31 NYAKANGA 2025
U BURUSIYA

Hejuru: Valeriy Khmil, Sergey Kretov, Tatyana Morlang na Nataliya Perekatiy

Hasi: Aleksandr Podolin, Aleksandr Popras, Yevgeniy Reshetnikov na Svetlana Vyrezkova

“Urugero rwabo rwo kwizera rwatumye Yehova ahabwa ikuzo”

FUNGURA

Ku itariki ya 28 Nyakanga 2025, Urukiko rw’Umujyi wa Gryazi ruri mu gace ka Lipetsk, rwahamije ibyaha abavandimwe batanu ari bo: Valeriy Khmil, Sergey Kretov, Aleksandr Podolin, Aleksandr Popras na Yevgeniy Reshetnikov. Nanone hari bashiki bacu batatu na bo bahamijwe ibyaha, ari bo: Tatyana Morlang, Nataliya Perekatiy na Svetlana Vyrezkova. Urwo rukiko rwabaciye amande ari hagati ya miliyoni enye na miliyoni hafi icumi z’amafaranga y’u Rwanda.

Icyo twabavugaho

Valeriy Khmil

Igihe yavukiye: 1982 (Kolpashevo, mu gace ka Tomsk)

Igihe yabatirijwe: 2008

Amateka ye: Akora akazi ko kugenzura ububiko bw’ibintu. Yashakanye na Kira mu mwaka wa 2007. Bafite umwana umwe w’umuhungu n’abakobwa babiri

Ibyo yaregwaga: Kuyobora amateraniro y’Abahamya ba Yehova akoresheje ikoranabuhanga rya videwo

Igihano yahawe: Yaciwe amande agera kuri miliyoni zirindwi z’amafaranga y’u Rwanda

Ibyo yavuze

Ibihe bikomeye wanyuzemo byakwigishije iki kuri Yehova?

Yehova ni papa wacu wo mu ijuru utwitaho kandi akatugaragariza urukundo rwinshi ku buryo tutabona uko tubisobanura. Nubwo hari abantu benshi bahura n’ibigeragezo, Yehova aba yiteguye guha buri wese ibyo akeneye kandi mu gihe gikwiriye kugira ngo abashe gukomeza kwihangana. Yehova azi neza buri wese mu bagize umuryango we kandi twese aradukunda. Nyuma yo kwibonera ibintu byinshi Yehova yankoreye, narushijeho kwemera ko atazigera na rimwe atererana indahemuka ze.

Sergey Kretov

Igihe yavukiye: 1978 (Grozny, mu gace ka Chechen)

Igihe yabatirijwe: 1997

Amateka ye: Yakoraga mu ruganda. Yashakanye na Marina mu mwaka wa 2004. Bafite umwana w’umukobwa

Ibyo yaregwaga: Kuyobora amateraniro y’Abahamya ba Yehova akoresheje ikoranabuhanga rya videwo

Igihano yahawe: Yaciwe amande arenga miliyoni eshanu z’amafaranga y’u Rwanda

Ibyo yavuze

Ni iki cyagufashije gukomeza kwiringira Yehova?

Amagambo ari muri Zaburi ya 73:25 yanteye inkunga cyane. Ayo magambo agira ati: “Nta wundi mfite mu ijuru utari wowe, kandi mu isi nta wundi nishimira uretse wowe.” Satani ni umuhanga mu gutera abantu ubwoba. Ariko kubera ko nzi neza ko igihe cyose Yehova aba ndi hafi kandi ko aba yiteguye kumfasha, bituma numva ko nta kintu na kimwe gikwiriye kuntera ubwoba. Ubwo rero ikintu mba nkeneye ni ugutuza kandi nkiringira Yehova, kuko nzi neza ko hari igihe kizagera ibintu byose bikagenda neza.

Tatyana Morlang

Igihe yavukiye: 1957 (Gryazi)

Igihe yabatirijwe: 2018

Amateka ye: Yari inzobere mu by’ubucuruzi, mbere yuko ajya mu kiruhuko k’izabukuru. Yashakanye na Viktor mu mwaka wa 1982. Bafite umwana w’umuhungu n’uw’umukobwa

Ibyo yaregwaga: Kwifatanya mu materaniro y’Abahamya ba Yehova

Igihano yahawe: Yaciwe amande arenga miliyoni enye z’amafaranga y’u Rwanda

Ibyo yavuze

Ni iki cyagufashije kudahangayika cyane?

Iyo numvaga mpangayitse kandi nacitse intege, nahitaga ntekereza ku magambo ari mu Migani 16:3: agira ati: “Ibyo ukora byose ujye ubyereka Yehova, ni bwo uzagira icyo ugeraho.” Kuba nariringiye Yehova mu buryo bwuzuye byatumye mbona ko anyitaho, akanyobora kandi akangaragariza urukundo. Ibyo byamfashije kudahangayika cyane. Nanone nzi neza ko umuryango w’abavandimwe wo ku isi hose usenga usabira abagaragu ba Yehova batotezwa. Ayo masengesho yatumye nihangana kandi ngahora nishimye.

Nataliya Perekatiy

Igihe yavukiye: 1953 (Dach, mu gace ka Yaroslavl)

Igihe yabatirijwe: 1992

Amateka ye: Yapfushije umugabo we mu mwaka wa 1993. Afite abahungu babiri n’umukobwa umwe

Ibyo yaregwaga: Kwifatanya mu materaniro y’Abahamya ba Yehova

Igihano yahawe: Yaciwe amande arenga miliyoni enye z’amafaranga y’u Rwanda

Ibyo yavuze

Ese hari umurongo wo muri Bibiliya waba waraguteye inkunga?

Mu 2 Abakorinto 12:10, haragira hati: “Ubwo rero, nishimira ko mfite intege nke. Nishimira gutukwa, kuba mu bihe by’ubukene, gutotezwa no guhura n’ingorane ku bwa Kristo. Iyo mfite intege nke ni bwo ngira imbaraga.” Hari igihe mba nacitse intege, nkumva nakwibera nk’umushwi nkihisha mu mababa ya Yehova. Uko nkomeza kugaragaza ko niringira Yehova mu buryo bwuzuye, akomeza kunyereka ko ari we ncuti nkwiriye kwiringira kuruta izindi zose. Buri gihe Yehova amba hafi, akampa imbaraga nkeneye kugira ngo nkomeze kumukorera. Rwose ibyo bituma nongera gukomera kandi singire ubwoba bitewe n’ibibazo ndi kunyuramo.

Aleksandr Podolin

Igihe yavukiye: 1970 (mu gace ka Lipetsk)

Igihe yabatirijwe: 2009

Amateka ye: Yakoraga akazi ko gusana no kwita ku mihanda ya gari ya moshi. Yashakanye na Svetlana mu mwaka wa 2014

Ibyo yaregwaga: Kuyobora amateraniro y’Abahamya ba Yehova akoresheje ikoranabuhanga rya videwo

Igihano yahawe: Yaciwe amande angana na miliyoni hafi umunani z’amafaranga y’u Rwanda

Ibyo yavuze

N iki gituma wizera ko Yehova azaguha imigisha?

Muri Zaburi ya 37:7, Dawidi yaravuze ati: “Ujye ukorera Yehova wishimye cyane, na we azaguha ibyo umutima wawe wifuza.” Ubwo rero nizeye ntashidikanya ko igihe cyose nzakomeza kugirana ubucuti bukomeye na Yehova, nta kintu kizamubuza kumva no gusubiza amasengesho yanjye. Nubwo imimerere naba ndimo yaba isa naho idatanga icyizere, nzi neza ko Yehova azamfasha. Mu gihe kiri mbere, Yehova azakuraho burundu ibintu byose bitubabaza ku mubiri ndetse no mu byiyumvo .

Aleksandr Popras

Igihe yavukiye: 1967 (Bratsk, mu gace ka Irkutsk)

Igihe yabatirijwe: 1994

Amateka ye: Akora kuri sitasiyo. Yashakanye na Yelena mu mwaka wa 1989. Bafite umwana w’umukobwa n’uw’umuhungu n’abuzukuru bane

Ibyo yaregwaga: Kuyobora amateraniro y’Abahamya ba Yehova akoresheje ikoranabuhanga rya videwo

Igihano yahawe: Yaciwe amande agera hafi kuri miliyoni icumi z’amafaranga y’u Rwanda

Ibyo yavuze

Ni iki cyabafashije gukomeza kubona ibigeragezo mu buryo bukwiriye?

Kubona ukuntu abandi bavandimwe na bashiki bacu ba hano mu Burusiya bihanganira ibigeragezo byanteye inkunga. Binyibutsa amagambo ari muri 1 Petero 2:12, agira ati: “Mukomeze kugira imyifatire myiza hagati y’abantu bo muri iyi si, kugira ngo nubwo babasebya bavuga ko mukora ibibi, nibabona ibikorwa byanyu byiza, bizabatere gusingiza Imana igihe izaba ije guca urubanza.” Urugero rwabo rwo kwizera rwatumye Yehova ahabwa ikuzo kandi runyibutsa ko ntari njyenyine. Nizeye ko Yehova azadufasha twese tugakomeza kwihangira ibigeragezo kugeza tubitsinze.

Svetlana Vyrezkova

Igihe yavukiye: 1971 (Turukimenisitani)

Igihe yabatirijwe: 2001

Amateka ye: Yakoraga ibyo gutunganya imisatsi. Yashakanye na Oleg mu mwaka wa 1999. Bafite abakobwa babiri

Ibyo yaregwaga: Kwifatanya mu materaniro y’Abahamya ba Yehova

Yamaze imyaka ibiri afunzwe by’agateganyo

Igihano yahawe: Yaciwe amande arenga miliyoni enye z’amafaranga y’u Rwanda

Ibyo yavuze

Ni iki cyagufashije gukomeza kwihangana igihe wari ufunzwe by’agateganyo?

Iyo natekerezaga ku magambo ari muri Yesaya 41:9, numvaga nongeye kugira imbaraga. Yehova yaravuze ati: “Uri umugaragu wanjye; naragutoranyije kandi sinagutaye.” Iyo nabaga ndi mu kumba ka gereza, nabaga numva ko Yehova ari iruhande rwanjye igihe cyose. Yehova yatumye ntuza kandi ngira amahoro. Nifuza gukora uko nshoboye kose kugira ngo ibikorwa byanjye bitume yishima.

Nubwo abavandimwe na bashiki bacu bo mu Burusiya no muri Crimea bakomeje gutotezwa, twiringiye ko Yehova azakomeza kubarindira ‘mu maboko ye y’iteka ryose.—Gutegeka kwa Kabiri 33:27.

AMAKURU