Ja ku birimwo

Ja ku rutonde rw'ibirimwo rwa kabiri

Ja ku rutonde rw’ibirimwo

Ivyabona vya Yehova

Ikirundi

Niwiyegereze Yehova

 IKIGABANE CA 21

Yezu Ahishura ‘Ubukerebutsi Buva ku Mana’

Yezu Ahishura ‘Ubukerebutsi Buva ku Mana’

1-3. Abahoze ari ababanyi ba Yezu bakiriye gute ukwigisha kwiwe, kandi ni igiki banse kwemera icese ku bimwerekeye?

ABARI aho bari bakubiswe n’inkuba. Nya musore ari we Yezu, yari ahagaze imbere yabo mw’isinagogi ariko arigisha. Ntiyari umuntu batazi, kubera yuko yari yakuriye mu gisagara iwabo, akaba kandi yari amaze imyaka n’iyindi akorera aho iwabo ari umubaji. Kumbure bamwebamwe muri bo baba mu mazu Yezu yari yarafashije kwubaka, canke kumbure imirima yabo bakaba barayirimisha amasuka arimishwa n’inka be n’ingōgo Yezu yari yarahinguye n’amaboko yiwe bwite. * Ariko none bokwakiriye gute inyigisho z’uwo muntu yari yahoze ari umubaji?

2 Benshi muri abo bariko baramwumviriza baratangaye, barabaza bati: ‘Ubu bukerebutsi mbega uyu yabukuye hehe?’ Mugabo kandi baravuze bati: “[N]i wa mubāji, mwene Mariya.” (Matayo 13:54-58; Mariko 6:1-3) Ikibabaje, abahoze ari ababanyi ba Yezu bavuze bati: ‘Uyu mubaji ni umuntu nkatwe w’iwacu.’ Naho amajambo yavuga yarimwo ubukerebutsi, baramuteye akagere. Ntibari bazi yuko ubukerebutsi yari afise butari ubwiwe bwite.

3 None Yezu yakuye hehe ubwo bukerebutsi? Yavuze ati: “Izi nyigisho zanje s’izanje, n’iz’uwantumye.” (Yohana 7:16) Intumwa Paulo yasobanuye yuko Yezu ‘yaduhindukiye ubukerebutsi buva ku Mana.’ (1 Ab’i Korinto 1:30) Ubukerebutsi bwa Yehova bwite burahishurirwa mu Mwana wiwe, Yezu. Si ivy’imbeshere, ivyo ni ko vyagenze ku buryo yubahutse kuvuga ati: “Jewe na Data tur’umwe.” (Yohana 10:30) Nimuze dusuzume imice itatu Yezu yagaragarijemwo ‘ubukerebutsi buva ku Mana.’

 Ivyo Yigishije

4. (a) Umutwe-shimikiro w’ubutumwa bwa Yezu wari uwuhe, kandi ni kubera iki ivyo vyari bihambaye rwose? (b) Ni kubera iki impanuro za Yezu zama nantaryo ari ngirakamaro kandi zigatangwa ku neza y’abamwumviriza?

4 Ubwa mbere, rimbura ivyo Yezu yigishije. Umutwe-shimikiro w’ubutumwa bwiwe wari “ubutumwa bgiza bg’ubgami bg’Imana.” (Luka 4:43) Ivyo vyari bihambaye rwose kubera uruhara Ubwami bwogize mu kuburanira ubusegaba bwa Yehova be no mu kuzanira abantu imihezagiro iramba. Mu kwigisha kwiwe, Yezu kandi yaratanze impanuro ziranga ubukerebutsi zerekeye ubuzima bwa misi yose. Yagaragaje yuko ubwiwe yari we ‘Mujanama w’Igitangaza’ yari yarabuwe. (Yesaya 9:6) Kukaba nkako, impanuro ziwe zashobora gute kutaba igitangaza? Yari n’ubumenyi bushika ibwina bw’Ijambo ry’Imana be n’ubw’ivyo igomba, ugutahura gukaze kw’ukungene umuntu ameze, akagira n’urukundo rwimbitse yakunda abantu. Ni co gituma impanuro ziwe zama nantaryo ari ngirakamaro kandi zigatangwa ku neza y’abamwumviriza. Yezu yavuga “amajambo y’ubu[zima] budashira.” Ni vyo, igihe impanuro ziwe zikurikijwe, zirashikana umuntu ku bukiriro.Yohana 6:68.

5. Bimwebimwe mu bintu Yezu yafatiyeko mu kwigisha muri ya Nsiguro yo ku Musozi vyari ibihe?

5 Ya Nsiguro yo ku Musozi ni akarorero kibonekeje k’ubukerebutsi ntangere dusanga mu nyigisho za Yezu. Iyo nsiguro, nk’uko yanditswe muri Matayo 5:3–7:27, biboneka yuko yoshikirizwa mu minuta 20 gusa. Ariko rero, impanuro zirimwo zikora ku gihe ico ari co cose, zikaba zihambaye co kimwe n’igihe zatangwa ari bwo bwa mbere. Yezu yavuze ku bintu vyinshi cane bitari bimwe, harimwo n’uburyo bwo gutsimbataza ubucuti hagati yacu n’abandi (5:23-26, 38-42; 7:1-512), uburyo bwo kuguma tutanduye mu nyifato runtu (5:27-32) be n’uburyo bwo kugira ubuzima buri n’ico buvuze (6:19-24; 7:24-27). Ariko Yezu ntiyapfuye kubwira abamwumviriza ingendo y’ubukerebutsi iyo ari yo; yarayiberetse mu kuyibasigurira, mu kubafasha kuyizirikanako, be no mu kubaha ibimenyamenya vyayo.

6-8. (a) Ni imvo zijijura izihe Yezu atanga zerekeye ukwirinda amaganya? (b) Ni igiki cerekana yuko impanuro za Yezu zigaragaza ubukerebutsi buva mw’ijuru?

 6 Rimbura nk’akarorero impanuro iranga ubukerebutsi Yezu yatanze ku kuntu twobigenza igihe turi n’amaganya ku vyerekeye ibintu vy’umubiri, nk’uko vyanditse muri Matayo ikigabane ca 6. Yezu atugira inama ati: “Ntimukaganyire amagara yanyu ku vyo muzorya canke ku vyo muzonywa, cank’umubiri wanyu ku vyo muzokwambara.” (Umurongo wa 25) Ibifungurwa n’ivyambarwa ni ibintu umuntu akeneye vy’ishimikiro, kandi ni ibisanzwe kurazwa ishinga no kubironka. Mugabo Yezu atubwira ‘kutiganyira’ ku vyerekeye mwene ivyo bintu. * Kubera iki?

7 Umviriza ukuntu Yezu asigura bimwe bijijura. Kubera yuko Yehova yaduhaye ubuzima n’umubiri, mbega none ntiyoshobora kuturonsa ibifungurwa vyo kuzigama ubwo buzima be n’impuzu zo kwambika uwo mubiri? (Umurongo wa 25) Nimba Imana ironsa inyoni ibifungurwa, n’amashurwe ikayambika ubwiza, ca wiyumvira ukuntu izorushiriza kubungabunga abantu bayisenga! (Umurongo wa 26, 28-30) Vy’ukuri, amaganya adasanzwe ntaco avuze. Ntashobora kwongera ku buzima bwacu akantu na gatoyi. * (Umurongo wa 27) Dushobora gute kwirinda amaganya? Yezu araduhanura kubandanya dushira ugusenga Imana mu kibanza ca mbere mu buzima bwacu. Ababigenza gutyo barashobora kwizigira yuko ibintu vyose bakenera ku musi ku musi “[ba]zovyongerwa” na Se wo mw’ijuru. (Umurongo wa 33) Ubwa nyuma, Yezu aratanga inama ngirakimazi kuruta zose, ngo tuze turafata umusi umwe ukwawo. Bimaze iki gufata amaganya y’ejo hazoza tukayongera ku y’uwu musi? (Umurongo wa 34) Vyongeye, bimaze iki guhagarika  umutima bimwe bidasanzwe ku vyerekeye ibintu bishobora kutazokwigera bishika? Gukurikiza mwene izo mpanuro zirangwa n’ubukerebutsi birashobora kuturinda umubabaro wo mu mutima muri iyi si itesha umutwe.

8 Biratomoye yuko impanuro Yezu yatanze ari ngirakamaro muri iki gihe nk’uko yari ngirakamaro igihe yatangwa ubu hakaba haciye hafi imyaka 2.000. None ico si ikimenyamenya c’ubukerebutsi buva mw’ijuru? Mbere n’impanuro nziza kuruta izindi abahanuzi b’abantu batanga usanga zigenda zirata igihe maze bidatevye zigasubirwamwo canke zigasubirizwa izindi. Inyigisho za Yezu zozo ntizatitutse ngo ni uko igihe kihaciye. Mugabo ivyo ntibikwiye kudutangaza, kubera yuko uwo Mujanama w’Igitangaza yavuga “amajambo y’Imana.”Yohana 3:34.

Ukuntu Yigisha

9. Abasoda bamwe bavuze iki ku vyerekeye ukuntu Yezu yigisha, kandi ni kubera iki ukwo kutari ugukuza inkuru?

9 Umuce ugira kabiri Yezu yagaragarijemwo ubukerebutsi bw’Imana ni ukuntu yigisha. Igihe kimwe, abasoda bamwe bari barungitswe kumufata bagarutse imbokoboko, bavuga bati: “Erega ntihigeze kuboneka umuntu avuga nka we.” (Yohana 7:45, 46) Ukwo ntikwari ugukuza inkuru. Mu bantu bose babayeho, Yezu we yari “[ya]mutse iyo hejuru,” yari afise ubumenyi bwinshi kandi akaba yari yaraciye uruma rwose kuruta abandi bose, ari na vyo yikorako mu kwigisha. (Yohana 8:23) Vy’ukuri yarigisha mu buryo ata wundi muntu n’umwe yari gushobora kubigira. Rimbura uburyo bubiri gusa mu bwo uwo Mwigisha yakoresha.

“Ishengero ritangazwa n’inyigisho ziwe”

10, 11. (a) Ni kubera iki tutobura gutangarira ukuntu Yezu yakoresha ibigereranirizo? (b) Imigani ni iki, kandi ni akarorero akahe kerekana igituma imigani Yezu yakoresha ishika ku nyota rwose mu kwigisha?

10 Yarakoresha ibigereranirizo mu buryo bushika ku nyota. Tubwirwa yuko “Yesu yab[wira] ishengero mu migani, [a]ta co yababgiye atabaciriye umugani.” (Matayo 13:34) Ntitubura gutangarira ububangukirwe ntangere yari afise bwo kwigisha ukuri kwimbitse abicishije mu bintu biba ku musi ku musi. Abarimyi batera imbuto, abagore bitegurira kwotsa imikate, abana bakinira mu tuguriro, abarovyi bakwega urusenga mu mazi, abungere  barondera intama zazimiye, emwe, ivyo vyari ibintu abamwumviriza bari barabonye incuro nyinshi. Iyo ukuri guhambaye gusanishijwe n’ibintu bimenyerewe, mwene ukwo kuri ntiguteba kwiyandika mu bwenge no mu mutima bimwe bikomeye.Matayo 11:16-19; 13:3-8, 33, 47-50; 18:12-14.

11 Yezu kenshi yarakoresha imigani, ni ukuvuga udukuru tugufitugufi turimwo ukuri kwo mu vy’inyifato runtu canke mu vy’impwemu. Kubera ko inkuru zoroha gutegera no kwibuka kuruta ivyiyumviro bidatomoye, iyo migani yarafasha kuzigama inyigisho za Yezu. Mu migani myinshi, Yezu yadondoye Se akoresheje ibigereranirizo bikomeye bitashobora gupfa kwibagirwa. Nk’akarorero, ni nde adashobora gutahura iciyumviro co muri wa mugani w’umwana w’igishushungwe, yuko iyo umuntu yataye inzira agaragaje ukwigaya nyakuri Yehova amugirira ikigongwe kandi akamwakirana ikibabarwe?—Luka 15:11-32.

12. (a) Ni mu buryo ubuhe Yezu yakoresha ibibazo mu kwigisha kwiwe? (b) Yezu yanumije gute abaharira ububasha yari afise?

12 Ugukoresha ibibazo abigiranye ubuhanga. Yezu yarakoresha ibibazo kugira ngo atume abamwumviriza bashika ku kugira ivyiyumviro ubwabo bashitseko, ngo atume basuzuma imvo zituma bakora canke kugira ngo atume bifatira ingingo. (Matayo 12:24-30; 17:24-27; 22:41-46) Igihe indongozi z’idini zaharira ko atoba yari afise ububasha yahawe n’Imana, Yezu yasubijeyo ati: “Non’ukubatiza kwa Yohana kwaturutse mw ijuru, canke se mu bantu?” Babuze ayo bacira n’ayo bamira bitumwe n’ico kibazo, biburanya muri bo bati: “Ni twavuga tuti Ni mw ijuru; ahava atubaza, ati N’iki cababujije kumwemera? Ariko mbega tuvuge tuti Ni mu bantu? Batinya abantu, kuko bose biyumvira badakekeranya yuko Yohana yavugishwa n’Imana.” Amaherezo, barishura bati: “Ntituhazi.” (Mariko 11:27-33; Matayo 21:23-27) Akoresheje ikibazo coroshe, Yezu yasize bajumarariwe ahishura kandi uburyarya bwari mu mitima yabo.

13-15. Wa mugani w’Umusamariya w’imbabazi ugaragaza gute ubukerebutsi bwa Yezu?

13 Hari igihe Yezu yashira hamwe uburyo yakoresha, biciye ku kwinjiza ibibazo bikabura ubwenge mu bigereranirizo vyiwe.  Igihe umwigisha w’ivyagezwe w’Umuyuda yabaza Yezu igisabwa kugira ngo aronke ubuzima budahera, Yezu yamurungitse mu Vyagezwe vya Musa, ibitegeka gukunda Imana na mugenzawe. Mu gushaka kwiyerekana ko yari umugororotsi, nya mugabo yabajije ati: “Mbega mugenzanje ni nde?” Yezu yishuye mu kwigana inkuru. Yiganye ivy’umugabo umwe w’Umuyuda yari ku rugendo ari wenyene, agwa mu bambuzi, baramukubita bamusiga ari intere. Haciye Abayuda babiri, uwa mbere akaba yari umuherezi, hanyuma hakurikira Umulewi. Bompi baramwirengagije. Ariko mu nyuma haza Umusamariya umwe. Atewe n’akagongwe, amupfuka inguma atamutoneka, maze amujana mu ndaro y’abahita hatagira inkomanzi, aho yashobora gutorera mitende. Mu gusozera inkuru yiwe, Yezu abaza nyene kumubaza ikibazo ati: “Mur’abo batatu ugira ngo ni nde yabonetse kw ari mugenzi w’uwaguye mu bambuzi?” Nya mugabo vyabaye ngombwa ko yishura ati: “N’uwamugiriye imbabazi.”Luka 10:25-37.

14 Uwo mugani none ugaragaza gute ubukerebutsi bwa Yezu? Mu gihe ca Yezu, Abayuda bakoresha ijambo “mugenzanje” ku bakurikiza imigenzo yabo bonyene, atari ku Basamariya. (Yohana 4:9) None iyo Yezu aza kuba yariganye iyo nkuru akavuga ko uwo Musamariya ari we yaguye mu bambuzi hanyuma agafashwa n’Umuyuda, ubwo ivyo vyari gukuraho uwo mwikeko? Yezu abigiranye ubukerebutsi, yaratunganije iyo nkuru ku buryo vyumvikanyemwo ko Umusamariya yitwararitse Umuyuda n’ikibabarwe cinshi. Zirikana kandi ikibazo Yezu yabajije arangije kwigana iyo nkuru. Yarahinduye ico ijambo “mugenzanje” ryashaka kuvuga. Mu bisanzwe nya mwigisha w’ivyagezwe yari yamubajije ati: ‘Ni nde nkwiye kugirira urukundo nka we mugenzanje?’ Mugabo Yezu yamubajije ati: “Mur’abo batatu ugira ngo ni nde yabonetse kw ari mugenzi w’uwaguye mu bambuzi?” Yezu ntiyashimitse ku wagaragarijwe ubugwaneza, uwagiriwe nabi, ahubwo yashimitse ku wagaragaje ubugwaneza, ari we Musamariya. Umugenzi nyakuri aribwiriza kugaragariza abandi urukundo ataravye ubwoko bwabo. Yezu ntaba yarashoboye gutuma iciyumviro ciwe kirushiriza gushika ku nyota iyo atabigira gutyo.

 15 None vyoba bitangaje kuba abantu baratangazwa n’“inyigisho” za Yezu kandi bakumva abakwegereye? (Matayo 7:28, 29) Igihe kimwe “ishengero ryinshi” ryaramaze imisi itatu rimuri iruhande, mbere ritagira n’imfungurwa!—Mariko 8:1, 2.

Ukuntu Yabaho

16. Ni mu buryo ubuhe Yezu yatanze “ikimenyamenya ngirakimazi” c’uko yarongorwa n’ubukerebutsi buva ku Mana?

16 Umuce ugira gatatu Yezu yagaragarijemwo ubukerebutsi bwa Yehova ni ukuntu yabaho. Ubukerebutsi ni ngirakimazi; burakora. Umwigishwa Yakobo yabajije ati: “Ni nde muri mwebge w’inkerebutsi?” Hanyuma yarishuye ikibazo ciwe bwite, mu kuvuga ati: “Inyigenzo yiwe nziza nibitangire ikimenyamenya ngirakimazi.” (Yakobo 3:13, The New English Bible) Uburyo Yezu yigenza ubwiwe bwaratanze “ikimenyamenya ngirakimazi” c’uko yarongorwa n’ubukerebutsi buva ku Mana. Nimuze turimbure ingene yagaragaje ko abona ibintu neza, mu kuntu yabaho be no mu kuntu yafata abandi.

17. Ni ibiki bitwereka yuko Yezu yari n’uburimbane butagira agahaze mu buzima bwiwe?

17 Woba warabonye ko abantu batabona ibintu neza kenshi bama barenza urugero mu vyo bagira? Emwe, bisaba ubukerebutsi kugira ngo umuntu agire uburimbane. Mu kugaragaza ubukerebutsi bw’Imana, Yezu yari n’uburimbane butagira agahaze. Kuruta ikindi kintu cose, ibintu vy’impwemu yabiha ikibanza ca mbere mu buzima. Ico yaguma akora rwose cari igikorwa c’ukwamamaza inkuru nziza. Yavuze ati: “[N]i co canzanye.” (Mariko 1:38) Vyari bimurimwo yuko ibintu vy’umubiri atari vyo vyari bihambaye kuruta ibindi kuri we; bisa n’uko mbere ivy’umubiri yari atunze vyari bikeya cane. (Matayo 8:20) Ariko rero, ntiyari umuntu azira kunezerwa. Cokimwe na Se ya “Mana ihimbawe,” Yezu yari umuntu arangwa n’umunezero, kandi yarongerereza abandi umunezero. (1 Timote 1:11, UB; 6:15) Igihe yitaba ubugeni bumwe, bukaba bwari ubukwe bwarangwa n’umuziki, ukuririmba be n’ukunezerwa, ntiyari ahari kugira ngo atere abandi ubuyega muri ubwo bukwe. Aho umuvinyu urangiriye, yarahinduye amazi umuvinyu uryoshe, kikaba ari ikinyobwa “[ki]nezereza imitima y’abantu.” (Zaburi  104:15; Yohana 2:1-11) Yezu yaremeye ubutumire bwinshi bwo kuza ku bifungurwa, kandi kenshi kuri mwene ivyo bihe yaca aboneraho akaryo ko kwigisha.Luka 10:38-42; 14:1-6.

18. Yezu yagaragaje gute ukubona ibintu neza kutagira agahaze mu kuntu yafata abigishwa biwe?

18 Yezu yaragaragaje ukubona ibintu kutarimwo agahaze mu kuntu yafata abandi. Ukuntu yatahura ukungene umuntu ameze, vyaramuhaye ukubona abigishwa biwe mu buryo butomoye. Yari azi neza yuko batari intungane. Yamara, yaratahura kamere zabo nziza. Yarabona ibizova muri abo bantu Yehova yari yarakwegereye. (Yohana 6:44) Naho bari n’udukosa, Yezu yaragaragaje umutima ukunze wo kubizigira. Mu kwerekana ko yari abizigiye, yarashinze ibanga rikomeye abigishwa biwe. Yabashinze kwamamaza inkuru nziza, kandi yari yizigiye ubushobozi bari bafise bwo kurangura iryo banga. (Matayo 28:19, 20) Igitabu c’Ivyakozwe n’intumwa kiremeza yuko bashishikaye igikorwa yari yarabashinze gukora, badahemuka. (Ivyakozwe 2:41, 42; 4:33; 5:27-32) Biratomoye rero yuko Yezu yari yabaye inkerebutsi mu kubizigira.

19. Yezu yerekanye gute yuko yari ‘umugwaneza, yiyoroheje mu mutima’?

19 Nk’uko twabibonye mu Kigabane ca 20, Bibiliya ifata ukwicisha bugufi n’ubugwaneza ikabisanisha n’ubukerebutsi. Biragaragara yuko Yehova yatanze akarorero keza muri ivyo. Ariko none tuvuge iki ku vyerekeye Yezu? Bireza umutima kubona ukwicisha bugufi Yezu yerekanye mu kuntu yafashe abigishwa biwe.  Kubera yuko yari umuntu atagira agasembwa, yari abarengeye. Yamara, ntiyigeze asuzugura abigishwa biwe. Ntiyigeze arondera gutuma bumva ko basuzuguritse canke ko ataco bashoboye. Ahubwo nyabuna, ntiyirengagiza aho bageza, kandi yarihanganira udukosa twabo. (Mariko 14:34-38; Yohana 16:12) None ntibiri n’ico bivuze kubona mbere n’abana barumva bisanze igihe baba bari kumwe na Yezu? Vy’ukuri, barumva bakwegerewe kuri we kubera ko babona yuko yari “umugwaneza, [y]iyoroheje mu mutima.”Matayo 11:29; Mariko 10:13-16.

20. Yezu yagaragaje gute ukugira ibitegereka mu kuntu yafashe umugore w’Umunyamahanga yari afise umukobwa yatewe n’amashetani?

20 Yezu yarerekanye ukwicisha bugufi kw’Imana mu bundi buryo buhambaye. Yagira ibitegereka, ni ukuvuga akiyorosha igihe ikigongwe caba gitumye ivyo biboneka ko bibereye. Nk’akarorero, ibuka igihe umugore w’Umunyamahanga yamusaba gukiza umukobwa wiwe yari yatewe n’amashetani bimwe bikomeye. Mu buryo butatu butandukanye, Yezu yabanje kwerekana yuko atari agiye kumufasha, ivyo ubwa mbere abigira mu kwanka kumwishura; ubwa kabiri, mu kuvuga adakikiriza yuko atari yarungitswe ku Banyamahanga, mugabo ko yari yarungitswe ku Bayuda; hanyuma ubugira gatatu, mu gutanga ikigereranirizo cerekana ico ciyumviro nyene mu bugwaneza. Ariko rero, nya mugore yarakobeje, atanga ikimenyamenya c’ukwizera kudasanzwe. Yezu arimbuye ico kintu kidasanzwe, yaciye akora iki? Yakoze neza na neza ico yari yerekanye yuko atokoze. Yarakijije umukobwa wa nya mugore. (Matayo 15:21-28) None ukwo si ukwicisha bugufi kudasanzwe? Ibuka kandi yuko ukwicisha bugufi ari ishimikiro ry’ubukerebutsi nyakuri.

21. Ni kubera iki dukwiye kwihatira kwigana kamere ya Yezu, imvugo yiwe be n’uburyo yakora ibintu?

21 Ese ukuntu dushobora gukenguruka kuba Injili ziduhishurira amajambo n’ibikorwa vya wa muntu w’inkerebutsi kuruta ababayeho bose! Twibuke yuko Yezu yagaragaza neza na neza uko Se ameze. Twiganye kamere ya Yezu, imvugo yiwe be n’uburyo yakora ibintu, tuzoba turiko turatsimbataza ubukerebutsi buva mw’ijuru. Mu kigabane gikurikira, turabona ingene dushobora gushira mu ngiro ubukerebutsi bw’Imana mu buzima bwacu.

^ ing. 1 Mu bihe vya Bibiliya, ababaji barakoreshwa mu kwubaka amazu, guhingura ibikoresho vyo mu nzu, be n’ibikoresho vyo gukoresha mu murima. Uwitwa Justin Martyr wo mu kinjana ca kabiri G.C., yanditse ku vyerekeye Yezu ati: “Yari amenyereye gukora bwa mubaji igihe yaba ari mu bantu b’abagabo, agahingura amasuka arimishwa n’inka be n’ingōgo.”

^ ing. 6 Irivuga ry’Ikigiriki ryahinduwe “kwiganyira” risobanura “gusamazwa umuzirikanyi.” Nk’uko ryakoreshejwe muri Matayo 6:25, ryerekeza ku bwoba bw’uguhagarika umutima busamaza umuzirikanyi canke bugatuma udatekanirwa, bugatuma umuntu atagira umunezero mu buzima.

^ ing. 7 Kukaba nkako, ubushakashatsi abanyasiyansi bagize bwarerekanye yuko guhagarika umutima be no guta umutwe birenze urugero bishobora gutuma turwara indwara y’umutima be n’ibindi birwara vyinshi bishobora gutuma tutaramba.