Soma ibirimo

Jya kuri meni ya kabiri

Abahamya ba Yehova

Ikinyarwanda

KAZAKISITANI

Bafunzwe bazira ukwizera kwabo

Bafunzwe bazira ukwizera kwabo

Ku itariki ya 2 Gicurasi 2017, umucamanza Talgat Syrlybayev yakatiye Teymur Akhmedov igifungo k’imyaka itanu amurega kubiba urwango rushingiye ku madini no kumvisha abantu ko hari abaruta abandi ashingiye ku madini yabo. Mu bindi umucamanza yamubujije harimo kumara imyaka itatu atifatanya n’idini rye. Ku itariki ya 20 Kamena, Urukiko rwo mu mugi wa Astana rwanze ubujurire bwe nubwo yari yatanze ibihamya bigaragaza ko ari umwere.

Ibirego akurikiranyweho

Ibirego by’ibinyoma Akhmedov akurikiranyweho bishingiye ku biganiro yagiranye n’umuntu wigiraga nk’aho yifuza kuba Umuhamya wa Yehova mu mwaka wa 2016. Mu gihe cy’amezi arenga arindwi bamaze baganira mu mahoro, Akhmedov yamwerekaga imirongo yo muri Bibiliya ishyigikira uko abona ibintu. Icyakora muri icyo gihe cyose, Akhmedov we ntiyari azi ko uwo muntu yamufataga amajwi mu ibanga kandi ko yari kubyifashisha amurega kwica ingingo ya 174 igika cya 2 yo mu gitabo cy’amategeko ahana. Iyo ngingo ibuzanya ibikorwa byo “kubiba urwango rushingiye ku idini” n’“ibitekerezo byo guheza, gutonesha cyangwa gupfobya abaturage ushingiye ku idini.”

Icyakora Akhmedov akomeza kuvuga ko atigeze arenga kuri iryo tegeko. Nanone, ibyo avuga ku myizerere ye bihuje n’ingingo ya 18 n’iya 19 yo mu Masezerano Mpuzamahanga yerekeye Uburenganzira mu by’Imbonezamubano na Politiki, aha abantu “uburenganzira bwo kuvuga icyo batekereza, guhitamo idini bashaka no kumvira umutimanama wabo.”

Mbere yaho, Komite y’Umuryango w’Abibumbye Yita ku Burenganzira bw’Ikiremwamuntu ikurikiranira hafi iyubahizwa ry’ayo masezerano, yari yavuze ko Kazakisitani itanga ibisobanuro bitumvikana kandi igakoresha nabi ingingo ya 174 icira imanza abantu bagaragaza imyizerere yabo yo mu rwego rw’idini. Muri raporo y’iyo komite yo ku itariki ya 9 Kanama 2016, yasabye Kazakisitani “kubahiriza uburenganzira abantu bafite bwo kujya mu idini bashaka no gukora ibikorwa byo mu rwego rw’idini. Ingingo ya 22 yo mu Itegekonshinga ikwiriye gusuzumwa igahuzwa n’Amasezerano Mpuzamahanga yerekeye Uburenganzira mu by’Imbonezamubano na Politiki, kandi igasubiramo amategeko yose y’ingenzi n’ibikorwa, kugira ngo ikureho ibintu byose bifitanye isano no kurenga ku ngingo ya 18 y’ayo masezerano, asobanutse neza.”

Ku birebana n’ibisobanuro bitumvikana bitangwa mu itegeko ryo mu gihugu cya Kazakisitani, Heiner Bielefeldt, intumwa idasanzwe y’Umuryango w’Abibumbye ikurikiranira hafi ibirebana n’umudendezo mu by’idini, mu mwaka wa 2014 yasohoye raporo isaba icyo gihugu gushyiraho amategeko asobanutse neza kandi yumvikana akumira urwango rushingiye ku idini. Bitabaye ibyo, iryo tegeko ryaba ribangamiye umudendezo abantu bafite wo kujya mu idini bashaka cyangwa kugira imyizerere bashaka.

Teymur Akhmedov yafunzwe mu buryo bunyuranyije n’amategeko

Ku itariki ya 20 Mutarama 2017, urukiko rwa 2 rwo mu karere ka Astana rwemeje ko Akhmedov afungwa by’agateganyo. Igihe abarindagereza bamuhatiraga kwemera icyaha, baramukubise cyane. Hagati aho, Akhmedov w’imyaka 61, akeneye kuvurwa byihutirwa kuko afite ikibyimba ku bwonko (bikekwa ko ari kanseri). Abamwunganira mu mategeko bagejeje ikirego cye ku Ishami ry’Umuryango w’Abibumbye Rishinzwe Kurenganura Abafungwa mu Buryo Bunyuranyije n’Amategeko no ku ntumwa y’Umuryango w’Abibumbye ikurikiranira hafi ibirebana n’umudendezo mu by’idini. Kuva aho urukiko rwo mu mugi wa Astana rwangiye ubujurire bwe ku itariki ya 20 Kamena 2017, abamwunganira mu mategeko bafashe umwanzuro wo kujuririra izindi nkiko.

Ku itariki ya 2 Ukwakira 2017, iryo Shami ry’Umuryango w’Abibumbye ryasohoye imyanzuro igaragaza ko guverinoma ya Kazakisitani yakoze ikosa rikomeye ryo gufunga Akhmedov kandi rivuga ko akwiriye guhita afungurwa. Nanone ryakomeje rivuga ko ibikorwa bye byo kubwira abandi ibyo yizera “bidahungabanya amahoro na mba” ko “abifitiye uburenganzira,” kandi ko kuba guverinoma yaramufunze bigaragaza ibikorwa by’ivangura bikorerwa Abahamya ba Yehova. Nyuma yaho iryo Shami ry’Umuryango w’Abibumbye risohoreye imyanzuro yaryo, abunganira Akhmedov mu mategeko bagejeje ikirego ke mu Rukiko rw’Ikirenga rwa Kazakisitani, basaba ko rukurikiza imyanzuro yafashwe n’iryo shami. Urwo rukiko rukagira Akhmedov umwere kandi rugategeka ko arekurwa. Abo bavoka bategereje kureba ko guverinoma ya Kazakisitani izarekura Akhmedov.

Uko ibintu byagiye bikurikirana

  1. 2 Ukwakira 2017

    Ishami ry’Umuryango w’Abibumbye Rishinzwe Kurenganura Abafungwa mu Buryo Bunyuranyije n’Amategeko ryasohoye imyanzuro yaryo rivuga ko Teymur Akhmedov yarenganye kandi ko akwiriye guhita arekurwa.

  2. 20 Kamena 2017

    Urukiko rwa Astana rwanze ubujurire.

  3. 2 Gicurasi 2017

    Yakatiwe igifungo cy’imyaka itanu.

  4. 13 Werurwe 2017

    Urubanza rwashyikirijwe urukiko.

  5. 1 Werurwe 2017

    Yangiwe guhanagurwaho ibyaha.

  6. 20 Gashyantare 2017

    Yasabye guhanagurwaho ibyaha.

  7. 30 Mutarama 2017

    Urukiko rwo mu mugi wa Astana rwanze ubujurire bwe.

  8. 18 Mutarama 2017

    Teymur Akhmedov yarafashwe afungwa amezi abiri by’agateganyo.