Gushikira ivyo urondera

Hitamwo ururimi

Ja ku rutonde rw'ibirimwo rwa kabiri

Ja ku rutonde rw’ibirimwo

Ja ku birimwo

Ivyabona vya Yehova

Ikirundi

BE MASO! KIGARAMA 2013

 VYOBA VYARIYADUKIJE?

Ubushobozi bwo kubika amakuru bw’agahimba ADN

Ubushobozi bwo kubika amakuru bw’agahimba ADN

ABAKORESHA orodinateri barakenera kuyibikamwo amakuru menshi kugira ngo bayikoreko igihe bikenewe. Abahinga barizigiye ko bazoteza imbere cane uburyo busanzwe bukoreshwa mu gushingura amakuru ya elegitoronike, barabiye ku kantu karuhariwe mu kubika amakuru, ako na ko kakaba ari agahimba ntekeramakuru dusanga mu binyabuzima vyose kitwa ADN.

Rimbura ibi: Ikinyabuzima cose kirafise muri co ako gahimba ADN gatekeye amakuru amamiliyaridi n’amamiliyaridi acerekeye. Uwitwa Nick Goldman wo mu kigo c’i Buraya gisuzuma amakuru y’ibinyabuzima gikoresheje ubuhinga bwa none, avuga ati: “Turashobora kugakura mu magufa y’inzovu za kera cane (mammouths) . . . kandi tugatahura amakuru gatekeye. Ni n’akantu inzatsa, gatsindagiyemwo amakuru menshi kandi kadakenera umuyagankuba kugira ngo kabike amakuru, ivyo bigatuma kukabika no kukimurira ahandi vyoroha.” None ako gahimba ADN koba gashobora gushingurwamwo amakuru ya elegitoronike atunganywa n’abantu? Abashakashatsi bavuga ko kabishoboye.

Abahinga barihinguriye agahimba ADN, bagashiramwo ibintu vyo kwumviriza, ibisomwa be n’amashusho vyahawe iyindi mero, nka kurya babishira mu vyuma bibikwamwo amakuru ya elegitoronike. Mu nyuma abo bashakashatsi barashoboye kubisubiza mu mero yavyo isanzwe kandi ata na kimwe cononekaye. Abahinga babona ko biciye kuri ubwo buhinga, agahimba ADN k’igarama 1 koshobora kubika amakuru yoja ku tudisiki CD dushika 3.000.000 kandi hagahera imyaka amajana canke ibihumbi nya makuru yose abitswe. Ubwo buhinga hari aho bwotuma amakuru ya elegitoronike yo kw’isi yose ashingurwa. Ni co gituma agahimba ntekeramakuru ADN bakise “ubushinguro rusakumba bw’amakuru.”

None uvyibazako iki? Ubushobozi bwo kubika amakuru bw’ako gahimba ntekeramakuru ADN coba ari ikintu ciyadukije? Canke hariho uwagishizeho?