Soma ibirimo

Jya kuri meni ya kabiri

Abahamya ba Yehova

Ikinyarwanda

U BURUSIYA

Bafunzwe bazira ukwizera kwabo

Bafunzwe bazira ukwizera kwabo

Ku itariki ya 25 Gicurasi 2017, abapolisi bitwaje intwaro zikomeye n’abo mu rwego rushinzwe ubutasi basheshe amateraniro y’Abahamya ba Yehova yari yabereye mu mugi wa Oryol, mu gihugu cy’u Burusiya. Kubera ko muri Kamena 2016 abategetsi basheshe umuryango uhagarariye Abahamya muri mugi, abo bategetsi babarega gukomeza gukorana n’umuryango ukora ibikorwa by’ubutagondwa.

Umushinjacyaha yareze Umuhamya wa Yehova witwa Dennis Christensen, bitewe n’uko na we yari muri ayo materaniro. Urukiko rw’akarere ka Sovietsky rwategetse ko Christensen aba afunzwe by’agateganyo kugeza ku itariki ya 23 Nyakanga 2017, kugira ngo urwego rushinzwe ubutasi rukusanye ibimenyetso bimushinja. Ku itariki ya 23 Gicurasi 2017, Christensen yajuririye uwo mwanzuro. Icyakora, ku itariki ya 21 Kamena 2017, urukiko rwateye utwatsi ubwo bujurire rwanzura ruvuga ko akomeza gufungwa by’agateganyo. Uwo Muhamya aramutse ahamwe n’icyaha, yahanishwa ingingo ya 282.2, yo mu gitabo cy’amategeko ahana, igika cyayo cya 1, agafungwa imyaka itandatu.

Ambasade ya Danimarike iri i Moscou yahise imenyeshwa iby’ifatwa ry’uwo Muhamya ukomoka mu gihugu cyayo, maze abayihagarariye bajya kubonana na we aho afungiwe. Intumwa z’iyo ambasade zivuga ko zasanze adafashwe nabi kandi ko ameze neza.

Umwanzuro urimo akarengane wafashwe n’Urukiko rw’Ikirenga

Igihe abategetsi bashakaga gusesa umuryango uhagarariye Abahamya ba Yehova mu rwego rw’amategeko mu mugi wa Oryol, babanje gusaka amazu Abahamya bateraniramo, bavuga ko basanzemo ibitabo kandi mu by’ukuri ari bo babizanye; hari hashize igihe Abahamya bavanyemo ibitabo byose. Abashinjacyaha bahereye kuri ibyo bitabo bike, bavuga ko ari ikimenyetso kigaragaza ko hari “ububiko bw’ibitabo byinshi byo gutanga kandi biri ku rutonde rw’ibirimo ibitekerezo by’ubutagondwa.” Igihe Abahamya bajuririraga Urukiko rw’Ikirenga rw’icyo gihugu, na rwo rwashimangiye umwanzuro wo gusesa uwo muryango.

Muri Werurwe 2017, Minisiteri y’Ubutabera yo mu Burusiya yareze ibiro bikuru by’Abahamya ba Yehova byo muri icyo gihugu kandi isaba ko imiryango ibahagarariye mu rwego rw’amategeko yari ikiriho na yo ifungwa. Ku itariki ya 20 Mata 2017, Urukiko rw’Ikirenga rw’icyo gihugu rwafashe umwanzuro wo guhagarika ibikorwa by’Abahamya ba Yehova muri icyo gihugu. Icyakora Abahamya bajuririye uwo mwanzuro, bavuga ko imibereho yabo nta ho bihuriye n’ubutagondwa bashinjwa. Kimwe n’uko byagenze mu mugi wa Oryol, abacamanza bafashe imyanzuro bashingiye ku bimenyetso by’ibihimbano.

Baharanira umudendezo wabo mu by’idini

Igihe abapolisi bazaga gusesa amateraniro ku itariki ya 25 Gicurasi 2017, abari bayarimo bari baje kwiga Bibiliya; ntibari baje gushyigikira umuryango runaka wo mu rwego rw’amategeko. Abahamya ba Yehova barimo barashaka uko barenganurwa n’inkiko zo mu Burusiya, kandi ikibazo cya Dennis Christensen n’Abahamya bagenzi be bo muri icyo gihugu, bakigejeje no mu zindi nkiko mpuzamahanga.

Uko ibintu byagiye bikurikirana

  1. 21 Kamena 2017

    Dennis Christensen yarajuriye, ariko urukiko ruvuga ko aguma muri gereza.

  2. 26 Gicurasi 2017

    Urukiko rwafashe umwanzuro wo gufunga by’agateganyo Dennis Christensen, igihe kingana n’amezi abiri.

  3. 25 Gicurasi 2017

    Abapolisi basheshe amateraniro yari yabereye mu mugi wa Oryol, bafata Dennis Christensen.