Soma ibirimo

Jya kuri meni ya kabiri

Reba urutonde rw'ibirimo

Abahamya ba Yehova

Ikinyarwanda

Umunara w’Umurinzi—wo kwigwa  |  Kamena 2017

Komeza kwibanda ku kibazo cy’ingenzi

Komeza kwibanda ku kibazo cy’ingenzi

“Abantu bamenye ko wowe witwa Yehova, ari wowe wenyine Usumbabyose mu isi yose.”​—ZAB 83:18.

INDIRIMBO: 46, 136

1, 2. (a) Ni ikihe kibazo cy’ingenzi kireba abantu bose? (b) Kuki twagombye gusobanukirwa neza iby’icyo kibazo?

MURI iki gihe abantu benshi bahangayikishwa n’amafaranga. Bahora biruka inyuma y’ubutunzi kandi bagatinya gusubira inyuma mu by’ubukungu. Abandi bo bahangayikishwa n’imiryango yabo, kugira ubuzima bwiza no kugira icyo bageraho.

2 Icyakora ikibazo cy’ingenzi kitureba twese ni uko ubutegetsi bw’ikirenga bwa Yehova bwarwanyijwe. Ni yo mpamvu tugomba guhora tuzirikana ko ubutegetsi bw’ikirenga bwa Yehova ari bwo bw’ingenzi kuruta ibindi bintu byose. Ariko tutabaye maso, dushobora guheranwa n’ibibazo duhura na byo, bigatuma tutibuka icyo kibazo cy’ingenzi cyane. Iyo dushyigikiye ubutegetsi bw’ikirenga bwa Yehova, bidufasha guhangana n’ibibazo duhura na byo, kandi tukarushaho kwegera Yehova.

KUKI UBUTEGETSI BW’IKIRENGA BWA YEHOVA ARI BWO BW’INGENZI?

3. Satani yavuze iki ku birebana n’ubutegetsi bw’Imana?

3 Satani yatumye ubutegetsi bw’ikirenga bwa Yehova bushidikanywaho. Yavuze ko Yehova ategeka nabi kandi ko atatwifuriza ibyiza. Satani yavuze ko abantu baramutse bitegetse ari bwo  barushaho kumererwa neza (Intang 3:1-5). Nanone yavuze ko nta muntu ubera Imana indahemuka abikuye ku mutima. Yavuze ko baramutse bahuye n’ibigeragezo, bose bahita bayitera umugongo (Yobu 2:4, 5). Ibyo birego bya Satani ni byo byatumye Yehova yemera ko abantu biyobora, kugira ngo bibonere ukuntu kubaho batayobowe na we ari bibi cyane.

4. Kuki ikibazo kirebana n’ubutegetsi bw’ikirenga kigomba gukemurwa?

4 Birumvikana ko Yehova yari azi neza ko ibirego bya Satani ari ibinyoma. None se kuki yemereye Satani kumara igihe kirekire agaragaza niba ibyo yavuze ari ukuri? Igisubizo cy’icyo kibazo kireba abantu n’abamarayika. (Soma muri Zaburi ya 83:18.) Adamu na Eva banze ubutegetsi bwa Yehova, kandi kuva icyo gihe n’abandi benshi barabwanze. Ibyo byashoboraga gutuma bamwe batekereza ko ibirego bya Satani bifite ishingiro. Igihe cyose icyo kibazo kizaba kitarakemurwa, hazakomeza kubaho intambara zishyamiranya ibihugu, amoko, imiryango n’abantu ku giti cyabo. Icyakora nibimara kugaragara ko Yehova ari we ukwiriye kuba umutegetsi w’ikirenga, abantu n’abamarayika bazagandukira ubutegetsi bwe bukiranuka kugeza iteka ryose. Icyo gihe amahoro azongera aganze hose.—Efe 1:9, 10.

5. Abantu bagaragaza bate ko bemera ko Yehova ari we ukwiriye kuba umutegetsi w’ikirenga?

5 Yehova azagaragaza ko ari we ukwiriye kuba umutegetsi w’ikirenga kandi ubutegetsi bwa Satani n’abantu buzatsindwa, buvanweho burundu. Ubutegetsi bw’Imana buyobowe na Mesiya buzatsinda, kandi abantu bakomeza kuba indahemuka bazaba baragaragaje ko abantu bashobora gushyigikira ubutegetsi bwayo (Yes 45:23, 24). Ese wifuza kubarirwa mu bashyigikira mu budahemuka ubutegetsi bw’ikirenga bwa Yehova? Nta gushidikanya ko ubyifuza. Niba rero ubyifuza, ugomba gusobanukirwa impamvu ubutegetsi bw’ikirenga ari ubw’ingenzi.

IKIBAZO CY’UBUTEGETSI BW’IKIRENGA BWA YEHOVA NI CYO CYIHUTIRWA KURUTA KO TUBONA AGAKIZA

6. Ubutegetsi bw’ikirenga bwa Yehova ni ubw’ingenzi mu rugero rungana iki?

6 Nk’uko twatangiye tubivuga, ikibazo cy’ingenzi kireba abantu bose gifitanye isano no kugaragaza ko Yehova ari we ukwiriye kuba umutegetsi w’ikirenga. Ni byo by’ingenzi cyane kuruta ibyishimo umuntu ashobora kugira. Ese ibyo byaba bishaka kuvuga ko Yehova atatwitaho, kandi ko adashishikajwe n’uko tubona agakiza? Oya rwose. Kubera iki?

7, 8. Kuki ikibazo cy’ubutegetsi bw’ikirenga bw’Imana nigikemuka bizatugirira akamaro?

7 Yehova akunda abantu cyane kandi abona ko bafite agaciro. Yemeye ko amaraso y’Umwana we aduhesha agakiza k’iteka (Yoh 3:16; 1 Yoh 4:9). Yehova adashohoje amasezerano ye, Satani yabona icyo aheraho avuga ko Imana ibeshya kandi ikima abantu ibyiza, bityo ikaba itegeka nabi. Nanone byatuma abantu batekereza ko abakobanyi barwanya Imana bafite ishingiro. Abo bakobanyi ni bo bavuga bati “uko kuhaba kwe kwasezeranyijwe kuri he? Dore uhereye igihe ba sogokuruza basinziriye mu rupfu, ibintu byose bikomeza kumera nk’uko byahoze kuva isi yaremwa” (2 Pet 3:3, 4). Ku bw’ibyo rero, Yehova abona ko namara kugaragaza ko ari we ukwiriye kuba umutegetsi w’ikirenga, abantu bumvira na bo bazabona agakiza. (Soma muri Yesaya 55:10, 11.) Byongeye kandi, ubutegetsi bw’ikirenga bwa Yehova burangwa n’urukundo. Ubwo rero dushobora kwiringira ko azakomeza gukunda abagaragu be bizerwa, akabona ko bafite agaciro kandi akabishimira.—Kuva 34:6.

 8 Kuba tubona ko ubutegetsi bw’ikirenga bwa Yehova ari bwo bw’ingenzi, ntibisobanura ko tudashishikajwe no kubona agakiza cyangwa ko tubona ko nta gaciro dufite mu maso ye. Yehova atwitaho cyane. Ariko tugomba gukomeza kuzirikana ko ubutegetsi bwe bw’ikirenga ari bwo bw’ingenzi cyane kandi tukabushyigikira mu budahemuka.

YOBU YAHINDUYE UKO YABONAGA IBINTU

9. Satani yashinje iki Yobu? (Reba ifoto ibimburira iki gice.)

9 Ni iby’ingenzi ko dukomeza kubona ibintu mu buryo bukwiriye. Ibyo bigaragazwa n’igitabo cya Yobu, kikaba ari kimwe mu bitabo bya Bibiliya byanditswe mbere. Icyo gitabo kigaragaza ko Satani yavuze ko iyo Yobu ahura n’imibabaro ikomeye yari kwihakana Imana. Satani yanasabye Imana ko yateza Yobu imibabaro. Yehova yarabyanze, ariko yemerera Satani kugerageza Yobu, aramubwira ati “ibyo atunze byose biri mu maboko yawe.” (Soma muri Yobu 1:7-12.) Mu gihe gito, Yobu yahise apfusha abagaragu be, atakaza ibyo yari atunze byose n’abana be icumi barapfa. Satani yakoze ku buryo Yobu akeka ko Imana ari yo yamuteje ibyo bigeragezo (Yobu 1:13-19). Hanyuma Satani yateje Yobu indwara iteye ishozi kandi yamubabazaga cyane (Yobu 2:7). Umubabaro we warushijeho kwiyongera igihe umugore we n’abandi bantu batatu bari bigize incuti ze, bamubwiraga amagambo amushengura umutima kandi amuca intege.—Yobu 2:9; 3:11; 16:2.

10. (a) Yobu yagaragaje ate ko yari indahemuka? (b) Kuki Yobu yari akeneye gukosorwa?

10 Ese ibyo Satani yavugaga byari ukuri? Oya rwose. Nubwo Yobu yababaye cyane, ntiyigeze atera Imana umugongo (Yobu 27:5). Icyakora hari igihe Yobu yatangiye kubona ibintu mu buryo budakwiriye. Yakomeje kwemeza ko ari umukiranutsi, agera nubwo yifuza cyane kumenya impamvu agerwaho n’imibabaro (Yobu 7:20; 13:24). Dushobora gutekereza ko Yobu yari afite ishingiro bitewe n’uko yababaraga. Ariko Imana yabonye ko ikwiriye gukosora imitekerereze ye. Yehova yamubwiye iki?

11, 12. Yehova yafashije Yobu gusobanukirwa iki? Yobu yitwaye ate?

11 Ibyo Imana yabwiye Yobu bigaragara mu bice bine by’icyo gitabo, kuva ku gice cya 38 kugeza ku cya 41. Ariko nta na hamwe Imana yabwiye Yobu impamvu yatumye agerwaho n’iyo mibabaro. Yehova ntiyavugishije Yobu agamije kumusobanurira impamvu yababaraga, nk’aho yagombaga kwiregura. Ahubwo yifuzaga kumufasha kubona ko Imana ikomeye cyane kumurusha, mbese ko Yobu nta  cyo yari cyo. Yafashije Yobu kubona ko hari ibindi bibazo bikomeye bigomba kwitabwaho. (Soma muri Yobu 38:18-21.) Ibyo byatumye Yobu akomeza kubona ibintu uko bikwiriye.

12 Ese kuba Yehova yaragiriye Yobu inama idaciye ku ruhande kandi Yobu yari yaribabariye, byaba bishaka kuvuga ko Yehova atishyira mu mwanya w’abandi? Oya rwose, kandi na Yobu ntiyigeze atekereza ko Imana itamwitayeho. Nubwo Yobu yababaye cyane, yishimiye iyo nama. Yaravuze ati “ni yo mpamvu nisubiyeho, nkaba nihannye, nkicara mu mukungugu no mu ivu” (Yobu 42:1-6). Yobu yari yabanje gukosorwa n’umusore witwaga Elihu (Yobu 32:5-10). Yobu amaze kwemera ko Imana imukosora kandi agahindura uko yabonaga ibintu, Yehova yabwiye abandi ko yemeraga Yobu kuko yari yarakomeje kuba indahemuka mu bigeragezo.—Yobu 42:7, 8.

13. Inama Yehova yagiriye Yobu yamufashije ite n’igihe ibigeragezo bye byari byararangiye?

13 Inama Yehova yagiriye Yobu yakomeje kumufasha n’igihe ibigeragezo bye byari byararangiye. Yamufashije ite? “Yehova yahaye Yobu umugisha uruta uwo yari yaramuhaye mbere.” Nyuma y’igihe “yaje kugira abahungu barindwi n’abakobwa batatu” (Yobu 42:12-14). Nubwo Yobu yakundaga abo bana, yajyaga yibuka abana be bishwe na Satani. Wenda hari igihe yibukaga imibabaro yahuye na yo. Kandi nubwo yaje gusobanukirwa neza impamvu yageragejwe, birashoboka ko rimwe na rimwe yibazaga niba byari ngombwa ko ababazwa bene ako kageni. Ibyo yaba yaribazaga byose, ashobora kuba yarazirikanaga inama Imana yamugiriye. Ibyo byamufashaga gukomeza kubona ibintu mu buryo bukwiriye kandi bikamuhumuriza.—Zab 94:19.

Ese dushobora kureka kwibanda ku bibazo byacu, ahubwo tukibanda ku kibazo cy’ingenzi? (Reba paragarafu ya 14)

14. Ibyabaye kuri Yobu bitwigisha iki?

14 Gutekereza ku byabaye kuri Yobu bizadufasha kubona ibintu uko bikwiriye kandi biduhumurize. Iyo nkuru ya Yobu iri mu byo Yehova yandikishirije “kutwigisha, kugira ngo tugire ibyiringiro binyuze mu kwihangana kwacu no ku ihumure rituruka mu Byanditswe” (Rom 15:4). None se ibyabaye kuri Yobu bitwigisha iki? Tujye twirinda guheranwa n’ibibazo byacu ku buryo twibagirwa ikibazo cy’ingenzi, gifitanye isano n’ubutegetsi bw’ikirenga bwa Yehova. Nanone tujye twigana Yobu, dushyigikire ubutegetsi bwa Yehova kandi dukomeze kuba indahemuka mu bigeragezo.

15. Kwihangana mu gihe dufite ibibazo bitumarira iki?

15 Ibyabaye kuri Yobu biraduhumuriza kubera ko bitwereka ko tutageragezwa bitewe n’uko Yehova atatwishimira, ahubwo  ibigeragezo biduha uburyo bwo kugaragaza ko dushyigikira ubutegetsi bwe bw’ikirenga (Imig 27:11). Iyo twihanganye bituma ‘Imana itwemera,’ kandi tukagira ibyiringiro bihamye. (Soma mu Baroma 5:3-5.) Ibyabaye kuri Yobu bigaragaza ko “Yehova afite urukundo rurangwa n’ubwuzu akaba n’umunyambabazi” (Yak 5:11). Ku bw’ibyo, twiringiye tudashidikanya ko azatugororera, twe n’abandi bose bashyigikira ubutegetsi bwe bw’ikirenga. Ibyo bidufasha ‘kwihanganira ingorane zose dufite ibyishimo.’—Kolo 1:11.

KOMEZA KUZIRIKANA IKIBAZO CY’INGENZI

16. Kuki twagombye kuzirikana ko ubutegetsi bw’ikirenga bwa Yehova ari bwo bw’ingenzi?

16 Mu by’ukuri, gukomeza kuzirikana ko ubutegetsi bw’ikirenga bwa Yehova ari bwo bw’ingenzi cyane, bishobora kutugora. Hari igihe ibibazo biduherana kandi iyo dukomeje kubitekerezaho, n’ibisa n’aho byoroheje bishobora kuturemerera. Ku bw’ibyo rero, mu gihe duhanganye n’ibibazo, byaba byiza tugiye twibuka ko gushyigikira ubutegetsi bw’ikirenga bw’Imana ari byo by’ingenzi kuruta ibibazo byacu.

17. Guhugira mu murimo wa Yehova bidufasha bite kuzirikana ikibazo cy’ingenzi?

17 Gukora umurimo wa Yehova buri gihe bishobora kudufasha gukomeza kwibanda ku kibazo cy’ingenzi. Urugero, Umuhamya witwa Renee yaturitse umutsi wo mu bwonko akajya ababara cyane, aza no kurwara kanseri. Iyo yabaga ari mu bitaro, yabwirizaga abakozi bo kwa muganga, abarwayi n’abamusuraga. Hari igihe yamaze mu bitaro ibyumweru bibiri n’igice, abwiriza amasaha 80. N’igihe Renee yari hafi gupfa, ntiyigeze yibagirwa ko gushyigikira ubutegetsi bw’ikirenga bwa Yehova ari byo by’ingenzi, kandi byamworoherezaga ububabare.

18. Ibyabaye kuri mushiki wacu bitwigisha iki ku birebana no gushyigikira ubutegetsi bw’ikirenga bwa Yehova?

18 Nanone dushobora gushyigikira ubutegetsi bw’ikirenga bwa Yehova no mu gihe duhanganye n’ibibazo bito bito duhura na byo buri munsi. Hari mushiki wacu witwa Jennifer wamaze iminsi itatu ku kibuga yabuze indege. Igihe cyose yabaga yiteguye kurira indege, hahitaga haboneka impamvu ituma urugendo rusubikwa. Irungu n’umunaniro mwinshi byashoboraga gutuma yiheba, ariko yasenze Yehova kugira ngo amufashe kugeza ubutumwa bwiza ku bandi bagenzi na bo bari babuze indege. Ese hari icyo byatanze? Yabwirije abantu benshi kandi atanga ibitabo byinshi. Yaravuze ati “nubwo bitari binyoroheye, numva Yehova yarampaye imigisha kandi akampa imbaraga zo kuvuganira izina rye.” Koko rero, yakomeje kuzirikana umugambi wa Yehova.

19. Ni iki kigaragaza abasenga Imana by’ukuri?

19 Abagaragu ba Yehova ni bo bonyine basobanukiwe ko ubutegetsi bwe bw’ikirenga ari bwo bw’ingenzi. Ibyo ni byo bigaragaza ko ari bo bonyine basenga Imana by’ukuri. Ku bw’ibyo rero, twese twagombye kwihatira gukomeza gushyigikira ubutegetsi bw’ikirenga bw’Imana.

20. Yehova abona ate ibyo ukora ugamije gushyigikira ubutegetsi bwe?

20 Iringire udashidikanya ko iyo ukomeza gukorera Yehova mu budahemuka kandi ukihanganira ibigeragezo, ugamije gushyigikira ubutegetsi bwe bw’ikirenga, aha agaciro ibyo ukora (Zab 18:25). Mu gice gikurikira tuzarushaho gusobanukirwa impamvu dukwiriye gushyigikira ubutegetsi bw’ikirenga bwa Yehova n’uko twabushyigikira.