuma y’iminsi runaka, uwo muryango wahumurijwe no kumenya ko batacyirukanywe muri iyo sambu. Byari byagenze bite? Nyir’iyo sambu yaje kubona ko nubwo bari babeshyeye umuryango w’uwo Muhamya, wakurikije amahame ya Bibiliya ukomeza kurangwa no kubaha ndetse n’amahoro. Ibyo byashimishije cyane nyir’iyo sambu ku buryo atabemereye kuyigumamo gusa, ahubwo yanabahaye undi murima wo guhinga. (Soma muri 1 Petero 2:12.) Koko rero, Yehova atuyobora akoresheje Ijambo rye, akadufasha guhangana n’ibibazo by’ubuzima.

YEHOVA NI INCUTI IDUFASHA KWIHANGANIRA IBIGERAGEZO

12, 13. Ni iyihe mimerere ishobora gutuma bamwe bibaza niba Imana ibona imibabaro yabo?

12 Hari igihe ibigeragezo duhanganye na byo bisa n’aho bitinze. Dushobora kuba dufite indwara idakira, cyangwa tumaze igihe turwanywa n’abagize umuryango wacu, cyangwa se duhora dutotezwa. Ikindi kintu kigoye kwihanganira dushobora guhura na cyo ni ukutumvikana n’umwe mu bagize itorero bitewe na kamere zitandukanye.

13 Urugero, umuvandimwe ashobora kukubwira amagambo akakubabaza. Ushobora kuvuga uti “ibi ntibyagombye kuba mu muteguro w’Imana!” Nyamara, uwo muvandimwe wakubwiye ayo magambo agize atya ahabwa inshingano mu itorero kandi abandi bamubona neza. Uribajije uti “ese ibi bishoboka bite? Yehova ntabibona? Ese nta cyo azabikoraho?”—Zab 13:1, 2; Hab 1:2, 3.

14. Ni iyihe mpamvu ishobora gutuma Imana itagira icyo ikora ku bibazo byacu?

14 Yehova ashobora kuba afite impamvu zumvikana zituma atagira icyo abikoraho. Urugero, ushobora kuba wumva ko undi ari we ufite amakosa, ariko Imana yo ikaba atari ko ibibona. Ishobora kuba ibona ko ufite amakosa kurusha uko wowe ubitekereza. Amagambo wumvaga ko ababaje ashobora mu by’ukuri kuba ari inama ikwiriye, wagombye gutekerezaho. Mu nkuru y’ibyabaye mu mibereho ya Karl Klein wigeze kuba mu Nteko Nyobozi, yavuze ko hari igihe umuvandimwe J. F. Rutherford yamucyashye adaciye ku ruhande. Nyuma yaho, umuvandimwe Rutherford yashuhuje umuvandimwe Klein yishimye cyane ati “bite Karl!” Ariko kandi, kubera ko umuvandimwe Klein yari akibabajwe n’uko yari yamucyashye, yamwikirije atabishaka. Umuvandimwe Rutherford abonye ko umuvandimwe Klein yari akirakaye, yamubwiye ko yashoboraga kugwa mu mutego wa Satani. Nyuma yaho, umuvandimwe Klein yaranditse ati “iyo turakariye umuvandimwe, cyane cyane bitewe n’uko yavuze ikintu yagombaga kutubwira kuko abifitiye uburenganzira, tuba dushobora kugwa mu mutego wa Satani.” *

15. Ni iki kizatuma utarambirwa mu gihe utegereje ko Yehova agufasha mu bibazo ufite?

15 Ariko kandi, dushobora kumva turambiwe mu gihe dufite ikibazo gisa n’aho kitazigera kirangira. Twakora iki? Reka tuvuge ko utwaye imodoka mu muhanda urimo imodoka nyinshi zigenda buhoro cyane. Ntuzi igihe uri bumare utegereje ko zitangira kwihuta. Urakaye ukagerageza gushaka indi nzira, ushobora kuyoba. Ushobora kuzagera iyo ujya byagutwaye igihe kinini kurusha icyo wari gukoresha iyo uza gutegereza wihanganye muri wa muhanda. Mu buryo nk’ubwo, nukomeza gukurikiza ubuyobozi  uhabwa n’Ijambo ry’Imana, Yehova azagufasha gukomeza kwihangana.

16. Ni iyihe mpamvu yindi ishobora gutuma Yehova ahitamo kutagira icyo akora ku bigeragezo duhanganye na byo?

16 Yehova ashobora kutagira icyo akora ku bibazo dufite, kuko ashaka ko bigira icyo bitwigisha. (Soma muri 1 Petero 5:6-10.) Imana si yo ituma duhura n’ibigeragezo (Yak 1:13). ‘Umwanzi wacu Satani’ ni we uteza ibyinshi mu bigeragezo. Icyakora, Imana ishobora gukoresha imimerere igoranye turimo ikadufasha gukura mu buryo bw’umwuka. Ibona imibabaro yacu, kandi ‘[kubera ko] itwitaho,’ izatuma iyo mibabaro imara “akanya gato” gusa. Ujye wiringira ko Yehova akwitaho kandi ko azaguha imbaraga zo kwihangana kugeza ku iherezo.—2 Kor 4:7-9.

YEHOVA ARATUGORORERA

17. Ni ba nde Yehova areba, kandi kuki?

17 Impamvu ya nyuma ituma Imana itugenzura irushaho kuduha icyizere. Binyuze kuri Hanani bamenya, yabwiye Umwami Asa iti “amaso ya Yehova areba ku isi hose kugira ngo yerekane imbaraga ze arengera abafite umutima umutunganiye” (2 Ngoma 16:9). Imana yabonye ko Asa atari afite umutima uyitunganiye, ariko wowe nukomeza gukora ibikwiriye, ‘izerekana imbaraga zayo’ ikurengere.

18. Mu gihe wumva ko nta wita ku byiza ukora, ni iki wagombye kwibuka ku birebana na Yehova? (Reba ifoto ibimburira iki gice.)

18 Imana yifuza ko ‘dushaka ibyiza,’ ‘tugakunda ibyiza,’ kandi ‘tugakora ibyiza’ kugira ngo ‘itugirire imbabazi’ cyangwa itugororere (Amosi 5:14, 15; 1 Pet 3:11, 12). Yehova abona abakiranutsi kandi akabaha imigisha (Zab 34:15). Urugero, tekereza ku babyaza b’Abaheburayokazi, ari bo Shifura na Puwa. Igihe Abisirayeli bari mu bubata bw’Abanyegiputa, abo bagore bombi batinye Imana kurusha uko batinyaga Farawo, wari wabategetse kwica abana bose b’abahungu b’Abaheburayo bavukaga. Uko bigaragara, kuba baratinyaga Imana byatumye batica izo mpinja. Nyuma yaho Imana “yaje gutuma bagira imiryango” (Kuva 1:15-17, 20, 21). Ibikorwa byabo byiza ntibyigeze byisoba amaso ya Yehova areba hose. Rimwe na rimwe, dushobora kumva ko nta wita ku byiza dukora. Ariko Yehova we abyitaho. Abona ibyiza byose twakoze kandi azatugororera.—Mat 6:4, 6; 1 Tim 5:25; Heb 6:10.

19. Mushiki wacu yamenye ate ko ibikorwa byiza bitisoba Yehova?

19 Hari mushiki wacu wo muri Otirishiya wabonye ko imihati yashyiragaho itisobaga Imana. Kubera ko akomoka muri Hongiriya, yahawe aderesi y’umuntu uvuga ururimi rw’igihongiriya kugira ngo azajye kumubwiriza. Yahise ajya kumureba, ariko asanga nta muntu uri mu rugo. Yasubiyeyo incuro nyinshi. Hari igihe yajyaga yumva hari umuntu, ariko ntihagire umukingurira. Yasigaga ibitabo, amabaruwa yabaga yamwandikiye, aderesi ze n’ibindi. Amaze umwaka n’igice ajyayo, amaherezo yakinguriwe n’umugore wamwakiriye neza akamubwira ati “nimwinjire. Nagiye nsoma ibintu byose wansigiraga kandi nari ngutegereje.” Uwo mugore yari amaze igihe yivuza kanseri, ku buryo atashoboraga kwakira abantu. Yatangiye kumwigisha Bibiliya. Imana yagororeye uwo mushiki wacu bitewe n’imihati yashyizeho!

20. Kuba Yehova akureba bituma wumva umeze ute?

20 Yehova abona ibyo ukora byose, kandi azakugororera. Kumenya ko Imana ikureba ntibyagombye gutuma wumva ko ikugenzura nk’uko wagenzurwa na kamera. Ahubwo bijye bituma urushaho kugirana imishyikirano ya bugufi n’Imana ikwitaho.

^ par. 14 Inkuru ivuga ibyabaye mu mibereho y’umuvandimwe Klein yasohotse mu Munara w’Umurinzi wo ku itariki ya 1 Gicurasi 1985 (mu gifaransa).