23 MATA 2024 | YAHUJWE N’IGIHE KU ITARIKI YA 7 GASHYANTARE 2025
U BURUSIYA

AMAKURU MASHYA—ABAVANDIMWE BARAFUNZWE NYUMA YO KUJURIRA | Gukorera Yehova birashimisha

FUNGURA

Ku itariki ya 4 Gashyantare 2025, Urukiko rw’Ikirenga rwo muri Repubulika ya Udmurtian rwahinduye igifungo gisubitse cyari cyarakatiwe umuvandimwe Yevgeniy Stefanidin na Aleksandr Votyakov nyuma yo kujurira. Ubu umuvandimwe Yevgeniy Stefanidin yahawe igifungo cy’imyaka itandatu, naho Aleksandr Votyakov bamukatira igifungo cy’imyaka itandatu n’igice. Bahise bajyanwa muri gereza bakiva mu rukiko.

Ku itariki ya 25 Ukwakira 2024, Urukiko rw’Akarere ka Pervomayskiy, ruherereye mu gace ka Izhevsk muri Repubulika ya Udmurtian Votyakov, rwahamije icyaha umuvandimwe Yevgeniy Stefanidin na Aleksandr Votyakov. Umuvandimwe Yevgeniy Stefanidin yahawe igifungo gisubitse cy’imyaka itandatu, naho Aleksandr Votyakov bamukatira igifungo gisubitse cy’imyaka itandatu n’igice. Ntibizaba ngombwa ko bajyanwa muri gereza.

Icyo twabavugaho

Yevgeniy Stefanidin

Igihe yavukiye: 1989 (Izhevsk)

Ibimuranga: Akora ibijyanye no kugurisha amazu

Yevgeniy yakuriye mu muryango w’Abahamya ba Yehova. Igihe yari afite imyaka icumi, nyirakuru yarapfuye. Ibyiringiro by’umuzuko byatumye arushaho kuba incuti ya Yehova. Yabatijwe mu mwaka wa 2006

Yashakanye na Marina mu mwaka wa 2011. Bafite umwana umwe w’umukobwa

Yevgeniy bamusanzemo uburwayi bwa kanseri mu mwaka wa 2022

Ibyo yavuze

Ni iki cyagufashije gukomeza kugira imitekerereze ikwiriye mu gihe cy’ibitotezo?

Iyo mfashe akanya ngatekereza ku migisha mbona buri munsi, bituma ndushaho kwishima. Nanone mpora nibuka ko nubwo Yehova areka ibitotezo bikangeraho, atari we ubinteza. Vuba aha azakuraho ibibi byose bikorerwa abagaragu be bakomeza kumubera indahemuka. Nanone ni iby’ingenzi ko nkomeza kuba incuti ya Yehova hamwe n’abavandimwe na bashiki bacu. Hari mushiki wacu wambwiye ati: “Ukuntu uhora useka bidutera inkunga cyane. Kubona ukuntu ukomeza kugira imitekerereze myiza kandi uhanganye n’ibibazo bikomeye, bituma nanjye ntagira ubwoba kandi ngakomeza kugira icyizere.” Mu by’ukuri, nishimira kuba ndi umwe mu bagize umuryango wa Yehova.

Aleksandr Votyakov

Igihe yavukiye: 1973 (Izhevsk)

Ibimuranga: Ni umwubatsi

Yashakanye na Liliya mu mwaka wa 1995

Yakozwe ku mutima n’ukuntu umugore we amaze kuba Umuhamya wa Yehova yahindutse. Aleksandr yabatijwe mu mwaka wa 2006

Ibyo yavuze

Ibitotezo wahuye na byo byakwigishije iki?

Niboneye akamaro ko kwiringira Yehova, kandi nizera ntashidikanya ko azakomeza kumfasha. Namaze amezi hafi atandatu ntemerewe kuva mu rugo kandi ntashobora gukora akazi. Muri icyo gihe, umugore wanjye na we yahuye n’uburwayi bukomeye. Ariko twiboneye neza ukuntu Yehova yagiye adufasha. Abavandimwe na bashiki bacu batwitayeho kandi baduha ibyo dukeneye. Bene wacu batari Abahamya batangajwe cyane n’ukuntu muri icyo gihe cyose twari tumeze neza. Kubera ukuntu niboneye urukundo rwa Yehova, narushijeho kwishimira ko ndi umugaragu we.

Kimwe na Aleksandr na Yevgeniy, tubona ko gukorera Yehova umurimo wera mu buzima bwacu bwose tudatinya ari impano y’agaciro kenshi.—Luka 1:74, 75.

Uko ibintu byagiye bikurikirana

Ku itariki ya 14 Mata 2021

Abashinzwe umutekano baje gusaka urugo rwa Yevgeniy
Ku itariki ya 13 Ukuboza 2022

Aleksandr na Yevgeniy batangiye gukurikiranwaho icyaha
Ku itariki ya 14 Ukuboza 2022

Abapolisi basatse ingo zabo. Aleksandr yajyanywe muri kasho, naho Yevgeniy ategekwa kutarenga agace atuyemo
Ku itariki ya 15 Ukuboza 2022

Aleksandr yavanywe muri kasho, ariko ategekwa kutava mu rugo iwe
Ku itariki ya 9 Kamena 2023

Aleksandr yemerewe kuva mu rugo, ariko ategekwa kutarenga agace atuyemo
Ku itariki ya 17 Kanama 2023

Ni bwo urubanza rwabo rwatangiye

Ibindi wamenya

AMAKURU YO KU ISI HOSE

Abahamya ba Yehova bafunzwe bazira ukwizera kwabo—Aho bafungiwe

Abahamya ba Yehova bafungiwe mu bihugu bitandukanye bazira ukwizera kwabo no kubahiriza amahame y’ibanze y’uburenganzira bw’ikiremwamuntu kandi rimwe na rimwe bafungirwa ahantu habi.