Ja ku birimwo

Ja ku rutonde rw'ibirimwo rwa kabiri

Ja ku rutonde rw’ibirimwo

Ivyabona vya Yehova

Ikirundi

Umunara w’Inderetsi  |  Kigarama 2015

 IKIGANIRO GIHUYE N’IBIRI KU GIPFUKISHO | URASHOBORA GUTAHURA BIBILIYA

Icogufasha gutahura Bibiliya

Icogufasha gutahura Bibiliya

Dufate ko ugiye mu gihugu kanaka ari bwo bwa mbere. Urabona ibintu vyinshi utamenyereye, uri abantu, imico kama, ibifungurwa be n’amahera. Birumvikana ko bitobura kukuvuruga mu bwenge.

Woshobora kwumva umerewe gutyo nyene igihe usomye Bibiliya ari bwo bwa mbere. Ni nk’aho woba ugiye mu gihugu ca kera utari uzi. Muri ico gihugu urahasanga abantu bitwa Abafilisitiya n’imigenzo utamenyereye nko ‘gutantamura impuzu,’ canke ukamenya ibijanye n’ibifungurwa vyitwa manu be n’igiceri citwa idarakima. (Kuvayo 16:31; Yosuwa 13:2; 2 Samweli 3:31; Luka 15:9) Ivyo vyose vyoshobora kukuvuruga mu bwenge. Nka kurya bigenda igihe umuntu agiye mu gihugu kanaka ari bwo bwa mbere, ubwo ntiwoshima ko hagira umuntu agusigurira ivyo bintu?

INGENE VYAGENDA KERA

Igihe Bibiliya yatangura kwandikwa mu kinjana ca 16 imbere ya Kristu, abantu barafashijwe kuyitahura. Nk’akarorero, indongozi ya mbere y’ihanga rya Isirayeli ari yo Musa, ‘yaratanguye gusigura’ ivyari bimaze kwandikwa.Gusubira mu vyagezwe 1:5.

Inyuma y’ibinjana nka cumi, hari hakiriho abantu bashoboye kwigisha Ivyanditswe. Mu 455 imbere ya Kristu, umugwi munini w’Abayuda urimwo n’abana benshi, warakoraniye mu kibanza ca bose mu gisagara ca Yeruzalemu. Muri ico kibanza, abigisha Bibiliya ‘barasomye n’ijwi ryumvikana muri ico gitabu’ ceranda. Ariko barakoze n’ibindi. Barafashije abantu gutahura ivyariko birasomwa.Nehemiya 8:1-8.

Haciye ibinjana bitanu, Yezu Kristu yarakoze igikorwa nk’ico co kwigisha. Kukaba nkako abantu bamwita umwigisha. (Yohani 13:13) Yarigishije imigwi y’abantu n’umuntu umwumwe ukwiwe. Igihe kimwe yarigishije isinzi ry’abantu abashikiriza ya nsiguro izwi cane yatanga ari ku musozi kandi “amasinzi [yarajorejwe] n’uburyo yigisha.” (Matayo 5:1, 2; 7:28) Mu 33 Yezu yaraganiriye n’abigishwa biwe babiri igihe bari ku nzira baja mu gisagara kiri hafi ya Yeruzalemu, ‘arabasigurira Ivyanditswe.’Luka 24:13-15, 27, 32.

Abigishwa ba Yezu na bo nyene barigisha Ijambo ry’Imana. Igihe kimwe, umutegetsi umwe ava muri Etiyopiya yariko arasoma mu Vyanditswe. Umwigishwa yitwa Filipo yaramwegereye amubaza ati: “Uratahura vy’ukuri ivyo uriko urasoma?” Uwo Munyetiyopiya yishuye ati: “Mu vy’ukuri, noshobora gute kubitahura hatagize uwundongōra?” Filipo yaciye amusobanurira ivyo yariko arasoma.Ivyakozwe 8:27-35.

INGENE BIGENDA MURI IKI GIHE

Nk’uko abigisha ba Bibiliya ba kera babigira, muri kino gihe Ivyabona vya Yehova barigisha Bibiliya hirya no hino kw’isi mu bihugu 239. (Matayo 28:19, 20) Ku ndwi ku ndwi barafasha abantu barenga imiliyoni icenda gutahura Bibiliya. Benshi muri abo bantu usanga atari abakirisu. Ivyo vyigwa bitangwa ku buntu kandi umuntu arashobora kwigira iwe canke ahandi hantu hamworohereza. Mbere hari abiga bakoresheje telefone canke orodinateri.

Nimba wipfuza kwungukira kuri ivyo vyigwa, turagusavye witure Icabona ca Yehova uwo ari we wese. Uzobona ko Bibiliya atari ishamba, ahubwo ko ari “ngirakamaro ku kwigisha, ku gukangīra, ku kugorora ibintu, ku gutoza indero mu bugororotsi,” kugira ngo ube “uwubishoboye neza, afise ibikenewe vyose ku bw’igikorwa ciza cose.”2 Timoteyo 3:16, 17.

 

Raba n'ibindi

KWIGA BIBILIYA

Ni kubera iki ukwiye kwiga Bibiliya?

Bibiliya iriko irafasha abantu amamiliyoni kw’isi yose kuronka inyishu z’ibibazo bihambaye cane mu buzima. Woba nawe wobishima?

KWIGA BIBILIYA

Ingene dufasha abantu kwiga Bibiliya

Kw’isi yose, birazwi ko Ivyabona vya Yehova bagendera abantu kugira ngo babigishe Bibiliya ku buntu. Raba ingene bigenda.

UMUNARA W’INDERETSI

Kwiga Bibiliya birashoboka kuri bose

Raba inyishu z’ibibazo umunani abantu bakunze kubaza ku bijanye n’igikorwa dukora co kwigisha Bibiliya.