Viktor Stashevskiy wo muri Crimée yafunzwe guhera muri Werurwe 2021

Abahamya ba Yehova bafunzwe bazira ukwizera kwabo—Aho bafungiwe

FUNGURA

Abahamya ba Yehova barenga 279 bo hirya no hino ku isi bari bafunzwe bazira ukwizera kwabo kugeza muri Mata 2026.

Dukurikije ibivugwa mu Ngingo ya 18 yo mu Masezerano Mpuzamahanga Agenga Uburenganzira bw’Ikiremwamuntu n’ubwa Politike, umuntu afite “uburenganzira bwo kuvuga icyo atekereza, kuyoborwa n’umutima nama no kujya mu idini ashaka.” Icyakora, mu bihugu bimwe na bimwe, Abahamya ba Yehova bambuwe ubwo burenganzira bw’ibanze, maze bituma bafungwa kandi bagafatwa nabi, bazira gukora ibikorwa bijyanye n’ukwizera kwabo. Abandi bo bafungwa bazira ko umutima nama wabo utabemerera kujya mu gisirikare.

U Burusiya

Guhera muri Mata 2017, Urukiko rw’Ikirenga rwo mu Burusiya rwahagaritse umurimo wacu kandi rushinja Abahamya ba Yehova “ibikorwa by’ubutagondwa.” Ibyo byatumye bafatira imitungo yabo, harimo ibiro by’ishami, Amazu y’Ubwami n’Amazu y’Amakoraniro kandi bavuga ko ibitabo byacu bitemewe n’amategeko. Uretse kuba baragiye bibasira imiryango yo mu rwego rw’amategeko Abahamya bakoreshaga, banatangiye kujya bibasira buri muntu ku giti cye. Kandi bakavuga ko ibyo bakora basenga binyuranyije n’amategeko. Abapolisi batangiye kwigabiza ingo z’Abahamya, bakabahohotera, bakabajyana kubahata ibibazo kandi bakabafunga. Kugeza ubu mu Burusiya, hafungiwe Abahamya ba Yehova 172. Bamwe bafunzwe by’agateganyo, abandi bari mu bigo bikorerwamo imirimo y’agahato naho abandi bo barakatiwe bari muri gereza.

Niba ushaka kuvanaho urutonde rw’Abahamya ba Yehova ubu bafunzwe bazira ukwizera kwabo mu Burusiya, kanda hano.

Koreya y’Epfo

Ku itariki ya 26 Ukwakira 2020, ni bwo bwa mbere mu mateka ya Koreya y’Epfo abantu bemerewe gukora imirimo ya gisivili isimbura iya gisirikare bitewe n’umutima nama wabo. Icyakora, abayobozi bashinzwe uburenganzira bw’ikiremwamuntu bavuze ko imirimo ya gisivili isimbura iya gisirikare Koreya y’Epfo yashyizeho, bayigenzuye bakabona ko uko ikorwa n’igihe imara ari nk’igihano n’ihohoterwa bikorerwa abayihawe. Iyo mirimo ya gisivili imara igihe gikubye inshuro ebyiri icyo umuntu amara mu mirimo ya gisirikare, kuko ikorwa mu gihe kingana n’imyaka 3. Nubwo byagenze bityo, mu mwaka wa 2024 Urukiko Rushinzwe Kurinda Iremezo ry’Itegeko Nshinga rwemeje ko iyo mirimo igumaho. Bamwe mu Bahamya ba Yehova bo muri Koreya y’Epfo bemeye gukora iyo mirimo ya gisivili nubwo igoye. Icyakora hari abakiri bato 15, banze gukora iyo mirimo. Muri bo umwe arafunzwe naho abandi benshi barimo kuburanishwa. Bashobora kuzahabwa ibihano bikomeye, urugero nko gufungwa, bitewe n’ibizava mu rubanza rwabo.

Niba ushaka kuvanaho urutonde rw’Abahamya ba Yehova ubu bafunzwe bazira ukwizera kwabo muri Koreya y’Epfo, kanda hano.

Ukraine

Hashize imyaka irenga mirongo itatu, Abahamya ba Yehova bo muri Ukraine bishimira uburenganzira bahawe n’itegeko ryemerera abantu gukora imirimo ya gisivili isimbura iya gisirikare. Icyakora, kuva intambara yo muri Ukraine yatangira ku itariki ya 24 Gashyantare 2022, byagaragaye ko itegeko ryemerera abantu gukora imirimo ya gisivili isimbura iya gisirikare ryirengagijwe, kuko basabaga abantu bose kujya mu gisirikare bitwaje ko bari mu bihe by’intambara. Ubwo rero ababyangaga, bahitaga babafunga. Kugeza ubu, muri Ukraine hari Abahamya ba Yehova icyenda bari muri gereza, hamwe n’abandi icyenda bafunzwe by’agateganyo bategereje umwanzuro w’urubanza. Intumwa eshatu zihariye z’Umuryango w’Abibumbye zagaragaje ko zihangayikishijwe n’ibibera muri Ukraine ku birebana nuko nta mirimo ya gisivili isimbura iya gisirikare ihari.

Niba ushaka kuvanaho urutonde rw’Abahamya ba Yehova ubu bafunzwe bazira ukwizera kwabo muri Ukraine, kanda hano.

“Mujye muzirikana abari muri gereza, mbese nkaho mufunganywe na bo.”—Abaheburayo 13:3.

Reba nanone

IBIBAZO ABANTU BAKUNZE KWIBAZA

https://cms-imgp.jw-cdn.org/img/p/1014757/univ/art/1014757_univ_sqr_xl.jpg